ନନ୍ଦିଘୋଷ ବ୍ୟୁରୋ : ୮୫ ବର୍ଷ ବୟସରେ ବି ଜୀବନ ଜିଇଁବାକୁ ସଂଘର୍ଷ କରୁଛନ୍ତି କାଇରୀ ଦେଇ। ମୟୂରଭଞ୍ଜ ଜିଲ୍ଲା କପ୍ତିପଦା ବ୍ଲକ ମଝିଗଡ଼ିଆ ପଞ୍ଚାୟତ ମହୁଲପଙ୍ଖା ଛତ୍ରାଆମ୍ବ ସାହିରେ ରହୁଛନ୍ତି ଏହି ବୃଦ୍ଧା। ବୟସର ଅପରାହ୍ଣରେ ଚମ ଧୁଡୁଧୁଡୁ ହୋଇଥିବା ବେଳେ ଚାଲିବା ପାଇଁ ଅଣ୍ଟା ବି ସାଥ ଦେଉନାହିଁ। ଏବେ ତାଙ୍କର ଏକମାତ୍ର ସାହାରା ପାଲଟିଛି ଆଶାବାଡ଼ି।
ପ୍ରାୟ ୧୩ ବର୍ଷ ତଳେ ସ୍ୱାମୀଙ୍କୁ ହରାଇବା ପରେ ଏବେ ପାଲ ଘେରା ଘରେ ଏକାକୀ ଜୀବନ କାଟୁଛନ୍ତି କାଇରୀ। ଦୁଃଖ ବାଣ୍ଟିବାକୁ ନା କେହି ଅଛନ୍ତି, ନା ରହିଛି କୌଣସି ସାହାରା। ନିକଟସ୍ଥ ଜଙ୍ଗଲରୁ କାଠ ସଂଗ୍ରହ କରି ଚୁଲି ଜଳାଇ ସେଥିରେ ରୋଷେଇ କରୁଛନ୍ତି। ଭଙ୍ଗା ଡେକଚି, କିଛି ଶାଢ଼ୀ ଆଉ ଉଜୁଡ଼ା ସ୍ୱପ୍ନକୁ ନେଇ ତାଙ୍କ ସଂସାର। ଦୀର୍ଘ ବର୍ଷ ହେଲା ଜରିପାଲ ତଳେ ଜୀବନ କାଟୁଥିଲେ ମଧ୍ୟ ତାଙ୍କ ପାଖରେ ପହଞ୍ଚିପାରିନି ସରକାରୀ ଯୋଜନା। ନା ମିଳିଛି ଆବାସ ଯୋଜନାରେ ଘର, ନା ମିଳୁଛି ଭତ୍ତା କିମ୍ବା ରାସନ। ତାଙ୍କ ପାଇଁ ସରକାରୀ ସୁବିଧା ସତେ ଯେପରି ସାତସପନ ପାଲଟିଛି ।
