ନନ୍ଦିଘୋଷ ବ୍ୟୁରୋ: ଓଡ଼ିଶାରେ ସୃଷ୍ଟି ହେବନି ପଞ୍ଜାବ, ହରିୟାନା, ଦିଲ୍ଲୀ ଭଳି ସ୍ଥିତି । ଫସଲ ଅମଳ ପରେ ଏଠି ପୋଡାଯିବନି ବିଲରେ ରହିଯାଇଥିବା ନଡା । ପ୍ରାକୃତିକ ଉପାୟରେ ପରିଚାଳନା କରିବେ ଏସଏଚଜି ମହିଳା । ପ୍ରସ୍ତୁତ ହେବ ଖାଇବା ପ୍ଲେଟ, ଠୋଲି ଆଦି ସାମଗ୍ରୀ । ଓଡ଼ିଶା ସରକାର ପ୍ରଥମଥର ଲାଗି ଧାନ ନଡ଼ାର ସଫଳ ପରିଚାଳନା ପାଇଁ ପ୍ରଶିକ୍ଷଣ କାର୍ଯ୍ୟକ୍ରମ ଆୟୋଜନ କରିଛନ୍ତି । ୧୫ ଜିଲ୍ଲାର ସ୍ବୟଂ ସହାୟକ ଗ୍ରୁପର ମହିଳାମାନଙ୍କୁ ନେଇ ଧାନ ନଡା ପରିଚାଳନା ପ୍ରଶିକ୍ଷଣ ଦିଆଯାଉଛି । ପ୍ରଶିକ୍ଷଣ ବେଳେ ସେମାନଙ୍କୁ ନଡା ସଂଗ୍ରହ କରି ମେସିନରେ ନଡା କାଟି ତାକୁ ପ୍ରାକୃତିକ ଉପାୟରେ ଗ୍ରାଇଣ୍ଡ କରି ଛାଞ୍ଚରେ ପତ୍ର ବନେଇବା ଶିଖାଯାଇଥିଲା। ସେଗୁଡିକ ଶୁଖିଲା ପରେ ମେସିନରେ ତାକୁ ସୁନ୍ଦର ଖାଇବା ପ୍ଲେଟ ବା ଥାଳି ଓ ଛୋଟ ଠୋଲି ବନାଇବା ପ୍ରଶିକ୍ଷଣ ଦିଆଯାଇଥିଲା ।
ଅକ୍ଟୋବର୫ ତାରିଖରୁ ୧୭ ତାରିଖ ପର୍ଯ୍ୟନ୍ତ ଚାଲିଥିବା ଏହି ପ୍ରଶିକ୍ଷଣ କାର୍ଯ୍ୟକ୍ରମରେ ୧୫ ଜିଲ୍ଲାର ଏସଏଚଜି ମହିଳା ମାନେ ଯୋଗ ଦେଇଥିଲେ । ଏଠାରୁ ପ୍ରଶିକ୍ଷଣ ନେଇ ଯିବା ପରେ ସେମାନଙ୍କୁ ରାଜ୍ୟ ସରକାର ସମସ୍ତ ମେସିନ ଓ ଆନୁସାଙ୍ଗୀକ ଯନ୍ତ୍ର ପାତି ଯୋଗାଇ ଦେବେ । ସେଠାରେ ସେମାନେ ଅନ୍ୟ ଗ୍ରୁପର ମହିଳାମାନଙ୍କୁ ଧାନ ନଡାରୁ କିପରି ଖାଇବା ଥାଳି ଓ ଠୋଲି ବନାଯାଇ ପାରିବେ ତାହା ଶିଖାଇବେ। ପରେ ଏସବୁ ବଜାରକୁ ଯାଇ ସାଧାରଣ ଲୋକଙ୍କ ଉଦ୍ଦେଶ୍ଯରେ ବିକ୍ରି ହେବ। ଏହା ଦ୍ବାରା କେବଳ ପ୍ରଦୂଷଣ କମିବ ତାହା ନୁହେଁ ବରଂ ଚାଷୀକୂଳ ସହିତ ଜଡିତ ହଜାର ହଜାର ମହିଳା ରୋଜଗାରର ସୁଯୋଗ ପାଇବେ।
ପ୍ରଶିକ୍ଷଣ ଦେଉଥିବା ବୈଜ୍ଞାନିକଙ୍କ କହିବା କଥା ସରକାର ଓ ସିଆରଆରଆଇ ଅତି ସରଳ ଓ ସହଜ ଉପାୟରେ ମହିଳାମାନଙ୍କୁ ଧାନ ନଡା ପରିଚାଳନା ଓ ଉପଯୋଗ ନେଇ ପ୍ରଶିକ୍ଷଣ ଦିଆଯାଇଛି । ସେମାନେ ଖୁବଶୀଘ୍ର ଏହାକୁ କାର୍ଯ୍ୟକାରୀ କରି ସଫଳ ହେବେ ବୋଲି ଆଶା ରହିଛି।

