ନନ୍ଦିଘୋଷ ବ୍ୟୁରୋ : ପାରାଦୀପରେ ମାଫିଆ ରାଜ୍ । ଚାଲିଛି ବେଧଡ଼କ ଚୋରା କାରବାର। ମୂଲ୍ୟବାନ ଖଣିଜ ସମ୍ପଦ ସହ ପେଟ୍ କୋକର ହେଉଛି ଚୋରାଚାଲାଣ। ନୀରବଦ୍ରଷ୍ଟା ସାଜିଛି ପୋଲିସ। ଆଇଓସିଏଲକୁ ଆସୁଥିବା କୃଡ୍ ଅଏଲକୁ ବିଶୋଧନ କରିବା ପରେ ସେଥିରୁ ପେଟ୍ କୋକ୍ ବାହାରିଥାଏ। ଏହି ପେଟ୍ କୋକ ଗୁଡିକୁ ରାଜ୍ୟ ତଥା ରାଜ୍ୟ ବାହାରର ବିଭିନ୍ନ କାରଖାନାକୁ ପଠାଯାଇଥାଏ। କମ୍ପାନୀ ଗୁଡ଼ିକ ମୁଖ୍ୟତଃ ଜାଳେଣି ଭାବେ ଏହାକୁ ବ୍ୟବହାର କରିଥାନ୍ତି। ପେଟ୍ କୋକ୍ ଗୁଡ଼ିକର ମୂଲ୍ୟ ଅଧିକ ଥିବାରୁ ଏବେ ଏହା ଉପରେ ମାଫିଆଙ୍କ ଲୋଲୁପ ଦୃଷ୍ଟି ପଡ଼ିଛି। ପେଟ୍ କୋକ୍ ବୋଝେଇ ଟ୍ରକରୁ ମୁଲ୍ୟବାନ ପେଟ୍ କୋକଗୁଡ଼ିକୁ ଖାଲି କରୁଛନ୍ତି ମାଫିଆ। ସେଗୁଡ଼ିକୁ ବାହାର ରାଜ୍ୟରେ ବିକି ମୋଟା ଅଙ୍କର ମୁନାଫା କମାଉଛନ୍ତି। କିଛି ଦିନ ତଳେ ଲକ୍ ଥାନା ନିମିଢିହି ଗାଁରୁ ୪୦ କ୍ଵିଣ୍ଟାଲରୁ ଉର୍ଦ୍ଧ୍ୱ ପେଟ୍ କୋକ୍ ଜବତ ହୋଇଥିଲା। ସେହିପରି ଅଭୟଚାନ୍ଦପୁର ଥାନା ରଙ୍ଗିଆଗଡ଼ ମଠସାହି ନିକଟରୁ ମଧ୍ୟ ପ୍ରାୟ ୬୫ ହଜାର କିଲୋ ପେଟ୍ କୋକ୍ ଜବତ କରାଯାଇଛି।
ପାରାଦୀପରେ କେବଳ ପେଟ୍ କୋକ୍ ନୁହେଁ ଲୁହାପଥର, କ୍ରୋମାଇଟ, ମାଙ୍ଗାନିଜ, କୋଇଲା ଆଦି ଖଣିଜ ସାମଗ୍ରୀର ମଧ୍ୟ ବ୍ୟାପକ ଚୋରାଚାଲାଣ ହେଉଥିବା ଅଭିଯୋଗ ହୋଇଛି। ଚୋରା ଚାଲାଣ ସମୟରେ ପୋଲିସ ମୂଲ୍ୟବାନ ଖଣିଜ ସମ୍ପଦ ଜବତ କରିବାରେ ସଫଳ ହେଉଛି, ହେଲେ ମାଷ୍ଟରମାଇଣ୍ଡ ନିକଟରେ ପହଞ୍ଚି ପାରୁନାହିଁ। କେବଳ ଚୋରାଚାଲାଣ ପାଇଁ ବ୍ୟବହୃତ ଗାଡ଼ି ଜବତ କରିବା ସହ ଡ୍ରାଇଭରକୁ କୋର୍ଟ ଚାଲାଣ କରି ପୋଲିସ ନିଜ କର୍ତ୍ତବ୍ୟ ସାରି ଦେଉଥିବା ଅଭିଯୋଗ ହୋଇଛି। ପ୍ରଛଦପଟରେ ପ୍ରଭାବଶାଳୀ ବ୍ୟକ୍ତିଙ୍କ ହାତ ଥିବାରୁ ଅପରାଧି ଅତି ସହଜରେ ଖସି ବେଧଡ଼କ ଚୋରା କାରବାରରେ ଲିପ୍ତ ରହୁଥିବା ସ୍ଥାନୀୟ ଲୋକେ କହିଛନ୍ତି।

