ରକ୍ତ ସମ୍ପର୍କରେ ରକ୍ତ ଛିଟା : ପୁଅକୁ ଶାବଳରେ ପିଟି ପିଟି ହତ୍ୟାକଲା ବାପା

ନବରଙ୍ଗପୁର: ରକ୍ତ ସମ୍ପର୍କରେ ରକ୍ତ ଛିଟା। ନୃଂଶସ ବାପାର ଅମାନୁଷିକ କାଣ୍ଡ। ପୁଅକୁ ନିର୍ମମ ଭାବେ ହତ୍ୟା କଲା ବାପା । ନବରଙ୍ଗପୁର ରାଇଘର କୁମୁଲିରେ ଜମିଜମାକୁ ନେଇ ବାପ ପୁଅ ମଧ୍ୟରେ ବିବାଦ ଦେଖିବାକୁ ମିଲିଥିଲା। ଉତ୍ତ୍ୟକ୍ତ ହୋଇ ବାପା ପୁଅକୁ ଶାବଳ ଓ କୁରାଢୀରେ ପିଟିପିଟି ହତ୍ୟା କରିଥିବା ଅଭିଯୋଗ ହୋଇଛି । ରାଇଘର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛନ୍ତି।

ହତ୍ୟାକାରୀ ବାପା ଥାନାରେ ଆତ୍ମସମର୍ପଣ କରିଛି । ଦୀର୍ଘ ଦିନ ଧରି ଜମି ଭାଗବଣ୍ଟାକୁ ନେଇ ଅମଲ ବସୁ ଓ ପୁଅ ଅସିତ ବସୁଙ୍କ ମଧ୍ୟରେ ବିବାଦ ଥିଲା । ଗତକାଲି ବିଳମ୍ବିତ ରାତିରେ ଦୁହିଁଙ୍କ ମଧ୍ୟରେ ଗଣ୍ଡଗୋଳ ପରିସ୍ଥିତି ସୃଷ୍ଟି ହୋଇଥିଲା। ରାଗିଯାଇ ଅମଲ  ପୁଅ ଅସିତକୁ ଶାବଳ କୁରାଢୀରେ ପିଟିପିଟି ମାରିଦେଇଥିଲେ। ଘଟଣାସ୍ଥଳରେ ପୁଅର ମୃତ୍ୟୁ ପରେ ଅସିତଙ୍କ ଭାଇ ଥାନାରେ ଏତଲା ଦେଇଥିଲେ। ପୋଲିସ ମୃତଦେହ ଉଦ୍ଧାର କରିଥିବା ବେଳେ ପୋଲିସ ପାଖରେ ଆତ୍ମସମର୍ପଣ କରିଛି ଅମଲ। ପୂର୍ବରୁ ସ୍ତ୍ରୀକୁ ହତ୍ୟା ଅଭିଯୋଗରେ ଜେଲରେ ସଜା କାଟି ସାରିଛନ୍ତି ଅମଲ।