ବ୍ୟଙ୍କିଂ ସେକ୍ଟରରେ ବଦଳିବ ନିୟମ, ଏଣିକି ଟଙ୍କା ଉଠାଇଲେ ଦେବାକୁ ପଡ଼ିବ ଶୁଳ୍କ !

ନୂଆଦିଲ୍ଲୀ: ଅଗଷ୍ଟ ଆରମ୍ଭରୁ ବ୍ୟାଙ୍କିଂ କ୍ଷେତ୍ରରେ ବଦଳିଯିବ ସବୁ ନିୟମ । କରୋନା ମହାମାରୀ ସମୟରେ ବ୍ୟାଙ୍କିଂ ସେକ୍ଟରରେ ପୂର୍ବରୁ ଅନେକ ନିୟମ ବଦଳିଛି । କିଛି ଆର୍‌ବିଆଇ ଗାଇଡ୍‌ଲାଇନ୍‌ ଅନୁସାରେ ବଦଳିଥିବା ବେଳେ କିଛି ବ୍ୟାଙ୍କ ନିଜସ୍ୱ ନିୟମରେ ପରିବର୍ତ୍ତନ କରିଛନ୍ତି । ଏହାରି ମଧ୍ୟରେ ପୂର୍ବରୁ ଥରେ ଅନେକ ବ୍ୟାଙ୍କ ଟଙ୍କା ନେଣଦେଣ ନିୟମରେ ପରିବର୍ତ୍ତନ କରିସାରିଛନ୍ତି । ଏହି କ୍ରମରେ ଅଗଷ୍ଟ ୧ରୁ ଆଉ କିଛି ବ୍ୟାଙ୍କ ଏହି ଟଙ୍କା ନେଣଦେଣ ନିୟମରେ ପରିବର୍ତ୍ତନ ଆଣିବେ । ଆଉ ଧିରେ ଧିରେ ଅନ୍ୟ କିଛି ନିୟମରେ ମଧ୍ୟ ପରିବର୍ତ୍ତନ ହେବ ବୋଲି ସୂଚନା ମିଳିଛି ।

 ଆକ୍ସିସ୍ ବ୍ୟାଙ୍କ, ବ୍ୟାଙ୍କ ଅଫ୍ ମହାରାଷ୍ଟ୍ର, କୋଟାକ୍ ମହିନ୍ଦ୍ରା ବ୍ୟାଙ୍କ, ଆରବିଏଲ୍ ଆଦି ବ୍ୟାଙ୍କ ଟଙ୍କା କାରବାର ନିୟମରେ କିଛି ପରିବର୍ତ୍ତନ କରିବେ । ଏହି ବ୍ୟାଙ୍କଗୁଡିକ ମଧ୍ୟରୁ କେତେକ ନଗଦ ଟଙ୍କା ଉଠାଇବା ଏବଂ ଜମା କରିବା ପାଇଁ ଫି ଆଦାୟ ଓ ମିନିମମ୍ ବାଲାନ୍ସ ବୃଦ୍ଧି କରିବାକୁ ଯୋଜନା କରୁଛନ୍ତି ।

ଆକ୍ସିସ୍ ବ୍ୟାଙ୍କ ଗ୍ରାହକଙ୍କୁ ଇସିଏସ୍‌ କାରବାର ପାଇଁ ୨୫ ଟଙ୍କା ଦେବାକୁ ପଡ଼ିବ, ଯାହାକି ପୂର୍ବରୁ ମାଗଣାରେ ହେଉଥିଲା । ସେହିପରି କୋଟାକ୍ ମହିନ୍ଦ୍ରା ବ୍ୟାଙ୍କର ସଞ୍ଚୟ ଏବଂ କର୍ପୋରେଟ୍ ବେତନ ଆକାଉଣ୍ଟଧାରୀଙ୍କୁ ପ୍ରତି ମାସରେ ପାଞ୍ଚଟି ମାଗଣା କାରବାର ପରେ ପ୍ରତ୍ୟେକ ନଗଦ ଟଙ୍କା ପ୍ରତ୍ୟାହାର ଉପରେ ୨୦ ଟଙ୍କା ଡେବିଟ୍ କାର୍ଡ-ଏଟିଏମ୍ ଚାର୍ଜ ଦେବାକୁ ପଡିବ ।

ମେଟ୍ରୋ ଏବଂ ସହରାଞ୍ଚଳରେ ରହୁଥିବା ବ୍ୟାଙ୍କ ଅଫ୍ ମହାରାଷ୍ଟ୍ରର ସେଭିଂ ବ୍ୟାଙ୍କ୍‌ ଆକାଉଣ୍ଟଧାରୀଙ୍କୁ ମିନିମମ୍ ବାଲାନ୍ସ ୨୦୦୦ ରଖିବାକୁ ପଡ଼ିବ । ଏଥିରୁ କମ୍ ହେଲେ ୭୫ ଟଙ୍କା ଜରିମାନା ଲାଗିବ ବୋଲି ଜଣାପଡିଛି ।