୧୧ କେଭି ବିଦ୍ୟୁତ ତାର ସଂସ୍ପର୍ଶରେ ଆସି ନାବାଳିକା ଶ୍ରମିକ ମୃତ

କଳାହାଣ୍ଡି: ଗତକାଲି ସାରା ବିଶ୍ୱ ଆନ୍ତର୍ଜାତୀୟ ମହିଳା ଦିବସ ପାଳନ କରୁଥିବା ବେଳେ ଅସୁରକ୍ଷିତ ଭାବେ କାର୍ଯ୍ୟରତ ଜଣେ ନାବାଳିକା ଶ୍ରମିକର ମୃତ୍ୟୁ ଘଟିଛି । ମୃତ ଶ୍ରମିକ ଜଣକ ହେଉଛନ୍ତି ରାୟଗଡା ଜିଲ୍ଲା ଆମ୍ବୋଦଲା ଥାନା ବାଏଲଯୋଡି ଗାଁର ପ୍ରଭା କୋଶଲିଆ ।  ମିଳିଥିବା ସୂଚନା ଅନୁଯାୟୀ, ଆମ୍ବୋଦଲା ଥାନା କୁଟ୍ରୁପାଲି ଗାଁର ତିଳୋତ୍ତମା ଚଲାନଙ୍କ ଆବାସ ଯୋଜନା ଘର ତିଆରି କାମରେ ଜଣେ ପୁରୁଷ ଶ୍ରମିକ ଓ ୨ଜଣ ମହିଳା ଶ୍ରମିକ ନିୟୋଜିତ ହୋଇଥିଲେ । ଏହି କାମକୁ ଠିକାରେ ନେଇଥିଲେ ଜଗଦିଶ ଚଲାନ । ଶ୍ରମିକମାନଙ୍କ ସହ କାମ କରୁଥିବା ସମୟରେ ଘର ଉପର ଦେଇ ଯାଇଥିବା ୧୧ କେଭି ତାର ସଂସ୍ପର୍ଶରେ ଆସି ପ୍ରଭା କୋଶଲିଆ ସଂଜ୍ଞାହୀନ ହୋଇ ଘର ଉପରୁ ତଳେ ପଡିଥିଲେ । ତାଙ୍କୁ ୧୦୮ ଯୋଗେ ତୁରନ୍ତ କଳାହାଣ୍ଡି ଜିଲ୍ଲା ବିଶ୍ୱନାଥ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲା । ତେବେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ତେବେ ମେଡିକାଲରେ ପହଞ୍ଚିବା ପୂର୍ବରୁ ହିଁ ତାଙ୍କର ମୃତ୍ୟୁ ଘଟିଥିବା ଡାକ୍ତର କହିଥିଲେ ।ଅମ୍ବାଦଳା ପୁଲିସ ବିଶ୍ୱନାଥପୁର ମେଡିକାଲ ପହଞ୍ଚି ତାର ତଦନ୍ତ ଆରମ୍ଭ କରିଛି।