ପ୍ରଥମେ ଋଷ ଏହି ଦେଶକୁ ଦେବ କରୋନା ଭ୍ୟାକ୍ସିନ Sputnik Vର ୫ କୋଟି ଡୋଜ୍
ନୂଆଦିଲ୍ଲୀ: ଦୁନିଆରେ ପ୍ରଥମ କରୋନା ଭାଇରସ୍ ପାଇଁ ଭ୍ୟାକ୍ସିନ୍ ବାହାର କରିଥିବା ନେଇ ଋଷ ଦାବି କରିଥିଲା । ଏବେ ବ୍ରାଜିଲକୁ ପ୍ରଥମେ ଭ୍ୟାକ୍ସିନ୍ ଯୋଗାଣ ପାଇଁ ନିଷ୍ପତ୍ତି ନେଇଛି । ବ୍ରାଜିଲକୁ ୫ କୋଟି ଡୋଜ୍ ଭ୍ୟାକ୍ସିନ୍ ଦେବ ଋଷ । ଋଷିୟାନ୍ ଡାଇରେକ୍ଟ ଇନଭେଷ୍ଟମେଣ୍ଟ ଫଣ୍ଡ କହିଛି- ନଭେମ୍ବରରେ Sputnik V ଭ୍ୟାକ୍ସିନ୍ ଡେଲିଭରୀ ଆରମ୍ଭ ହେବ । ତେବେ, ବ୍ରାଜିଲ୍ ରେଗୁଲଟର୍ସ ତରଫରୁ ଅନ୍ତିମ ମଞ୍ଜୁରୀ ଏବେ ଯାଏଁ ମିଳିନାହିଁ ।
କରୋନା ଭାଇରସ ଦ୍ୱାରା ସର୍ବାଧିକ ପ୍ରଭାବିତ ହୋଇଥିବା ଦେଶ ମଧ୍ୟରୁ ଅନ୍ୟତମ ହେଉଛି ବ୍ରାଜିଲ୍ । ସେଠାରେ ଏବେ ଯାଏଁ କରୋନାର ୪୩ ଲକ୍ଷ ୧୫ ହଜାର ୮୫୮ ସଂକ୍ରମିତ ମାମଲା ମିଳିଛି । ୧ ଲକ୍ଷ ୩୧ ହଜାର ୨୭୪ରୁ ଅଧିକ ଲୋକଙ୍କ ଜୀବନ ନେଇଛି ମହାମାରୀ କରୋନା । ମୃତ୍ୟୁ ମାମଲାରେ ଆମେରିକା ପରେ ଦ୍ୱିତୀୟ ସ୍ଥାନରେ ରହିଛି ବ୍ରାଜିଲ୍ । ଯେତେବେଳେ କି ସଂକ୍ରମିତ ମାମଲାରେ ଆମେରିକା, ଭାରତ ପରେ ବ୍ରାଜିଲ୍ ତୃତୀୟ ସ୍ଥାନରେ ରହିଛି ।
ଋଷର କରୋନା ଭ୍ୟାକ୍ସିନ୍ ପାଇଁ ବ୍ରାଜିଲର ବହିୟା ରାଜ୍ୟ ଚୁକ୍ତିନାମା ସ୍ୱାକ୍ଷର କରିଛି । ଅନୁମାନ କରାଯାଉଛି ରାଷ୍ଟ୍ରୀୟ ସ୍ତରରେ ବ୍ରାଜିଲ୍ ଋଷ ଟିକାକୁ ଆପଣାଇବ । କେତେକ ଦେଶ Sputnik V ଭ୍ୟାକ୍ସିନ୍ ଉପରେ ଆଲୋଚନା କରିବା ପରେ ଋଷ ଦ୍ୱିତୀୟ ଥର ଦାବି କରିଥିଲା ଭ୍ୟାକ୍ସିନ୍ ସମ୍ପୂର୍ଣ୍ଣ ଭାବେ ସୁରକ୍ଷିତ ।
ଋଷର କହିବା ଅନୁଯାୟୀ, ଭ୍ୟାକ୍ସିନର ପ୍ରସ୍ତୁତି ନେଇ ପୂର୍ବରୁ ଭିତ୍ତିଭୂମି ଥିଲା । ଏଥିପାଇଁ ବହୁତ କମ୍ ସମୟ ମଧ୍ୟରେ ଭ୍ୟାକ୍ସିନ୍ ପ୍ରସ୍ତୁତିରେ ସଫଳତା ମିଳିଲା । ଏହା ପୂର୍ବରୁ ଋଷିୟାନ ଡାଇରେକ୍ଟ ଇନଭେଷ୍ଟମେଣ୍ଟ ଫଣ୍ଡ କହିଥିଲା ଆଶା ରହିଛି ଲ୍ୟାଟିନ୍ ଆମେରିକା ଅଞ୍ଚଳ ଭ୍ୟାକ୍ସିନର ୧୦ କୋଟି ଡୋଜ୍ ଗ୍ରହଣ କରିବ ।
Sputnik V ଲଞ୍ଚ ପରେ ବିଭିନ୍ନ ଦେଶ ଏବେ ଯାଏଁ ଭ୍ୟାକ୍ସିନର ଏକ ଅରବ ଡୋଜ୍ ଅର୍ଡର କରି ସାରିଲେଣି । ଅଗଷ୍ଟ ୧୧ରେ ଋଷ କରୋନା ଭ୍ୟାକ୍ସିନ୍ ଲଞ୍ଚ କରିଥିଲା । ସର୍ବସାଧାରଣଙ୍କ ପାଇଁ ଏହି ଭ୍ୟାକ୍ସିନ୍ ଜାନୁଆରୀ ୨୦୨୧ରୁ ଉପଲବ୍ଧ ହୋଇପାରେ ।
