ନନ୍ଦିଘୋଷ ବ୍ୟୁରୋ : ରାଜରାସ୍ତାରେ ମାଳ ମାଳ ବୁଲା ଗାଈ ଗୋରୁ । ରାସ୍ତା ପାଲଟିଛି ଆଶ୍ରୟସ୍ଥଳୀ । ଅସୁରକ୍ଷିତ ଏନଏଚ ୨୦ । ବୁଲା ଗାଈ ଗୋରୁ ସାଜୁଛନ୍ତି ଦୁର୍ଘଟଣାର କାରଣ। ଗୋ-ଶାଳା ନିର୍ମାଣ ପାଇଁ ଦାବି । କେନ୍ଦୁଝର ଜିଲ୍ଲା ହସନପୁର ଟୋଲ ପ୍ଲାଜା ଠାରୁ ରାମଚନ୍ଦ୍ରପୁର ଥାନା ଯାଏଁ ପ୍ରତ୍ୟେକ ଦିନ ଘଟୁଛି ଦୁର୍ଘଟଣା। ହାନି ହେଉଛି ଧନ ଜୀବନ । ଚଳିତ ବର୍ଷ ୩ ଶହରୁ ଉର୍ଦ୍ଧ୍ବ ଦୁର୍ଘଟଣା ଘଟିଥିବା ବେଳେ ୪୦ ଜଣଙ୍କର ଜୀବନ ଯାଇଥିବା ତଥ୍ୟ କହୁଛି। ଏବେ ମଧ୍ୟ ଅନେକ ବ୍ୟକ୍ତି ମେଡିକାଲରେ ଜୀବନ ମରଣ ସହିତ ସଂଗ୍ରାମ କରୁଛନ୍ତି। ସେହିଭଳି ଦୁର୍ଘଟଣାରେ ୧୦୦ରୁ ଅଧିକ ଗୋରୁଙ୍କ ଜୀବନ ଯାଇଛି।
ଯାତାୟାତରେ ବାଧକ ସାଜୁଛନ୍ତି ଖୋଲାରେ ବୁଲୁଥିବା ଗୋରୁ । ଗୋରୁଙ୍କ ପାଇଁ ଗୁହାଳ ଘର ନଥିବାବେଳେ ମାଲିକ ମାନେ ରାଜରାସ୍ତାରେ ଖୋଲା ଛାଡି ଦେଉଛନ୍ତି । ଏକ ଗୋଶାଳା ନିର୍ମାଣ ସହିତ ଜାତୀୟ ରାଜପଥର ଉଭୟ ପାର୍ଶ୍ଵରେ ପ୍ରତିରୋଧ ବାଡା ଲଗାଇବାକୁ ଉପଜିଲ୍ଲାପାଳଙ୍କ ନିକଟରେ ଦାବି ରଖିଛନ୍ତି ସ୍ଥାନୀୟବାସୀ। ଏଥି ସହିତ ସାଇଁକୁଳରେ ଏକ ଉନ୍ନତମାନର ପଶୁ ଚିକିତ୍ସାଳୟ ଖୋଲିବାକୁ ମଧ୍ୟ ଦାବି ହୋଇଛି। ଅନ୍ୟପଟେ ସମସ୍ୟାର ଖୁବଶୀଘ୍ର ସମାଧାନ କରିବାକୁ ପ୍ରତିଶୃତି ଦେଇଛନ୍ତି ଉପଜିଲ୍ଲାପାଳ ।
ଦୁର୍ଘଟଣାକୁ କମ୍ କରିବାକୁ ସରକାର ବିଭିନ୍ନ ନିୟମ ଆଣୁଛନ୍ତି । ହେଲେ ବୁଲା ଗାଈଗୋରୁଙ୍କ ପାଇଁ ଅକାଳରେ ଝଡିଯାଉଛି ନିରୀହ ଜୀବନ।
