ନନ୍ଦିଘୋଷ ବ୍ୟୁରୋ : କାର୍ଯ୍ୟାଳୟରେ ଦୈନିକ ଏକ ହଜାରରୁ ଅଧିକ ପାର୍ସଲ, ୧୫ ହଜାରରୁ ଅଧିକ ସ୍ପିଡ୍ ପୋଷ୍ଟ, ୨୦ ହଜାର ସାଧାରଣ ପୋଷ୍ଟ ଓ ପ୍ରାୟ ୫ଶହ ନିୟମିତ ବୁକିଂ କରାଯାଉଛି। ଏଠାରେ ଇନ୍ଷ୍ଟାଣ୍ଟ ପ୍ରୋସେସିଂ ବୁକିଂ ବ୍ୟବସ୍ଥା ଥିବାରୁ RMS କାଉଣ୍ଟରରୁ ପାର୍ସଲ ଓ ଡାକ ଗନ୍ତବ୍ୟସ୍ଥଳରେ ଶୀଘ୍ର ପହଞ୍ଚିବା ସହଜ ହେଉଛି। ତେବେ RMS ବ୍ରହ୍ମପୁର ଗଞ୍ଜାମ ଡିଭିଜନକୁ କଟକ ଡିଭିଜନରେ ମିଶାଇବାକୁ ଚକ୍ରାନ୍ତ ହେଉଥିବା ଅଭିଯୋଗ ହୋଇଛି। ଏହାକୁ ପରିବର୍ତ୍ତନ କରି କେବଳ ବୁକିଂ କାଉଣ୍ଟରରେ ସୀମିତ ରଖାଗଲେ ଗ୍ରାହକଙ୍କ ନିକଟରେ ପାର୍ସଲ ଓ ଡାକ ପହଞ୍ଚିବାରେ ସମସ୍ୟା ଉପୁଜିବ ବୋଲି ଅନେକ ପ୍ରାକ୍ତନ ଡାକ କର୍ମଚାରୀ ମତ ଦେଇଛନ୍ତି।
କଟକ ଡିଭିଜନରେ ଏହାର ମିଶ୍ରଣ ହେଲେ ବିଭିନ୍ନ କାର୍ଯ୍ୟ ବିଳମ୍ବ ହେବା ସହ ଅନ୍ୟାନ୍ୟ ଆନୁଷଙ୍ଗିକ କାର୍ଯ୍ୟ ମଧ୍ୟ ପ୍ରଭାବିତ ହେବ। ବ୍ରହ୍ମପୁରରୁ ପ୍ରଶାସନିକ କାର୍ଯ୍ୟ ଅପସାରଣ କରାଗଲେ ଯେଉଁ କାମ ୨ରୁ ୩ ଦିନରେ ହେଉଛି, ସେଥିପାଇଁ ଅତିରିକ୍ତ ସମୟ ଲାଗିବ ବୋଲି ଅଭିଯୋଗ ହୋଇଛି। ସେହିପରି ଡିଭିଜନ ମିଶ୍ରଣ ପରେ RMS କାର୍ଯ୍ୟାଳୟ ନିଜର ଗୁରୁତ୍ୱ ହରାଇବା ସହ ଅନ୍ତର୍ଜାତୀୟ ପାର୍ସଲ ବୁକିଂଠାରୁ ଆରମ୍ଭ କରି ବଲ୍କ ବୁକିଂ ମଧ୍ୟ ପ୍ରଭାବିତ ହେବ। କୌଣସି ଗ୍ରାହକଙ୍କ ଡାକ ପାଇବାରେ ସମସ୍ୟା ହେଲେ ଅଭିଯୋଗ ପାଇଁ ତାଙ୍କୁ କଟକ ଯିବାକୁ ପଡ଼ିବ। ଏହାଦ୍ୱାରା ଗ୍ରାହକ ଅଧିକ ଖର୍ଚ୍ଚାନ୍ତ ହେବା ସହ କାର୍ଯ୍ୟ ମଧ୍ୟ ବିଳମ୍ବିତ ହେବ ବୋଲି ଅଭିଯୋଗ ହୋଇଛି।
