ନନ୍ଦିଘୋଷ ବ୍ୟୁରୋ: ୟୁକ୍ରେନ ଉପରେ ରୁଷିଆର ପୁଣି ବଡ଼ଧରଣର ଆକ୍ରମଣ। କେନ୍ଦ୍ରୀୟ ୟୁକ୍ରେନର କ୍ରିଭିରି ସହରକୁ ଟାର୍ଗେଟ କରି ରୁଷିଆ ଚଳାଇଛି ମିସାଇଲ୍ ଓ ଡ୍ରୋନ୍ ଆକ୍ରମଣ। ଏହି ଭୟଙ୍କର ଆକ୍ରମଣରେ ଜଣେ ୭ ବର୍ଷର ଶିଶୁଙ୍କ ସମେତ ଦୁଇ ଜଣଙ୍କ ମୃତ୍ୟୁ ହୋଇଛି। ପ୍ରାୟ ୬୦ ଜଣ ଆହତ ହୋଇଥିବାବେଳେ ସେମାନଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି। ଆକ୍ରମଣ ପରେ ବିଭିନ୍ନ ସ୍ଥାନରେ ଉଦ୍ଧାର ଓ ରିଲିଫ୍ କାର୍ଯ୍ୟ ଜାରି ରହିଛି।
ରିପୋର୍ଟ ଅନୁସାରେ, ରୁଷିଆ ଏକାଥରକେ ତିନୋଟି ସ୍ଥାନକୁ ଟାର୍ଗେଟ କରି ଆକ୍ରମଣ କରିଥିଲା। ପ୍ରଥମେ କେନ୍ଦ୍ରୀୟ ୟୁକ୍ରେନ ଉପରେ ଏୟାର ଷ୍ଟ୍ରାଇକ୍ କରାଯାଇଥିଲା। ଏହାପରେ ଅନ୍ୟ ଏକ ସ୍ଥାନରେ ଡ୍ରୋନ୍ ଆକ୍ରମଣ ହୋଇଥିଲା। ତୃତୀୟ ଆକ୍ରମଣରେ ରାଷ୍ଟ୍ରପତି ଭୋଲୋଦିମିର ଜେଲେନସ୍କିଙ୍କ ଜନ୍ମସହର କ୍ରିଭିରିକୁ ଟାର୍ଗେଟ କରିଥିଲା ରୁଷିଆ। ଏହି ଆକ୍ରମଣରେ ଅନେକ ଘର ଓ ଅନ୍ୟାନ୍ୟ ସ୍ଥାନ କ୍ଷତିଗ୍ରସ୍ତ ହୋଇଥିବା ସୂଚନା ମିଳିଛି।
ଆକ୍ରମଣ ପରେ ଆହତଙ୍କୁ ତୁରନ୍ତ ହସ୍ପିଟାଲ ପଠାଯାଇଛି। ଉଦ୍ଧାରକାରୀ ଦଳ ଭଗ୍ନାବଶେଷ ତଳେ ଆଉ କେହି ଫସି ରହିଛନ୍ତି କି ନାହିଁ, ସେନେଇ ତଲାସୀ ଜାରି ରଖିଛନ୍ତି। ମୃତାହତଙ୍କ ସଂଖ୍ୟା ବଢ଼ିବା ଆଶଙ୍କା ମଧ୍ୟ ରହିଛି।
ଅନ୍ୟପଟେ ଚୀନର ଶେନଝେନରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ଆଲୋଚନା ପରେ ଏହି ଆକ୍ରମଣ ଘଟିଥିବାରୁ ଅନ୍ତର୍ଜାତୀୟ ସ୍ତରରେ ଏହାକୁ ନେଇ ଚର୍ଚ୍ଚା ବଢ଼ିଛି। ଶାନ୍ତି ପ୍ରୟାସ ଓ କୂଟନୈତିକ ଆଲୋଚନା ମଧ୍ୟରେ ରୁଷିଆର ଏଭଳି ଆକ୍ରମଣ ୟୁକ୍ରେନ ଯୁଦ୍ଧର ଭବିଷ୍ୟତକୁ ନେଇ ପୁଣି ପ୍ରଶ୍ନ ଉଠାଇଛି।

