ଭୁବନେଶ୍ବର: ଯୁକ୍ତ ଦୁଇ ପରୀକ୍ଷା ପରିଚାଳନାରେ ଏଥର ବଡ଼ ପରିବର୍ତ୍ତନ କରାଯାଇଛି । ବିଶେଷକରି ପ୍ରାକ୍ଟିକାଲ୍ ପରୀକ୍ଷାରେ ସ୍ୱଚ୍ଛତା ଓ ମୂଲ୍ୟାୟନକୁ ଗୁରୁତ୍ୱ ଦେଇ ନୂଆ ବ୍ୟବସ୍ଥା ଆପଣାଇଛି CHSE । ଏଥର ପ୍ରାକ୍ଟିକାଲ୍ ପରୀକ୍ଷାରେ ଲାଇଭ୍ ଷ୍ଟ୍ରିମିଂ କରାଯିବ । ଏହାଦ୍ୱାରା ପରୀକ୍ଷା କେନ୍ଦ୍ରରେ ପିଲାମାନେ କିଭଳି ପ୍ରାକ୍ଟିକାଲ୍ କରୁଛନ୍ତି ଏବଂ ସେମାନଙ୍କୁ କିଭଳି ମାର୍କ ଦିଆଯାଉଛି, ତାହା ଉପରେ ନଜର ରଖାଯିବ । ଲାଇଭ୍ ଷ୍ଟ୍ରିମିଂରେ କୌଣସି କାରଣରୁ ସାମିଲ ହୋଇପାରୁନଥିବା ପରୀକ୍ଷାର୍ଥୀଙ୍କ ଉତ୍ତର ଖାତା ଓ ମାର୍କକୁ ବିଶେଷଜ୍ଞଙ୍କ ଦ୍ୱାରା ପୁନଃ ଯାଞ୍ଚ କରାଯିବ । ଜାନୁଆରୀ ୪ରୁ ୧୬ ତାରିଖ ଯାଏଁ ଚାଲିବ ପ୍ରାକ୍ଟିକାଲ୍ ପରୀକ୍ଷା । ପିଲାଙ୍କ ଦକ୍ଷତା ବିକାଶ ଓ ପ୍ରାୟୋଗିକ ଜ୍ଞାନକୁ ଅଧିକ ମଜଭୁତ କରିବା ଲକ୍ଷ୍ୟରେ ଏଥର ପ୍ରାକ୍ଟିକାଲ୍ ପରୀକ୍ଷାକୁ ସ୍ୱତନ୍ତ୍ର ଗୁରୁତ୍ୱ ଦିଆଯାଇଛି । ଥିଓରି ସିଲାବସ୍ ଓ ପ୍ରଶ୍ନପତ୍ର ଢାଞ୍ଚା ଜାତୀୟସ୍ତର ସହ ସମାନ ଥିବାରୁ ଏବେ ପ୍ରାକ୍ଟିକାଲ୍ ଶିକ୍ଷାକୁ ଆହୁରି ମଜଭୁତ କରିବା ଉପରେ ପରିଷଦ ଫୋକସ୍ କରୁଛି । ପ୍ରାକ୍ଟିକାଲ୍ ପରୀକ୍ଷାରେ ଇଚ୍ଛାମୁତାବକ ମାର୍କ ଦେବା ବ୍ୟବସ୍ଥା ଆଉ ରହିବ ନାହିଁ ବୋଲି ସ୍ପଷ୍ଟ କରାଯାଇଛି । ପରୀକ୍ଷାର୍ଥୀଙ୍କ ପ୍ରଦର୍ଶନ ଓ ମୂଲ୍ୟାୟନ ପ୍ରକ୍ରିୟାକୁ ଟ୍ରାକ୍ କରାଯିବ । ଯାହା ଫଳରେ ପ୍ରାକ୍ଟିକାଲ୍ ମାର୍କିଂରେ ଅନିୟମିତତା ରୋକିବା ସହ ମୂଲ୍ୟାୟନରେ ସ୍ୱଚ୍ଛତା ଆସିବ ବୋଲି ଆଶା ରଖିଛି ପରିଷଦ ।.. ..

