ସମ୍ବଲପୁର: ସମ୍ବଲପୁର ଜିଲ୍ଲାରୁ ଏକ ଅଭାବନୀୟ ତଥା ହୃଦୟବିଦାରକ ଘଟଣା ସାମ୍ନାକୁ ଆସିଛି। ଗୁଣିଗାରେଡ଼ି ସନ୍ଦେହରେ ଜଣେ ପଡ଼ୋଶୀ ଦୁଇ ଜଣଙ୍କୁ ନିର୍ମମ ଭାବେ ହତ୍ୟା କରିଥିବା ଅଭିଯୋଗ ହୋଇଛି। ଏହି ଡବଲ ମର୍ଡର ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।
ସୂଚନା ଅନୁଯାୟୀ, ସମ୍ବଲପୁର ଗିରିପାଲି ଖଡ଼ିଆ ପଡ଼ାରେ ଏହି ଜଘନ୍ୟ କାଣ୍ଡ ଘଟିଛି। ମୃତକ ଦୁଇଜଣ ହେଉଛନ୍ତି ମା’ ଏବଂ ଝିଅ। ବିଳମ୍ବିତ ରାତିରେ ଦୁହେଁ ଘର ଅଗଣାରେ ଶୋଇଥିବା ସମୟରେ ଅଭିଯୁକ୍ତ ପଡ଼ୋଶୀ ଅଜୟ ପ୍ରଧାନ ସେମାନଙ୍କୁ ଆକ୍ରମଣ କରି ହତ୍ୟା କରିଥିଲା।
ଘଟଣା ପରେ ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି, ହତ୍ୟାକାରୀ ଅଜୟ ପ୍ରଧାନ ମା’-ଝିଅଙ୍କୁ ଜୀବନରୁ ମାରିଦେବା ପରେ ନିଜେ ପୋଲିସକୁ ଫୋନ୍ କରି ଏହି ସୂଚନା ଦେଇଥିଲା। ଏ ନେଇ ଅତିରିକ୍ତ ଏସପି ଶ୍ରୀମନ୍ତ ବାରିକ ଗଣମାଧ୍ୟମକୁ ସୂଚନା ଦେଇଛନ୍ତି।
ତେବେ ଗୁଣିଗାରେଡ଼ି ସନ୍ଦେହରେ ଏହି ହତ୍ୟାକାଣ୍ଡ ଘଟିଥିବା ପ୍ରାଥମିକ ସୂଚନାରୁ ଜଣାପଡ଼ିଛି। ଅଭିଯୁକ୍ତ ହତ୍ୟା କରିବା ପରେ ନିଜେ ପୋଲିସକୁ ଖବର ଦେଇଥିଲା। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
ଖବର ପାଇ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଅଭିଯୁକ୍ତ ଅଜୟ ପ୍ରଧାନକୁ ଅଟକ ରଖି ପୋଲିସ ପଚରାଉଚରା ଜାରିକରିଛି । ତେବେ ଏହି ଜଘନ୍ୟ କାଣ୍ଡ ପଛରେ କେବଳ ଗୁଣିଗାରେଡ଼ି ସନ୍ଦେହ ରହିଛି ନା ଅନ୍ୟ କିଛି ଶତ୍ରୁତା ରହିଛି, ସେ ନେଇ ପୋଲିସ ଅଧିକ ଖୋଳତାଡ଼ ଜାରି ରଖିଛି।
