ନନ୍ଦିଘୋଷ ବ୍ୟୁରୋ; ଝାଡ଼ଖଣ୍ଡରେ ନିଯୁକ୍ତି ପରୀକ୍ଷାକୁ ନେଇ ସରକାରଙ୍କ ବଡ଼ ନିଷ୍ପତ୍ତି। ଅନିୟମିତତା ଏବଂ ପ୍ରଶ୍ନପତ୍ର ଲିକ୍ ଅଭିଯୋଗ ପରେ JPSC ଓ JSSC ଦ୍ୱାରା ଆୟୋଜିତ ୪୪ଟି ନିଯୁକ୍ତି ପରୀକ୍ଷାକୁ ବାତିଲ କରାଯାଇଛି। ଦୀର୍ଘ ୨୫ ଦିନ ଧରି ଛାତ୍ରଛାତ୍ରୀଙ୍କ ଆନ୍ଦୋଳନ ପରେ ସରକାରଙ୍କ ଏହି ପଦକ୍ଷେପ ନେଇଛନ୍ତି। ଗତ ରାତିରେ ଏହାର ବିଜ୍ଞପ୍ତି ବାହାରିଛି। JSSC-CGL ସମେତ ସିଭିଲ୍ ଜଜ୍, ଡେପୁଟି କଲେକ୍ଟର, ଆସିଷ୍ଟାଣ୍ଟ ଇଞ୍ଜିନିୟର, ଫରେଷ୍ଟ ଅଫିସର, ଡ୍ରଗ୍ ଇନ୍ସପେକ୍ଟର ଓ ଅନ୍ୟାନ୍ୟ ପଦର ପରୀକ୍ଷା ବାତିଲ ହୋଇଛି। ସରକାର CID ତଦନ୍ତ ଏବଂ ଅଭିଯୋଗ ଆଧାରରେ ଏହି ପଦକ୍ଷେପ ନେଇଥିବା କହିଛି।
ଏହା ସହ ଅନିୟମିତତା ମାମଲାର ଶୀଘ୍ର ଶୁଣାଣି ପାଇଁ ହାଇକୋର୍ଟଙ୍କୁ ଫାଷ୍ଟ-ଟ୍ରାକ୍ କୋର୍ଟ ଗଠନ ପାଇଁ ଅନୁରୋଧ କରାଯିବ ବୋଲି ସରକାର କହିଛନ୍ତି। JPSC ଓ JSSCରେ ଇଣ୍ଟରନାଲ୍ ମନିଟରିଂ ସେଲ୍ ଗଠନ ହେବ। ଏହାସହ ଅମିତାଭ କୌଶଲଙ୍କ ଅଧ୍ୟକ୍ଷତାରେ ଏକ କମିଟି ଦୁଇ ମାସ ମଧ୍ୟରେ ପରୀକ୍ଷା ସଂସ୍କାର ନେଇ ରିପୋର୍ଟ ଦେବ। ସେପଟେ ଆନ୍ଦୋଳନ କଥିବା ପିଲାମାନେ କହିଛନ୍ତି ଆମେ ସରକାରଙ୍କ ନିଷ୍ପତ୍ତିର ଅନୁଧ୍ୟାନ କରିବୁ। ତାପରେ ଆନ୍ଦୋଳନ ନେଇ ନିଷ୍ପତ୍ତି ନେବୁ।
