spot_img

Latest Posts

୧୮ ବର୍ଷର IPL ଯାତ୍ରାରେ ପୂର୍ଣ୍ଣଚ୍ଛେଦ, ନୂଆ ଅବତାରରେ ନଜର ଆସିବେ କ୍ୟାପଟେନ୍ କୁଲ୍

ନନ୍ଦିଘୋଷ ବ୍ୟୁରୋ: IPLରେ ଆଉ ଦେଖିବାକୁ ମିଳିବନି ମାହିଙ୍କ ମ୍ୟାଜିକ୍ । ଭାରତୀୟ କ୍ରିକେଟ୍ ଜଗତର ଅନ୍ୟତମ ସଫଳ ଅଧିନାୟକ ଏମ୍‌ଏସ୍‌ ଧୋନି IPLକୁ କହିଛନ୍ତି ଅଲବିଦା । IPLରୁ ସନ୍ନ୍ୟାସ ନେଇଛନ୍ତି ଭାରତର ଏହି ମହାନ ଅଧିନାୟକ । IPL୨୦୨୭ ପୂର୍ବରୁ ଧୋନୀଙ୍କୁ ନେଇ ଆସିଛି ବଡ଼ ଖବର । କ୍ରିକେଟ୍ ମୈଦାନରେ ଆଉ ଖେଳାଳି ଭାବେ ନୁହେଁ, ଏବେ ନୂଆ ଭୂମିକାରେ ନଜର ଆସିବେ କ୍ୟାପଟେନ୍ କୁଲ୍ । ଏବେ ଚେନ୍ନାଇ ସୁପର କିଙ୍ଗ୍ସର ମେଣ୍ଟର ଦାୟିତ୍ୱ ତୁଲାଇବେ ଧୋନି ।

ଚେନ୍ନାଇ ସୁପର କିଙ୍ଗ୍ସ ସହ ଧୋନୀଙ୍କ ସମ୍ପର୍କ ବେଶ୍ ପୁରୁଣା। ୨୦୦୮ରେ ଆଇପିଏଲ୍‌ ଆରମ୍ଭ ହେବା ପରଠାରୁ ଧୋନୀ ଦଳ ସହ ରହିଆସିଛନ୍ତି । ତାଙ୍କ ନେତୃତ୍ବରେ ଚେନ୍ନାଇ ୫ ୫ ଥର ଚାମ୍ପିୟନ୍ ମଧ୍ୟ ହୋଇଛି । କିନ୍ତୁ ଏବେ ଖେଳାଳି ଭାବେ ପଡ଼ିଆକୁ ଓହ୍ଲାଇବା ପରିବର୍ତ୍ତେ ମେଣ୍ଟର ଭାବେ ଦଳର ଯୁବ ଖେଳାଳିଙ୍କୁ ମାର୍ଗଦର୍ଶନ କରିବେ କ୍ୟାପଟେନ୍ କୁଲ୍ । ନିଜର ଦୀର୍ଘ ବର୍ଷର ଅଭିଜ୍ଞତା ବାଣ୍ଟିବା ସହ ଦଳର ରଣନୀତି ପ୍ରସ୍ତୁତିରେ ମାହିଙ୍କର ରହିବ ଗୁରୁତ୍ୱପୂର୍ଣ୍ଣ ଭୂମିକା । ୨୦୨୦ରେ ଅନ୍ତର୍ଜାତୀୟ କ୍ରିକେଟ୍‌କୁ ଅଲବିଦା କହିଥିଲେ ଧୋନି । ହେଲେ IPLରେ ତାଙ୍କ ଯାତ୍ରା ଜାରି ରହିଥିଲା । ଗତ ସିଜିନ୍‌ରେ ଆହତ ସମସ୍ୟା ଯୋଗୁଁ ପୂରା ସିଜିନ୍‌ ଖେଳିପାରିନଥିଲେ । ଏବେ IPLରୁ ମଧ୍ୟ ଅବସର ନେବାକୁ ନିଷ୍ପତ୍ତି ନେଇଛନ୍ତି ମାହି । ତେବେ ଖେଳାଳି ଭାବେ ନୁହେଁ, ମେଣ୍ଟର ଭାବେ ଦଳ ସହ ଯୋଡ଼ି ହୋଇ ରହିବେ ଧୋନି ।  ମୈଦାନରେ ଧୋନିଙ୍କ ହେଲିକପ୍ଟର ସଟ୍‌ ଓ ଶାନ୍ତ ଅଧିନାୟକତ୍ୱକୁ ମିସ୍‌ କରିବେ କ୍ରିକେଟ୍‌ ପ୍ରେମୀ ।

ଅନ୍ତର୍ଜାତୀୟ କ୍ରିକେଟ୍ ହେଉ କି IPL, ଧୋନିଙ୍କ ଅବସର ନେବାର ଶୈଳୀ ସବୁବେଳେ ନିଆରା । ନା କୌଣସି ବିଦାୟୀ ମ୍ୟାଚ୍ ନା ଆଡ଼ମ୍ବରପୂର୍ଣ୍ଣ ଘୋଷଣା । ଚୁପଚାପ୍ କ୍ରିକେଟ୍ ମୈଦାନରୁ ବିଦାୟ ନେବାକୁ ପସନ୍ଦ କରିଛନ୍ତି ମାହି । ଏହା ସହ ଖେଳାଳି ଭାବେ ଧୋନି ଓ IPL ମଧ୍ୟରେ ଦୀର୍ଘ ୧୮ ବର୍ଷର ସମ୍ପର୍କରେ ପଡ଼ିଛି ପୂର୍ଣ୍ଣଚ୍ଛେଦ । ତେବେ ମାହିଙ୍କ ନୂଆ ଭୂମିକା ଚେନ୍ନାଇ ଦଳ ପାଇଁ କେତେ ଫଳପ୍ରଦ ହେବ, ତାହା ଆଗାମୀ ଦିନରେ ଜଣାପଡ଼ିବ ।

Latest Posts

Don't Miss