ସରକାରୀ କର୍ମଚାରୀଙ୍କ ପାଇଁ ନୂଆ ନିର୍ଦ୍ଦେଶନାମା: ପଢ଼ନ୍ତୁ କେଉଁ ବିଭାଗର କର୍ମଚାରୀ କାର୍ଯ୍ୟରେ ଯୋଗଦେବେ

ଭୁବନେଶ୍ୱର: ସରକାରୀ କର୍ମଚାରୀମାନେ ଅଫିସ ଆସିବା ନେଇ ପୁଣି ଥରେ ନୂଆ ନିର୍ଦ୍ଦେଶନାମା ଜାରି କରିଛନ୍ତି ରାଜ୍ୟ ସରକାର । ଜାରି ହୋଇଥିବା ଲକଡାଉନ କଟକଣା ଆସନ୍ତା ସୋମବାରରୁ କୋହଳ ହେବାକୁ ଥିବାବେଳେ ସରକାରୀ କର୍ମଚାରୀଙ୍କ ପାଇଁ ଏହି ନୂଆ ନିର୍ଦ୍ଦେଶନାମା ଜାରି କରାଯାଇଛି । ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି ହୋଇଥିବା ନୂତନ ମାର୍ଗଦର୍ଶିକା ଆସନ୍ତା ୪ ତାରିଖ ଠାରୁ କାର୍ଯ୍ୟକାରୀ ହେବ । ରାଜ୍ୟ ସରକାରଙ୍କ ଜରୁରୀ ତାଲିକାରେ ଥିବା ୧୫ଟି ବିଭାଗର ୫୦ ପ୍ରତିଶତ କର୍ମଚାରୀ ରୋଷ୍ଟର ଭିତ୍ତିରେ ଆସି କାର୍ଯ୍ୟ କରିବେ । ଏହିସବୁ ବିଭାଗ ଗୁଡିକ ମଧ୍ୟରେ ରହିଛି କୃଷି ଓ କୃଷକ କଲ୍ୟାଣ ବିଭାଗ, ବାଣିଜ୍ୟ ଓ ପରିବହନ , ସମବାୟ, ଅବକାରୀ, ମତ୍ସ୍ୟ ଓ ପଶୁ ସମ୍ପଦ ବିଭାଗ , ଅର୍ଥ , ଖାଦ୍ୟ ଯ଼ୋଗାଣ ଓ ଖାଉଟି କଲ୍ୟାଣ ବିଭାଗ , ସାଧାରଣ ପ୍ରଶାସନ ଓ ପେନସନ ଅଭିଯ଼ୋଗ , ଗୃହ ଓ ନଗର ଉନ୍ନୟନ, ସ୍ୱାସ୍ଥ୍ୟ ଓ ପରିବାର କଲ୍ୟାଣ , ଗୃହ, ଶ୍ରମ ଓ ଇଏସଆଇ , ପଞ୍ଚାୟତିରାଜ ଓ ପାନୀୟ ଜଳ, ରାଜସ୍ୱ ଓ ବିପର୍ଯ୍ୟୟ ପ୍ରଶମନ ଏବଂ ଇସ୍ପାତ ଓ ଖଣି ବିଭାଗ । ଏହି ୧୫ଟି ଜରୁରୀ ବିଭାଗକୁ ବାଦ ଦେଲେ ଅନ୍ୟ ସମସ୍ତ ବିଭାଗ ସାମାନ୍ୟ ଜରୁରୀ ବିଭାଗ ତାଲିକାରେ ରଖାଯାଇଛି । ଏହିସବୁ ବିଭାଗର ୩୦ପ୍ରତିଶତ କର୍ମଚାରୀ ରୋଷ୍ଟର ଭିତ୍ତିରେ ଅଫିସ ଆସିବେ । ସାମନ୍ୟ ଜରୁରୀ ବର୍ଗରେ ଥିବା ଆଞ୍ଚଳିକ କାର୍ଯ୍ୟାଳୟର କର୍ମଚାରୀମାନେ କେନ୍ଦ୍ର ସରକାରଙ୍କ ଗାଇଡଲାଇନ ଅନୁଯାୟୀ କାର୍ଯ୍ୟ କରିବା ଲାଗି ସମ୍ପୃକ୍ତ ବିଭାଗର ପ୍ରଶାସନିକ ଅଧିକାରୀମାନେ ନିଷ୍ପତ୍ତି ଗ୍ରହଣ କରିବେ । ଯେଉଁ ଅଧିକାରୀ ଓ କର୍ମଚାରୀମାନେ ଅଫିସ ନଆସିବେ ସେମାନେ ଘରେ ରହି କାମ କରିବାକୁ କୁହାଯାଇଛି ।