ଧର୍ମଶାଳା: ଯାଜପୁର ଜିଲ୍ଲା ଧର୍ମଶାଳା ଥାନା ଅଧୀନ ଜାରକା ଅଞ୍ଚଳରେ ଥିବା ଏକ ନିଶା ନିବାରଣ କେନ୍ଦ୍ରରେ ଜଣେ ବ୍ୟକ୍ତିଙ୍କୁ ପିଟିପିଟି ହତ୍ୟା କରାଯାଇଥିବା ଭଳି ଏକ ସଂଗୀନ ଅଭିଯୋଗ ସାମ୍ନାକୁ ଆସିଛି। ମୃତକ ହେଲେ ଭଗବାନପୁର ଗ୍ରାମର ରାଜୀବ ବାରିକ। ଏହି ଘଟଣାକୁ ନେଇ କେନ୍ଦ୍ର ପରିସରରେ ପ୍ରବଳ ଉତ୍ତେଜନା ପ୍ରକାଶ ପାଇଛି।
ତେବେ ମୃତ ରାଜୀବ ପୂର୍ବରୁ ଏକ ସେଲୁନରେ କାମ କରୁଥିଲେ। ସେ କିଛି ଦିନ ପୂର୍ବରୁ ଉକ୍ତ ନିଶା ନିବାରଣ କେନ୍ଦ୍ରରୁ ଫେରିଥିଲେ ମଧ୍ୟ ପୂର୍ବରୁ କିଛି ବାକିଆ ଟଙ୍କାକୁ ନେଇ ତାଙ୍କର ବିବାଦ ରହିଥିଲା। ଗତକାଲି ରାଜୀବଙ୍କୁ ଚୁଟି ଓ ଦାଢ଼ି କାଟିବା ବାହାନାରେ ନିଶା ନିବାରଣ କେନ୍ଦ୍ରକୁ ଡକାଯାଇଥିଲା। ରାଜୀବ ଓ ତାଙ୍କ ପୁଅ ସେଠାରେ ପହଞ୍ଚିବା ପରେ, କାମ ସରିବାରେ ବିଳମ୍ବ ହେବ ବୋଲି କହି କେନ୍ଦ୍ରର କର୍ମଚାରୀମାନେ ଚତୁରତାର ସହ ତାଙ୍କ ପୁଅକୁ ଘରକୁ ପଠାଇ ଦେଇଥିଲେ।
ପୁଅ ଘରକୁ ଫେରିବାର କିଛି ସମୟ ପରେ ରାଜୀବଙ୍କୁ ଗୁରୁତର ଅବସ୍ଥାରେ ଧର୍ମଶାଳା ମେଡିକାଲରେ ଭର୍ତ୍ତି କରାଯାଇଥିଲା। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ରାଜୀବଙ୍କୁ ପିଟିପିଟି ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି। ଏହି ଘଟଣା ପରେ ମୃତକଙ୍କ ପରିବାର ଓ ସ୍ଥାନୀୟ ଲୋକେ ନିଶା ନିବାରଣ କେନ୍ଦ୍ର ପରିସରରେ ହଙ୍ଗାମା କରିଥିଲେ, ଯାହାକୁ ନେଇ ସେଠାରେ ତୀବ୍ର ଉତ୍ତେଜନା ଦେଖାଦେଇଥିଲା।
ଖବର ପାଇ ଧର୍ମଶାଳା ଥାନା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରି ସ୍ଥିତି ନିୟନ୍ତ୍ରଣ କରିଛନ୍ତି । ଏହା ସହ ପୋଲିସ ଶବ ଜବତ କରି ଏକ ମାମଲା ରୁଜୁ କରିବା ସହ ଘଟଣାର ଅଧିକ ତଦନ୍ତ ଚଳାଇଛି।
