ନବରାତ୍ରୀର ଷଷ୍ଠ ଦିନ: ‘କାତ୍ୟାୟନୀ’ ବେଶରେ ଦର୍ଶନ ଦେବେ କାକଟପୁର ମଙ୍ଗଳା
ନନ୍ଦିଘୋଷ ବ୍ୟୁରୋ: ଶକ୍ତି ଆରାଧନାର ମହାପର୍ବ ଶାରଦୀୟ ନବରାତ୍ରୀର ଆଜି ଷଷ୍ଠ ଦିନ। ଶକ୍ତିପୀଠ କାକଟପୁରରେ ଛୁଟିଛି ଭକ୍ତଙ୍କ ସୁଅ । ପ୍ରାଚୀତଟ ବାସିନୀ ମା’ ମଙ୍ଗଳାଙ୍କ ପୀଠରେ ପ୍ରତିଦିନ ନୂଆ ବେଶ, ନୂଆ ରୂପରେ ଦର୍ଶନ ଦେଉଛନ୍ତି ମା’। ଗୁରୁବାର ପଞ୍ଚମ ଦିନରେ ବିଳମ୍ବିତ ରାତିରେ ମା’ ମଙ୍ଗଳା ତୀରକମାଣ ବେଶରେ ଦର୍ଶନ ଦେଇଥିଲେ। ଆଜି ବିଳମ୍ବିତ ରାତିରେ ଅନୁଷ୍ଠିତ ହେବ ମା’ ମଙ୍ଗଳାଙ୍କ କାର୍ତ୍ତିକ ଖର୍ପର ବେଶ। ଯାହାକୁ ସାଧାରଣରେ ‘କାତ୍ୟାୟନୀ’ ବେଶ ବୋଲି କୁହାଯାଏ।
ଶାରଦୀୟ ନବରାତ୍ରୀର ଷୋଡ଼ଶ ଉପଚାର ପୂଜାରେ କରାଯାଉଥିବା ବିଭିନ୍ନ ଦୁର୍ଲଭ ବେଶ ମଧ୍ୟରେ କାତ୍ୟାୟନୀ ରୂପ ଅନ୍ୟତମ ଓ ଅତି ବିଶେଷ। ବିଶ୍ୱାସ ରହିଛି ଯେ, ଖର୍ପର ଓ କାତି ଧାରଣ କରି ମା’ ଭକ୍ତମାନଙ୍କର ସମସ୍ତ ବିପଦ, ଅଶୁଭ ଶକ୍ତି ଓ ଦୁଃଖକୁ ନାଶ କରିଥାନ୍ତି। ଏହି ବେଶ ଦର୍ଶନ କଲେ ଶତ୍ରୁ ନାଶ ହୁଏ ଓ ମନସ୍କାମନା ପୂର୍ଣ୍ଣ ହୁଏ ବୋଲି ଭକ୍ତଙ୍କ ବିଶ୍ୱାସ ରହିଛି। ତେଣୁ ପ୍ରତିବର୍ଷ ଏହି ବେଶ ଦେଖିବାକୁ ରାତିରେ ହଜାର ହଜାର ଶ୍ରଦ୍ଧାଳୁଙ୍କ ଭିଡ଼ ଜମେ। ଆଜି ପ୍ରାତଃରୁ ମନ୍ଦିରରେ ମଙ୍ଗଳ ଆଳତି, ମଇଲମ୍, ଅବକାଶ, ବଲ୍ଲଭ ସହ ବିଭିନ୍ନ ନୀତିକାନ୍ତି ପରେ ଷଷ୍ଠ ଦିନର ପୂଜା ଆରମ୍ଭ ହୋଇଛି। ମା’ଙ୍କ ଦର୍ଶନ ପାଇଁ ସକାଳୁ ଭକ୍ତଙ୍କ ଲମ୍ବା ଲାଇନ୍ ଲାଗିଛି।ଏ ନେଇ ମଙ୍ଗଳା ମନ୍ଦିର ସାମ୍ନାରୁ ଅଧିକ ସୂଚନା ଦେଉଛନ୍ତି ଆମ ପ୍ରତିନିଧି ମାନସ ଖଣ୍ଡୁଆ
