ନନ୍ଦିଘୋଷ ବ୍ୟୁରୋ: ଖରିଫ ଧାନ କିଣା ଭଳି ରବି ଧାନ କିଣାରେ ମଧ୍ୟ ସମାନ ସମସ୍ୟା ଦେଖାଦେଇଛି। ଧାନ କିଣା ପ୍ରକ୍ରିୟା ଆରମ୍ଭରୁ ହିଁ ସରକାରୀ ସ୍ତରରେ ତ୍ରୁଟି ପରିଲକ୍ଷିତ ହେଉଥିବା ବେଳେ କଷ୍ଟ ଅର୍ଜିତ ଧାନ ଅମଳ କରି ଚାଷୀମାନେ ଏବେ ହଇରାଣ ହେଉଛନ୍ତି। ମଣ୍ଡିରେ ଧାନ ପଡ଼ି ରହିଥିଲେ ମଧ୍ୟ ମିଲର୍ସମାନଙ୍କ ମନମାନୀ ଯୋଗୁଁ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ମିଲର୍ସ ଅଶୋକ ସାହୁ ବିନା କାଟନୀ-ଛଟନୀରେ ଆଗଲପୁର ପ୍ୟାକ୍ସରୁ ଧାନ ଉଠାଇବାକୁ ମନା କରିଦେଇଛନ୍ତି। ଏଥିରେ ଉତ୍ତ୍ୟକ୍ତ ହୋଇ ଶତାଧିକ ଚାଷୀ କୃଷକ ନେତା ଆକାଶ ମିଶ୍ର ଓ ସୌମେନ୍ଦ୍ର ପରିଛାଙ୍କ ନେତୃତ୍ୱରେ ବଲାଙ୍ଗୀର ଯୋଗାଣ ବିଭାଗ କାର୍ଯ୍ୟାଳୟ ଘେରାଉ କରିଛନ୍ତି। ଚାଷୀମାନେ ଜିଲ୍ଲା ଯୋଗାଣ ଅଧିକାରୀ (CSO) ଦେବବ୍ରତ ମହାପାତ୍ରଙ୍କ ଚ୍ୟାମ୍ବର ଭିତରେ ଦୀର୍ଘ ୩ ଘଣ୍ଟା ଧରି ଧାରଣା ଦେବା ସହ ଜୋରଦାର ହୋହାଲ୍ଲା କରି ପ୍ରତିବାଦ ଜଣାଇଛନ୍ତି।
ଚାଷୀଙ୍କ ଏହି ପ୍ରତିବାଦ ଆଗରେ ଯୋଗାଣ ବିଭାଗ ନତମସ୍ତକ ହୋଇଛି। CSO ଦେବବ୍ରତ ମହାପାତ୍ର ଆସନ୍ତାକାଲି ସୁଦ୍ଧା ଅନ୍ୟ ଜଣେ ମିଲର୍ସଙ୍କୁ ଟେଗିଂ କରି ମଣ୍ଡିରୁ ଧାନ ଉଠାଇବା ପାଇଁ ଚାଷୀଙ୍କୁ ପ୍ରତିଶ୍ରୁତି ଦେଇଛନ୍ତି। ଏହି ପ୍ରତିଶ୍ରୁତି ପାଇବା ପରେ ଚାଷୀମାନେ ଶାନ୍ତ ପଡ଼ିଥିଲେ ଓ ଆନ୍ଦୋଳନରୁ ଓହରିଥିଲେ।
ଆଗକୁ ବର୍ଷା ହେବାର ସମ୍ଭାବନା ଥିବା ବେଳେ ବର୍ତ୍ତମାନ ସୁଦ୍ଧା ମଣ୍ଡିରେ ପ୍ରାୟ ୩ ହଜାର କୁଇଣ୍ଟାଲ ଧାନ ଖୋଲା ଆକାଶ ତଳେ ପଡ଼ିରହିଛି। ଅନ୍ୟପଟେ ନିଜକୁ ବିଜେପି ନେତା ବୋଲାଉଥିବା ମିଲର୍ସ ଅଶୋକ ସାହୁ ରାଜନୈତିକ ପ୍ରଭାବ ଖଟାଇ ନିଜର ମନମାନୀ ଚଳାଇଛନ୍ତି ବୋଲି ଚାଷୀମାନେ ଅଭିଯୋଗ ଆଣିଛନ୍ତି।
