ପିପିଲି : ବିକାଶ ନାଁରେ ବଦଳିଲା ପରମ୍ପରା । ସୌନ୍ଦର୍ଯ୍ୟକରଣ ନାଁରେ ବଦଳିଲା ମନ୍ଦିରର ରଙ୍ଗ । ମନ୍ଦିରର ରଙ୍ଗ ପରିବର୍ତ୍ତନକୁ ନେଇ ତେଜିଲା ବିବାଦ । ବର୍ଷ ବର୍ଷ ଧରି ପୁରୀ ଜିଲ୍ଲା ପିପିଲି ଅଞ୍ଚଳର ଆରାଧ୍ୟ ଠାକୁର ଶ୍ରୀ ଶ୍ରୀ ନୃସିଂହନାଥ ଦେବଙ୍କ ମନ୍ଦିରର ରଙ୍ଗ ଥିଲା ଧଳା । ଏବେ କରାଯାଇଛି ଗେରୁଆ । କେବଳ ମନ୍ଦିର ନୁହେଁ, ଶୌଚାଳୟ ଠାରୁ ଆରମ୍ଭ କରି ଠାକୁରଙ୍କ ବେଢ଼ା, ବିଜେସ୍ଥଳୀ ଓ ପ୍ରାଚୀରର ରଙ୍ଗ ମଧ୍ୟ ପରିବର୍ତ୍ତନ କରାଯାଇଛି । ଯାହାକୁ ନେଇ ସେବାୟତ ଓ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ଦୀର୍ଘ ବର୍ଷ ଧରି ମନ୍ଦିରରେ ଧଳା ରଙ୍ଗର ପରମ୍ପରା ରହିଆସିଛି । ହେଲେ ସେହି ପରମ୍ପରାକୁ ବଦଳାଇବା ପୂର୍ବରୁ କାହା ସହ ଆଲୋଚନା କରାଗଲା ନାହିଁ କାହିଁକି ? ଯଦି ଏହି କାମ ବ୍ଲକ ପ୍ରଶାସନ ପକ୍ଷରୁ କରାଯାଇଛି, ତେବେ କାର୍ଯ୍ୟର ନାମ ଫଳକ ଲଗାଯାଇନି କାହିଁକି ? କିଏ ଓ କାହିଁକି କରିଛି ମନ୍ଦିରର ରଙ୍ଗ ପରିବର୍ତ୍ତନ ? କାହା ଅନୁମତିରେ ମନ୍ଦିରର ରଙ୍ଗ ଓ ଦୋଳବେଦୀ ଉପରେ କଂକ୍ରିଟ ଛାତ ପକାଯାଇଛି ? ଯାହାକୁ ନେଇ ଆପତ୍ତି ଉଠାଇଛନ୍ତି ସେବାୟତ ଓ ଗ୍ରାମବାସୀ । ଆଗାମୀ ୧୫ ଦିନ ମଧ୍ୟରେ ଯଦି ମନ୍ଦିରର ରଙ୍ଗ ପରିବର୍ତ୍ତନ କରାନଯାଏ । ତାହାଲେ ଅନଶନର ଚେତାବନୀ ଦେଇଛନ୍ତି ସେବାୟତ ଓ ଗ୍ରାମବାସୀ ।…
