ନନ୍ଦିଘୋଷ ବ୍ୟୁରୋ: ସଂସଦର ସ୍ବତନ୍ତ୍ର ଅଧିବେଶନକୁ ନେଇ ଏବେ ଏକ ବଡ ଖବର ସାମ୍ନାକୁ ଆସିଛି । ଚଳିତ ମାସରେ ସଂସଦର ଏକ ସ୍ବତନ୍ତ୍ର ଅଧିବେଶନ ଡକାଯାଇପାରେ ବୋଲି ଶୁଣିବାକୁ ମିଳୁଛି । ସୀମା ନିର୍ଦ୍ଧାରଣ ଏବଂ ମହିଳା ସଂରକ୍ଷଣ ସହିତ ଜଡିତ ସାମ୍ବିଧାନିକ ସଂସୋଧନ ବିଲ୍ ପାସ୍ କରିବା ପାଇଁ ସରକାର ଏହି ଅଧିବେଶନ ଡାକିବାକୁ ଯୋଜନା କରିଛନ୍ତି କିନ୍ତୁ, ଏପର୍ଯ୍ୟନ୍ତ ମୌସୁମୀ ଅଧିବେଶନକୁ ସ୍ଥଗିତ ରଖିନାହାନ୍ତି ।
ଏହି ଗୁରୁତ୍ବପୂର୍ଣ୍ଣ ବିଲ୍ ପାସ୍ କରିବା ପାଇଁ ଶାସକ ଦଳ ପାଖରେ ଆବଶ୍ୟକ ସଂଖ୍ୟା ଥିବା ବିଶେଷ ସୂତ୍ରରୁ ଜଣାଡିଛି । ତଥାପି ସୀମା ନିର୍ଦ୍ଧାରଣ ଏବଂ ମହିଳା ସଂରକ୍ଷଣ ପ୍ରସଙ୍ଗରେ ବ୍ୟାପକ ରାଜନୈତିକ ସହମତି ହାସଲ କରିବାକୁ କଳେ ବଳେ କୌଶଳେ ଚେଷ୍ଟା ଚଲାଇଛି ଶାସକ ଦଳ । କେବଳ କିଛି ସହଯୋଗୀ ଦଳ ନୁହେଁ ବରଂ ଅନ୍ୟ ଛୋଟ ଛୋଟ ବିରୋଧୀ ଦଳଗୁଡିକ ସହିତ ମଧ୍ୟ ସରକାର ଆଲୋଚନା କରୁଛନ୍ତି । ଲୋକସଭାରେ ଆବଶ୍ୟକ ଦୁଇ-ତୃତୀୟାଂଶ ବହୁମତ ହାସଲ କରିବାରେ ବିଫଳ ହେବାର ମାସକ ପରେ ଏବେ ବିଲ୍ ଗୁଡିକୁ ସଂସଦକୁ ଫେରାଇ ଆଣିବାକୁ ପୂର୍ବ ଅପେକ୍ଷା ବ୍ୟାପକ ରାଜନୈତିକ ସମର୍ଥନ ସୃଷ୍ଟି କରିବାକୁ ଚେଷ୍ଟା କରୁଛି ଶାସକ ବିଜେପି । ପୂର୍ବରୁ ସୀମା ନିର୍ଦ୍ଧାରଣ ଉପରେ ଅନେକ ଦଳ ଯେଉଁ ପ୍ରତିରୋଧ ପ୍ରକାଶ କରିଥିଲେ, ବିଶେଷକରି ଜନସଂଖ୍ୟା ଆଧାରିତ ଆସନ ପୁନଃବଣ୍ଟନ ଦକ୍ଷିଣ ରାଜ୍ୟଗୁଡିକର ରାଜେନୖତିକ ପ୍ରତିନିଧିତ୍ବକୁ ପ୍ରଭାବିତ କରିପାରେ ବୋଲି ଆଶଙ୍କା ବଢିଛି ।
ଯେହେତୁ କେନ୍ଦ୍ର ସରକାର ଏପର୍ଯ୍ୟନ୍ତ ସଂସଦର ମୌସୁମୀ ଅଧିବେଶନକୁ ଆନୁଷ୍ଠାନିକ ଭାବରେ ସ୍ଥଗିତ ରଖି ନାହାନ୍ତି, ତେଣୁ ଏହି ସମ୍ଭାବନା ଏବେ ଅଧିକ ଦୃଢୀଭୂତ ହୋଇଯାଇଛି । ସଂସଦୀୟ ପ୍ରକ୍ରିୟାର ବିଶେଷଜ୍ଞମାନେ ଏହାକୁ ଏକ ସମ୍ଭାବ୍ୟ ସ୍ବତନ୍ତ୍ର ଅଧିବେଶନ ପାଇଁ ପ୍ରସ୍ତୁତିର ସଙ୍କେତ ଭାବରେ ଦେଖୁଛନ୍ତି । ସୂଚନା ଅନୁସାରେ, ଅକ୍ଟୋବର ୨୬-୨୭ ତାରିଖରେ ସମ୍ବିଧାନ ସଦନରେ ଆୟୋଜିତ ହେବାକୁ ଥିବା ଦ୍ବାଦଶ ବ୍ରିକ୍ସ ସଂସଦୀୟ ଫୋରମକୁ ଦୃଷ୍ଟିରେ ରଖି ସଂସଦର ଏହି ସ୍ବତନ୍ତ୍ର ଅଧିବେଶନର ତାରିଖ ନିର୍ଣ୍ଣୟ କରାଯାଇପାରେ । ତେବେ ଯଦି ସ୍ବତନ୍ତ୍ର ଅଧିବେଶନ ଡାକିବା ପାଇଁ ନିଷ୍ପତ୍ତି ନିଆଯାଏ, ତାହା ହେଲେ ସାଂସଦମାନଙ୍କୁ ପ୍ରାୟ ଗୋଟିଏ ସପ୍ତାହ ପୂର୍ବରୁ ନୋଟିସ ଜାରି କରାଯାଇପାରେ ।
