ନନ୍ଦିଘୋଷ ବ୍ୟୁରୋ: ଜମ୍ମୁ-କାଶ୍ମୀର ଓ ଲଦାଖରେ ଶନିବାର କ୍ରମାଗତ ଭାବେ ଅନୁଭୂତ ହୋଇଛି ଏକାଧିକ ଭୂମିକମ୍ପ। ମାତ୍ର ୧୧ ଘଣ୍ଟା ମଧ୍ୟରେ ଦୁଇଟି କେନ୍ଦ୍ରଶାସିତ ଅଞ୍ଚଳରେ ୪ ଥର ଭୂମିକମ୍ପ ହେବା ଫଳରେ ସ୍ଥାନୀୟ ଲୋକଙ୍କ ମଧ୍ୟରେ ଭୟ ଓ ଆତଙ୍କ ଖେଳିଯାଇଛି। ଏହି ଭୂମିକମ୍ପଗୁଡ଼ିକର ତୀବ୍ରତା ରିକ୍ଟର ସ୍କେଲରେ ୨.୯ରୁ ୩.୯ ମଧ୍ୟରେ ରେକର୍ଡ କରାଯାଇଛି। ସେଥିମଧ୍ୟରୁ ୩ଟି ଭୂମିକମ୍ପ ଜମ୍ମୁ-କାଶ୍ମୀରର ଚେନାବ ଉପତ୍ୟକା ଅଞ୍ଚଳରେ ଏବଂ ଗୋଟିଏ ଲଦାଖର ଲେହ ଅଞ୍ଚଳରେ ଅନୁଭୂତ ହୋଇଛି।
କିସ୍ତୱାରରୁ ଡୋଡା ଓ ଲେହ ପର୍ଯ୍ୟନ୍ତ ଭୂକମ୍ପ ଝଟକା
ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ପକ୍ଷରୁ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ସେୟାର କରାଯାଇଥିବା ସୂଚନା ଅନୁଯାୟୀ, ପ୍ରଥମ ଭୂମିକମ୍ପ ବିଳମ୍ବିତ ରାତିରେ ଜମ୍ମୁ-କାଶ୍ମୀରର କିସ୍ତୱାର ଜିଲ୍ଲାରେ ଅନୁଭୂତ ହୋଇଥିଲା। ଏହାପରେ ସକାଳେ ଡୋଡା ଓ ଲଦାଖର ଲେହ ଅଞ୍ଚଳରେ ଭୂକମ୍ପ ଝଟକା ଲାଗିଥିଲା। ପୁଣି ଅପରାହ୍ନରେ ଡୋଡା ଜିଲ୍ଲାରେ ଆଉ ଏକ ଭୂମିକମ୍ପ ଅନୁଭୂତ ହୋଇଥିଲା। ଅଳ୍ପ ସମୟ ବ୍ୟବଧାନରେ ବାରମ୍ବାର ଭୂମିକମ୍ପ ହେବା ଫଳରେ ଅଞ୍ଚଳରେ ଭୂଗର୍ଭସ୍ଥ କାର୍ଯ୍ୟକଳାପକୁ ନେଇ ଚିନ୍ତା ବଢ଼ିଛି।
ଜୀବନ ଓ ସମ୍ପତ୍ତି କ୍ଷୟକ୍ଷତିର ସୂଚନା ନାହିଁ
ତେବେ ଏହି କ୍ରମାଗତ ଭୂମିକମ୍ପ ମଧ୍ୟରେ ଆଶ୍ୱସ୍ତିର ବିଷୟ ହେଉଛି, ଏପର୍ଯ୍ୟନ୍ତ କୌଣସି ଜୀବନହାନି କିମ୍ବା ସମ୍ପତ୍ତି କ୍ଷୟକ୍ଷତିର ଖବର ମିଳିନାହିଁ। ପୋଲିସର ସୂଚନା ଅନୁଯାୟୀ, ପ୍ରଭାବିତ ଅଞ୍ଚଳଗୁଡ଼ିକରେ ସ୍ଥିତି ସ୍ୱାଭାବିକ ରହିଛି। କ୍ରମାଗତ ଭୂକମ୍ପ ଯୋଗୁଁ ସ୍ଥାନୀୟ ଲୋକଙ୍କ ମଧ୍ୟରେ ଭୟ ଦେଖାଦେଇଥିଲେ ମଧ୍ୟ ବର୍ତ୍ତମାନ ସ୍ଥିତି ନିୟନ୍ତ୍ରଣରେ ରହିଛି।
