ଜୁଲାଇ କିମ୍ୱା ଅଗଷ୍ଟରେ ସଂକ୍ରମିତଙ୍କ ସଂଖ୍ୟା ଶୀର୍ଷରେ ପହଞ୍ଚିବ: ‘ଚଳିତ ବର୍ଷ ଆସିବନି ଟିକା’
ନୂଆଦିଲ୍ଲୀ: ସମ୍ପ୍ରତି ଦେଶରେ କରୋନା ସଂକ୍ରମଣ ମାମଲା କମ୍ ହେବା ଆଶା କ୍ଷୀଣ । ଭାରତରେ ସଂକ୍ରମିତଙ୍କ ସଂଖ୍ୟା ପାଖାପାଖି ୩ ଲକ୍ଷରେ ପହଞ୍ଚିସାରିଥିବା ବେଳେ ଆଗାମୀ ଦିନରେ ଏହା ଅଧିକ ଗୁରୁତର ରୂପ ନେବାର ଆଶଙ୍କା କରାଯାଉଛି । ବିଶେଷଜ୍ଞଙ୍କ କହିବାନୁଯାୟୀ ଜୁଲାଇର ମଧ୍ୟ ଭାଗ ଓ ଅଗଷ୍ଟ ଆରମ୍ଭରେ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ଶୀର୍ଷରେ ପହଞ୍ଚିବ ।
ତେବେ ଚିନ୍ତାର ବିଷୟ ଏହା ଯେ, କିଛି ରାଜ୍ୟରେ ଏବେଠୁ ହିଁ ସ୍ୱାସ୍ଥ୍ୟ ବ୍ୟବସ୍ଥା କରୋନା ମୁକାବିଲା ଦିଗରେ ଅସମର୍ଥ ହେଲାଣି । ଦିଲ୍ଲୀର ସର ଗଙ୍ଗାରାମ୍ ହସ୍ପିଟାଲରର ଭାଇସ୍ ଚେୟାରମ୍ୟାନ୍ ଡ. ଏସ୍ପି ବାୟେତ୍ତ୍ରାଙ୍କ କହିବାନୁଯାୟୀ କରୋନାର ଗ୍ରାଫ ବର୍ତ୍ତମାନ ସମୟରେ ସମତୁଳ ହେଲା ଭଳି ଲାଗୁନାହିଁ । ଏହା ଊର୍ଦ୍ଧ୍ୱମୁଖୀ ହିଁ ରହିବ । ଜୁଲାଇ ମଧ୍ୟ ଏବଂ ଅଗଷ୍ଟରେ ଦେଶରେ କରୋନା ମାମଲା ଶୀର୍ଷରେ ପହଞ୍ଚିବ । ଏଥିସହିତ ଆସନ୍ତା ବର୍ଷର ପ୍ରଥମାର୍ଦ୍ଧରେ ଟିକା ପ୍ରସ୍ତୁତ ହୋଇପାରିବ ।
ଦୈନିକ ୧୦ ହଜାର ମାମଲା
ବର୍ତ୍ତମାନ ଦେଶରେ ଦୈନିକ ୧୦ ହଜାର ମାମଲା ସାମ୍ନାକୁ ଆସୁଛି । ସ୍ୱାସ୍ଥ୍ୟ ମନ୍ତ୍ରାଳୟର ସୂଚନା ମୁତାବକ ଶୁକ୍ରବାର ସକାଳ ୮ଟା ସୁଦ୍ଧା ଦେଶରେ ବିଗତ ୨୪ ଘଣ୍ଟା ମଧ୍ୟରେ କରୋନାର ୧୦ ହଜାର ୯୫୬ ନୂଆ ମାମଲା ସାମ୍ନାକୁ ଆସିଛି । ଦେଶରେ କରୋନା ସଂକ୍ରମିତଙ୍କ ମୋଟ ସଂଖ୍ୟା ୨ଲକ୍ଷ ୯୭ ହଜାର ୫୩୫ରୁ ଊର୍ଦ୍ଧ୍ୱ ରହିଛି । ଏଯାବତ୍ କରୋନାରେ ଦେଶରେ ମୋଟ ୮ହଜାର ୪୯୮ ଜଣଙ୍କ ମୃତ୍ୟୁ ହୋଇଛି । ତେବେ ଭାରତ କରୋନା ପ୍ରଭାବିତଙ୍କ ତାଲିକାର ୪ର୍ଥ ସ୍ଥାନରେ ପହଞ୍ଚିବ
ଭୁଶିଡିବାରେ ଲାଗିଛି ସ୍ୱାସ୍ଥ୍ୟ ବ୍ୟବସ୍ଥା
ଦିଲ୍ଲୀରେ ଦେଖାଦେଇଥିବା ସଂକ୍ରମିତଙ୍କ ସଂଖ୍ୟା ବଢ଼ିବା ଯୋଗୁଁ ସେଠାକାର ହସ୍ପିଟାଲ ଭର୍ତ୍ତି ହେବାରେ ଲାଗିଲାଣି । ଏଣୁ ମାନ୍ୟବର ସୁପ୍ରିମକୋର୍ଟ କରୋନା ରୋଗୀଙ୍କ ସଂଖ୍ୟା ଦିଲ୍ଲୀରେ ପଶୁ ଭଳି ହୋଇଥିବା ଦର୍ଶାଇଛନ୍ତି । ହସ୍ପିଟାଲରେ ବେଡ୍ ନାହିଁ । ରୋଗୀମାନେ ଯେଉଁଠି ଯେଉଁଠି ଭର୍ତ୍ତି ହୋଇଛନ୍ତି, ସେହି ଜାଗାମାନଙ୍କରେ କରୋନା ଟେଷ୍ଟର ରିପୋର୍ଟ ଉପରେ ପ୍ରଶ୍ନ ଉଠୁଛି । କିଛି ହସ୍ପିଟାଲ ଉପରେ ରାଜନୈତିକ କାରଣରୁ ଆରୋପ ଲାଗୁଛି ତ କିଛି ସ୍ଥାନରେ ମୃତ୍ୟୁ ସଂଖ୍ୟାକୁ ନେଇ ମଧ୍ୟ ପ୍ରଶ୍ନ ଉଠୁଛି । ସମ୍ପ୍ରତି ପରିସ୍ଥିତିଠାରୁ ସ୍ଥିତି ଅଧିକ ଗୁରୁତର ହେବାକୁ ଥିବା ବେଳେ ସ୍ଥିତି କ’ଣ ହେବ ସେ ନେଇ ସମସ୍ତ ଚିନ୍ତାରେ ।
