ଚଳିତ ସପ୍ତାହ ଶେଷ ସୁଦ୍ଧା ଇରାନ ସହ ହୋଇପାରେ ଡିଲ। ଏନେଇ ସୂଚନା ଦେଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ସେ କହିଛନ୍ତି ଇରାନ ସହ ଶାନ୍ତି ପ୍ରତିଷ୍ଠା ଲାଗି ଉଦ୍ୟମ ଜାରି ରହିଛି। ତେଣେ ଇରାନ, ଲେବାନନ ଓ ଗାଜାକୁ ଯାତ୍ରା ନକରିବା ଲାଗି ଆମେରିକୀୟ ନାଗରିକଙ୍କୁ ପରାମର୍ଶ ଦେଇଛି ଜେରୁଜେଲମସ୍ଥିତ ଆମେରିକୀୟ ଦୂତାବାସ। ପଶ୍ଚିମ ଏସିଆରେ ସ୍ଥାୟୀ ଶାନ୍ତି ପ୍ରତିଷ୍ଠା ଲାଗି ପାକିସ୍ତାନ ନିରନ୍ତର ଉଦ୍ୟମ କରୁଛି। ଆମେରିକା ଓ ଇରାନ ମଧ୍ୟରେ ଶାନ୍ତି ପ୍ରତିଷ୍ଠା ଲାଗି ପାକିସ୍ତାନ ନିଜ ଆଡୁ ଉଦ୍ୟମ ଜାରି ରଖିଛି ବୋଲି କହିଛନ୍ତି ପାକିସ୍ତାନ ବୈଦେଶିକ କାର୍ଯ୍ୟାଳୟ ମୁଖପାତ୍ର ତାହିର ଅନ୍ଦରାବି। ସେ କହିଛନ୍ତି ଉପସାଗର ଅଞ୍ଚଳରେ ଦେଖାଦେଇଥିବା ଉତ୍ତେଜନା ଚିନ୍ତାଜନକ ଏବଂ ଏକ ସ୍ଥାୟୀ ବୁଝାମଣା ଲାଗି ପାକିସ୍ତାନ ଉଦ୍ୟମ କରୁଛି। ବର୍ତ୍ତମାନ ରହିଥିବା ସ୍ଥିତି କ୍ଷଣସ୍ଥାୟୀ ଏବଂ ଉତ୍ତେଜନା ହ୍ରାସ ଲାଗି ଚେଷ୍ଟା କରାଯାଉଛି। ଆମେରିକା ଓ ଇରାନ ମଧ୍ୟରେ ପୁଣି ଉତ୍ତେଜନା ପ୍ରକାଶ ପାଇବା ପରେ ସେ ଏହା କହିଛନ୍ତି। ଇରାନ ବାରମ୍ବାର ଆକ୍ରମଣ କରୁଛନ୍ତି ବୋଲି ଅଭିଯୋଗ କରିଆସୁଛନ୍ତି କୁଏତ ଓ ବାହାରିନ। ଆଞ୍ଚଳିକ ଶାନ୍ତି, ନିରାପତ୍ତା ପ୍ରତିଷ୍ଠା ପ୍ରକ୍ରିୟାକୁ ପାକିସ୍ତାନ ସର୍ବଦା ସହଯୋଗ କରିଆସିବ ବୋଲି ସେ କହିଛନ୍ତି। ଗତକାଲି ଇରାନ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବା ପାଇଁ ଆମେରିକା ପ୍ରତିନିଧି ସଭାରେ ପ୍ରସ୍ତାବ ପାରିତ ହୋଇଥିଲା। ତେବେ ପ୍ରତିନିଧି ସଭାରେ ଗୃହୀତ ଏହି ପ୍ରସ୍ତାବ ସିନେଟରେ ବି ଗୃହୀତ ହେବାର ଆବଶ୍ଯକତା ରହିଛି।
