ନନ୍ଦିଘୋଷ ବ୍ୟୁରୋ : ରାଜନୀତିର ପଶାପାଲିରେ ନିର୍ମାଣାଧୀନ ବ୍ରିଜ । ନୂଆ ସରକାରରେ ଆଗେଇ ପାରୁନି ବିଜୁ ସେତୁ କାମ । ଠିକାଦାର ଓ ବିଭାଗୀୟ ଅଧିକାରୀଙ୍କ ମନମାନିରୁ ଧୀମେଇ ଯାଇଛି ବ୍ରିଜ କାମ । ଅବଧି ସରିଥିଲେ ସୁଦ୍ଧା ଭୂଇଁରୁ ଉଠିପାରିନାହିଁ ଚମ୍ପୁଆ ବ୍ଲକ ବୈତରଣୀ ନଦୀ ଉପରେ ନିର୍ମାଣାଧୀନ ସେତୁ । ହନ୍ତସନ୍ତ ହେଉଛନ୍ତି ସ୍ଥାନୀୟ ଲୋକେ ।
ସରିଲାଣି ଡେଡଲାଇନ । ମାତ୍ର ଭୂଇଁରୁ ଉଠିପାରୁନି ବିଜୁ ସେତୁ । ଠିକାଦାରଙ୍କ ମନମାନିରୁ ସମସ୍ୟା ଭୋଗୁଛନ୍ତି ଲୋକେ ।… କେନ୍ଦୁଝର ଓ ମୟୂରଭଞ୍ଜ ଜିଲ୍ଲାକୁ ଯୋଗାଯୋଗ ସୁଗମ ପାଇଁ ଚମ୍ପୁଆ ବ୍ଲକ ଅନ୍ତର୍ଗତ ବୈତରଣୀ ନଦୀ ଉପରେ ବିଜୁ ସେତୁ ନିର୍ମାଣ ପାଇଁ ପୂର୍ବ ସରକାର ଅନୁଦାନ ଯୋଗାଇ ଦେଇଥିଲେ । ୧୪ କୋଟି ୧୬ ଲକ୍ଷ ୭୫ ହଜାର ବ୍ୟୟ ବରାଦରେ ଆରମ୍ଭ ହୋଇଥିବା ବ୍ରିଜ କାମ ୨୦୨୫ ଶେଷ ସୁଦ୍ଧା ସରିବା କଥା । ମାତ୍ର ଠିକାଦାରଙ୍କ ମନମାନି ଓ ବିଭାଗୀୟ ଅଧିକାରୀଙ୍କ ଅବହେଳାରୁ ଅବଧି ଶେଷ ହୋଇଥିଲେ ସୁଦ୍ଧା ବ୍ରିଜଟି ଭୂଇଁରୁ ଉଠିପାରି ନାହିଁ ।
କେନ୍ଦୁଝରର ଚମ୍ପୁଆ ଓ ମୟୂରଭଞ୍ଜ ଜିଲ୍ଲା ରରୁଆଁ ବ୍ଲକର ଲୋକଙ୍କ ସୁବିଧା ପାଇଁ ପୂର୍ବ ସରକାର ଯୋଗାଇ ଦେଇଥିବା ସେତୁ କାମ ସରକାର ବଦଳିବା ପରେ ଅଟକି ଯାଇଛି । ଅବଧି ସରିଥିଲେ ସୁଦ୍ଧା ପୋଲଟି ଭୂଇଁରୁ ମୁଣ୍ଡ ଟେକିପାରୁନାହିଁ । ନଦୀ ପଠାରୁ ବେଆଇନ ଭାବେ ବାଲି ଉତ୍ତୋଳନ କରି ବାଲିକୁ ଅନ୍ୟ କାମରେ ସଂପୃକ୍ତ ଠିକାଦାର ଲଗାଉଥିବା ଅଭିଯୋଗ ହୋଇଛି । ବାଲି ଚୋରାଚାଲାଣ ଉପରେ ଅଙ୍କୁଶ ଲଗାଇବା ସହ ଶୀଘ୍ର ପୋଲ କାମ ସାରିବାକୁ ଦାବି କରିଛନ୍ତି ସ୍ଥାନୀୟ ଲୋକେ । ଅନ୍ୟପଟେ ଏନେଇ କ୍ୟାମେରା ସମ୍ମୁଖରେ ମୁହଁ ଖୋଲିନାହାନ୍ତି ନିର୍ବାହୀ ଯନ୍ତ୍ରୀ ।
