୧୩ ବର୍ଷ ବୟସରେ ୪୧ ବର୍ଷ ପୁରୁଷକୁ ବିବାହ କରିଥିଲେ, ବିବାଦୀୟ ରହିଥିଲେ ସରୋଜ ଖାନଙ୍କ ଜୀବନ

ନିଜ ନୃତ୍ୟ ପାଇଁ ଜଣାଶୁଣା ବଲିଉଡର କୋରିଓଗ୍ରାଫର ସରୋଜ ଖାନ ଜୁଲାଇ ୩, ଶୁକ୍ରବାର ଦିନ ଆମ ସମସ୍ତଙ୍କୁ ବିଦାୟ ଦେଇ ଚାଲିଯାଇଛନ୍ତି ଆର ପାରିକୁ । ସରୋଜ ବଲିଉଡ ଚଳଚ୍ଚିତ୍ରରେ ତାଙ୍କର ଜବରଦସ୍ତ ନୃତ୍ୟ କୋରିଓଗ୍ରାଫି ପାଇଁ ଜଣାଶୁଣା । ସେ ମାଧୁରୀ ଦୀକ୍ଷିତ ଏବଂ ଶ୍ରୀଦେବୀଙ୍କ ସହ ଅଧିକ କାମ କରିଥିଲେ ।

ସରୋଜ ଖାନଙ୍କ ବୃତ୍ତିଗତ ଜୀବନ ଯେତିକି ସଫଳ ଥିଲା ତାଙ୍କ ବ୍ୟକ୍ତିଗତ ଜୀବନ କିନ୍ତୁ ବିବାଦ ପୂର୍ଣ୍ଣ ରହିଥିଲା । ସରୋଜ ଖାନ ମାତ୍ର ୧୩ ବର୍ଷ ବୟସରେ ବିବାହ କରିଥିଲେ । ସେ ଏତେ କମ ବୟସରେ ୪୧ ବର୍ଷୀୟ ନୃତ୍ୟ ନିର୍ଦ୍ଦେଶକ ବି. ସୋହନଲାଲଙ୍କୁ ବିବାହ କରିଥିଲେ । ସୋହନଲାଲ ସେତେବେଳେ ପୂର୍ବୂରୁ ବିବାହିତ ଥିଲେ ଏବଂ ତାଙ୍କର ୪ଟି ସନ୍ତାନ ମଧ୍ୟ ଥିଲେ । ଯଦିଓ ସରୋଜ ଏହା ଜାଣି ନଥିଲେ ।

ସୋହନଲାଲ ବଲିଉଡ ଫିଲ୍ମରେ ନୃତ୍ୟ ନିର୍ଦ୍ଦେଶକ ଥିଲେ । ସେ ସରୋଜଙ୍କୁ ନୃତ୍ୟର ପ୍ରାଥମିକ ଶିକ୍ଷା ଦେଇଥିଲେ । ସରୋଜ ତାଙ୍କଠାରୁ କଥକ, କଥକଲି, ମଣିପୁରୀ, ଭାରତନାଟ୍ୟମ୍ ଶିଖିଥିଲେ । ୧୪ ବର୍ଷ ବୟସରେ ସରୋଜ ତାଙ୍କ ପ୍ରଥମ ପୁଅ ରାଜୁ ଖାନଙ୍କୁ ଜନ୍ମ ଦେଇଥିଲେ । ଦୁଇ ବର୍ଷ ପରେ, ସେ ଏକ ଝିଅକୁ ଜନ୍ମ ଦେଲେ ଯିଏ ଆଠ ମାସରୁ ଅଧିକ ବଞ୍ଚି ପାରିନଥିଲେ । ଏହା ପରେ ସୋହନଲାଲ ସେମାନଙ୍କ ପିଲାମାନଙ୍କର ନାମ ଦେବାକୁ ମନା କରିଦେଲେ ଏବଂ ଅଲଗା ହେବାକୁ ଦାବି କରିଥିଲେ ।

ଅଲଗା ହେବାର କିଛି ସମୟ ପରେ ସୋହନଲାଲ ସରୋଜଙ୍କୁ ପୁଣିଥରେ ତାଙ୍କର ସହକାରୀ ହେବାକୁ ପ୍ରସ୍ତାବ ଦେଇଥିଲେ । ସରୋଜ ଏହି ପ୍ରସ୍ତାବରେ ରାଜି ନହେବାରୁସେ ସରୋଜଙ୍କ ବିରୋଧରେ ସିନେ ଡାନ୍ସର୍ସ ଆସୋସିଏସନରେ ମାମଲା ଦାୟର କରିଥିଲେ। ସରୋଜ ଏଥିରେ ହାରିଯିବାରୁ ତାଙ୍କୁ ଚାକିରିରୁ ଇସ୍ତଫା ଦେବାକୁ ପଡିଲା ଏବଂ ସେ ସୋହନଲାଲଙ୍କ ସହ କାମ କରିବା ଆରମ୍ଭ କଲେ ।

ସରୋଜ ପୁଣିଥରେ ମାଆ ହେଲେ ଏବଂ ଏଥର ତାଙ୍କର ଏକ ଝିଅ ଜନ୍ମ ହେଲା । କିନ୍ତୁ ଏଥର ସୋହାନଲାଲ ତାଙ୍କୁ ସବୁଦିନ ପାଇଁ ଛାଡି ଚେନ୍ନାଇ (ତତ୍କାଳୀନ ମାଡ୍ରାସ) କୁ ଚାଲିଗଲେ । ପରେ ସରୋଜ ବ୍ୟବସାୟୀ ସର୍ଦ୍ଦାର ରୋଶନ ଖାନଙ୍କୁ ଭେଟିଥିଲେ । ରୋଶନ ମଧ୍ୟ ବିବାହିତ ଏବଂ ତାଙ୍କର ଦୁଇଟି ସନ୍ତାନ ଥିଲେ, କିନ୍ତୁ ସେ ସରୋଜଙ୍କୁ ବହୁତ ଭଲ ପାଉଥିଲେ ।

ରୋଶନ ଖାନ ସରୋଜଙ୍କୁ ବିବାହ କରିଥିଲେ ଏବଂ ତାଙ୍କ ପିଲାମାନଙ୍କୁ ମଧ୍ୟ ତାଙ୍କ ନାମ ଦେଇଥିଲେ । ଏକ ସାକ୍ଷାତକାରରେ ସରୋଜ କହିଥିଲେ ଯେ ସେ ଏବଂ ତାଙ୍କ ସଉତୁଣୀ ତଥା ରୋଶନଙ୍କ ପ୍ରଥମ ସ୍ତ୍ରୀ ଦୁଇ ଭଉଣୀ ପରି ରୁହନ୍ତି ।

ସରୋଜ ବଲିଉଡରେ ନାମ କମାଇବା ପାଇଁ କଠିନ ପରିଶ୍ରମ କରିଥିଲେ । ମିଷ୍ଟର ଇଣ୍ଡିଆ ଚଳଚ୍ଚିତ୍ରରେ ଶ୍ରୀଦେବୀଙ୍କ ଗୀତ  ହାୱା ହାୱାଇ କୋରିଓଗ୍ରାଫି କରି ସେ ସ୍ୱୀକୃତି ଲାଭ କରିଥିଲେ । ଏହା ପରେ ସେ ଶ୍ରୀଦେବୀଙ୍କ ସହ ନଗିନା ଏବଂ ଚାନ୍ଦନୀ ଭଳି ଚଳଚ୍ଚିତ୍ରରେ କାମ କରିଥିଲେ ।

ପରେ ସେ ମାଧୁରୀ ଦୀକ୍ଷିତଙ୍କୁ ଭେଟିଥିଲେ ଏବଂ ଗୋଟିଏରୁ ତିନୋଟି ଗୀତକୁ କୋରିଓଗ୍ରାଫ୍ କରିଥିଲେ । ତାଙ୍କର ୪୦ବର୍ଷ କ୍ୟାରିଅରରେ ସରୋଜ ଖାନ ଦୁଇ ହଜାରରୁ ଅଧିକ ଗୀତ କୋରିଓଗ୍ରାଫି କରିଥିଲେ । ତାଙ୍କର ଶାସ୍ତ୍ରୀୟ ନୃତ୍ୟର ଚର୍ଚ୍ଚା କେବଳ ବଲିଉଡରେ ନୁହେଁ ବିଦେଶରେ ମଧ୍ୟ ହୋଇଥିଲା । ସେ ଜୁହି ଚାୱଲା, ଐଶ୍ୱର୍ଯ୍ୟା ରାୟ ବଚ୍ଚନ ଏବଂ ଅନ୍ୟାନ୍ୟ ବଲିଉଡ ଅଭିନେତ୍ରୀଙ୍କ ସମେତ ମାଧୁରୀ ଦୀକ୍ଷିତ ଏବଂ ଶ୍ରୀଦେବୀଙ୍କୁ ନୃତ୍ୟରେ ମାହିର କରାଇଥିଲେ ।

ଜବ୍ ୱି ମେଟ୍, ଗୁରୁ, ତାମିଲ୍ ଚଳଚ୍ଚିତ୍ର ଶୃଙ୍ଗାରମ, ଲଗାନ୍, ହମ୍ ଦିଲ୍ ଦେ ଚୁକେ ସନମ୍, ଦେବଦାସ ଭଳି ଚଳଚିତ୍ରରେ ସରୋଜ ଖାନଙ୍କ କୋରିଓଗ୍ରାଫିକୁ ଜାତୀୟ ପୁରସ୍କାର ମଧ୍ୟ ମିଳିଛି । ଏକ ସମୟରେ ସେ ଟିଭିରେ ନିଜର ଏକ ଡ୍ୟାନ୍ସ ସୋ’ କରିଥିଲେ, ଯେଉଁଥିରେ ସେ ଦର୍ଶକଙ୍କୁ ଚଳଚ୍ଚିତ୍ରର ଗୀତରେ ନାଚିବାକୁ ଶିଖାଉଥିଲେ । ବଲିଉଡରେ ତାଙ୍କୁ ସ୍ନେହପୂର୍ଣ୍ଣ ଭାବରେ ମାଷ୍ଟର ଜୀ କୁହାଯାଉଥିଲା ।

ତେବେ ଜଣାଇ ରଖୁଛୁ ଯେ, ଚଳଚ୍ଚିତ୍ର ଜଗତର ଏକ ପ୍ରମୁଖ ଅଂଶ ଥିବା ସରୋଜ ଖାନ, ଜୁଲାଇ ୩ ଶୁକ୍ରବାର ଦିନ ଦୁନିଆକୁ ବିଦାୟ ଦେଇଛନ୍ତି । ୭୧ ବର୍ଷ ବୟସରେ ହୃଦ୍‌ଘାତ ଯୋଗୁଁ ତାଙ୍କର ମୃତ୍ୟୁ ହୋଇଛି । ସରୋଜ ଗତ କିଛି ଦିନ ହେବ ଅସୁସ୍ଥ ଥିଲେ । ଅସୁସ୍ଥତା ହେତୁ ତାଙ୍କୁ କିଛି ଦିନ ପୂର୍ବରୁ ବାନ୍ଦ୍ରା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ବିଳମ୍ବିତ ରାତିରେ ତାଙ୍କ ସ୍ୱାସ୍ଥ୍ୟ ଅବସ୍ଥା ବିଗିଡି ଯାଇ ଶୁକ୍ରବାର ଦିନ ତାଙ୍କର ମୃତ୍ୟୁ ଘଟିଛି । ଡାକ୍ତରଖାନାରେ ଭର୍ତ୍ତି ହେବା ପୂର୍ବରୁ ତାଙ୍କୁ କୋଭିଡ ପରୀକ୍ଷା ଦିଆଯାଇଥିଲା, ଯାହା ନେଗେଟିଭ ଆସିଥିଲା ।

ସରୋଜଙ୍କ ବିୟୋଗ ପରେ ବଲିଉଡରେ ଶୋକର ଲହରୀ ଖେଳିଯାଇଛି। ଅକ୍ଷୟ କୁମାର, ମାଧୁରୀ ଦୀକ୍ଷିତ, ରେମୋ ଡି’ସୁଜା ଏବଂ ଅନେକ ସେଲିବ୍ରେଟି ତାଙ୍କ ବିୟୋଗରେ ଦୁଃଖ ପ୍ରକାଶ କରିଛନ୍ତି ।