ପ୍ରସୂତୀ ପଜିଟିଭ୍ ପରେ କ୍ୱାରେଣ୍ଟାଇନରେ ଡାକ୍ତରଙ୍କ ସହ ୬୦ ଜଣ, ୫ ନର୍ସିଂହୋମ୍ ସିଲ୍

ଢେଙ୍କାନାଳ: ସଂକ୍ରମଣ କାଳରେ ବଢ଼ିଲା ଚିନ୍ତା । ପ୍ରସୂତୀ କରୋନା ପଜିଟିଭ୍ ପରେ ସିଲ୍ ହେଲା ୫ ନର୍ସିଂହୋମ୍ । ଢେଙ୍କାନାଳରେ ଜଣ ପ୍ରସୂତୀ କଟକରେ କରୋନା ପଜିଟିଭ୍ ଚିହ୍ନଟ ହେବା ପରେ ଭୟ ଖେଳି ଯାଇଛି । ପ୍ରତିଷେଧକ ପଦକ୍ଷେପ ପ୍ରକାରେ ପ୍ରଶାସନ ୫ଟି ନର୍ସିଂହୋମକୁ ସିଲ୍ କରିଥିବା ବେଳେ ଡାକ୍ତର ଓ ଷ୍ଟାଫ ନର୍ସଙ୍କ ସମେତ ପ୍ରାୟ ୬୦ ଜଣଙ୍କୁ କ୍ୱାରେଣ୍ଟାଇନରେ ରଖାଯାଇଛି ।

ପ୍ରସବ ପାଇଁ ପ୍ରଥମେ ମହିଳା ଜଣଙ୍କୁ ଢେଙ୍କାନାଳର ଏକ ଘରୋଇ ନର୍ସିଂହୋମରେ ଭର୍ତ୍ତି କରାଯାଇଥିଲା । ସେଠାରେ ଉପଯୁକ୍ତ ଚିକିତ୍ସା ନମିଳିବାରୁ ସେ ଆଉ ୪ଟି ନର୍ସିଂହୋମ୍ ସହ ୨ ଅଲ୍ଟ୍ରାସାଉଣ୍ଡ କ୍ଲିନିକକୁ ଯାଇଥିଲେ । ଏଥିସହ ଗୋଟିଏ ମେଡିସିନ୍ ଷ୍ଟୋରକୁ ଯାଇଥିଲେ । ଶ୍ୱାସକ୍ରିୟାରେ ବାଧା ଉପୁଜିବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଥିଲା । ସେଠାରେ ପରୀକ୍ଷା ପରେ ତାଙ୍କ ନମୁନା ପଜିଟିଭ୍ ଆସିଛି ।

ପ୍ରସୂତୀ ପଜିଟିଭ୍ ଚିହ୍ନଟ ହେବା ପରେ ଜିଲ୍ଲା ପ୍ରଶାସନ ତୁରନ୍ତ ସତର୍କତା ମୂଳକ ପଦକ୍ଷେପ ନେଇଛି । ପ୍ରସୂତୀ ଯାଇଥିବା ୫ଟି ନର୍ସିଂହୋମକୁ ସିଲ୍ କରାଯାଇଛି । ଏଥିସହ ପ୍ରସୂତୀଙ୍କ ଚିକିତ୍ସା କରିଥିବା ଓ ସଂସ୍ପର୍ଶରେ ଆସିଥିବା ଷ୍ଟାଫ ନର୍ସ, ଡାକ୍ତର ଏମିତି ୬୦ ଜଣଙ୍କୁ କ୍ୱାରେଣ୍ଟାଇନରେ ରଖାଯାଇଥିବା ଜଣାପଡ଼ିଛି ।

(ଢେଙ୍କାନାଳରୁ ସତ୍ୟସ୍ୱରୂପ ଦାସ)