ଚଳନ୍ତା ବସରେ ଶିକ୍ଷକଙ୍କୁ ନିଶାଦ୍ରବ୍ୟ ଦେଇ ଟଙ୍କା ଓ ମୁଦି ଲୁଟ୍

ଦିଗପହଣ୍ଡି: ରାୟଗଡ଼ା ଜିଲ୍ଲାର ବନ୍ଧୁଗାଁ ପ୍ରାଥମିକ ବିଦ୍ୟାଳୟରେ କାର୍ଯ୍ୟରତ ବି. ଶ୍ରୀନିବାସ ରେଡ୍ଡୀ ନାମକ ଜଣେ ଶିକ୍ଷକଙ୍କୁ ଦୁର୍ବୃତ୍ତ ଚଳନ୍ତା ଗାଡିରେ ନିଶାଦ୍ରବ୍ୟ ଦେଇ ଶିକ୍ଷକଙ୍କ ଠାରୁ ଟଙ୍କା ଓ ସୁନା ମୁଦି ନେଇ ଚମ୍ପକ ମାରିଥିବା ଜଣାପଡିଛି । ଶିକାର ହୋଇଥିବା ଶିକ୍ଷକ ଶ୍ରୀନିବାସଙ୍କ ଘର ସାନଖେମୁଣ୍ଡି ବ୍ଲକ ତଥା ସଦରଥାନା ଅନ୍ତର୍ଗତ ଗୈାତମୀ ଗ୍ରାମ ବୋଲି ଜଣାପଡିଛି । ଘଟଣାନୁଯାୟୀ , ଶିକ୍ଷକ ଜଣକ ଶନିବାର ସକାଳୁ ରାୟଗଡ଼ାରୁ ଏକ ଘରୋଇ ବସ୍ ସାଇସୁଦ୍ଧାରେ ନିଜ ଗ୍ରାମ ଗୌତମି ଫେରୁଥିବା  ସମୟରେ କୌଣସି ଦୃର୍ବୁତ୍ତ ଶ୍ରୀନିବାସଙ୍କ ପାଖ ସିଟରେ ବସିଥିଲେ । ଏହାପରେ ଲୁଟେରା ଜଣକ ନାକରେ କୌଣସି ନିଶାଶକ୍ତ ଦ୍ରବ୍ୟ ସୁଙ୍ଘାଇ ଚେତାଶୂନ୍ୟ କରିବା ପରେ ଶ୍ରୀନିବାସଙ୍କ  ମନିପର୍ସରେ ଥିବା ଟଙ୍କା  ଓ  ହାତରୁ ସୁନାମୁଦି ଲୁଟି ନେଇ  କେଉଁଠାରେ ଓହ୍ଲାଇ ପଡ଼ିଥିବା ଜଣାପଡିଛି । ଏନେଇ ପରିବାର ଲୋକେ ବାରମ୍ବାର ଫୋନ କରିବା ସତ୍ତ୍ୱେ ଶ୍ରୀନିବାସଙ୍କ ଫୋନ ନ ଉଠାଇବାରୁ ପରିବାର ଲୋକଙ୍କ ମନରେ ସନ୍ଦେହ ଜାତ ହୋଇଥିଲା । ଯାହାଫଳରେ ସେମାନେ ଦିଗପହଣ୍ଡି ବସଷ୍ଟାଣ୍ଡ ନିକଟରେ ବସକୁ ଅପେକ୍ଷା କରିଥିଲେ । ବସଷ୍ଟାଣ୍ଡରେ ଗାଡି ପହଞ୍ଚିବାପରେ ପରିବାର ଲୋକେ ଗାଡ଼ି ଭିତରକୁ ଯାଇ ଦେଖିବା କ୍ଷଣି ଶିକ୍ଷକ ଜଣକ ଚେତାଶୂନ୍ଯ ଅବସ୍ଥାରେ ପଡିରହିଥିଲେ । ଏହାପରେ ଶିକ୍ଷକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । କିନ୍ତୁ ସେଠାରେ ପ୍ରାଥମିକ ଚିକିତ୍ସା ପରେ ବ୍ରହ୍ମପୁର ବଡ଼ମେଡ଼ିକାଲକୁ ପଠାଇ  ଦିଆଯାଇଛି । ତେବେ ଦିବାଲୋକରେ ଚଳନ୍ତା ବସ ଭିତରେ ବହୁ ଯାତ୍ରୀ ରହିଥିବା ସତ୍ତ୍ୱେ ଦୁର୍ବୃତ୍ତ ଜଣକ ଏଭଳି କାମ କରୁଥିବା କେହି ବି ଜାଣିପାରିନଥିବା ସାଧାରଣରେ ଚର୍ଚ୍ଚା ହେଉଛି ।