ବାଲେଶ୍ବରରେ ବଢ଼ିବ ମାଛ ବ୍ୟବସାୟ । ଅପରିଷ୍କାର ପରିବେଶରୁ ମିଳିବ ମୁକ୍ତି । ଏଥିପାଇଁ ବାମପଦା ନିୟନ୍ତ୍ରିତ ବଜାର କମିଟି ନିକଟରେ ନିର୍ମିତ ହୋଇଛି ହଇଜେନିକ ରିଟେଲ ଫିସ ମାର୍କେଟ । ପୂର୍ବ ସରକାରଙ୍କ ସମୟରେ ୨୦୨୧ ରୁ ଆରମ୍ଭ ହୋଇଥିଲା ହାଇଟେକ ମାଛ ବଜାର । ୫ କୋଟି ଟଙ୍କା ଖର୍ଚ୍ଚରେ ଏଠାରେ ମାଛ ବ୍ୟବସାୟ ପାଇଁ ସ୍ବତନ୍ତ୍ର ପିଣ୍ଡି ସହ ସଂରକ୍ଷିତ ରଖିବାର ବ୍ୟବସ୍ଥା କରାଯାଇଛି । କିନ୍ତୁ ପ୍ରକଳ୍ପ କାମ ସରିବାରେ ଏକବର୍ଷ ବିତିଥିଲେ ସୁଦ୍ଧା ଏହାକୁ କାର୍ଯ୍ୟକ୍ଷମ କରାଯାଉ ନାହିଁ । ଫଳରେ ରାସ୍ତାକଡ଼ରେ ବସି ମାଛ ବିକ୍ରି କରୁଛନ୍ତି ବ୍ୟବସାୟୀ । ଯାହାକୁ ନେଇ ମତ୍ସ୍ୟଜୀବୀ ଓ ଗ୍ରାହକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି
ଏହି ଉନ୍ନତ ଫିସ୍ ମାର୍କେଟରେ ରହିଛି ୬୨ ଟି ସ୍ବତନ୍ତ୍ର ପିଣ୍ଡି । ଏହାସହ ମାଛ କାଟିବା ଓ ସଫା କରିବା ପାଇଁ ପାଣି, ବର୍ଜ୍ୟଜଳ ନିର୍ଗତ ପାଇଁ ଡ୍ରେନେଜ୍, କୋଲ୍ଡ ଷ୍ଟୋରେଜ ଓ ଇଫ୍ଲୁଏଣ୍ଟ ଟ୍ରିଟମେଣ୍ଟ ପ୍ଲାଣ୍ଟ ରହିଛି । ତେବେ ପ୍ରକଳ୍ପ କାମ ଏକବର୍ଷ ହେଲା ସରିଥିବାବେଳେ ଏହାକୁ ନିୟନ୍ତ୍ରୀତ ବଜାର କମିଟିକୁ ହସ୍ତାନ୍ତର କରାଯାଇ ନାହିଁ । ଫଳରେ କୋଟି କୋଟି ଟଙ୍କାରେ ପ୍ରସ୍ତୁତ ଏହି ଫିସ ମାର୍କେଟ ନଷ୍ଟ ହେବାରେ ଲାଗିଲାଣି । ତେବେ ଇଫ୍ଲୁଏଣ୍ଟ ଟ୍ରିଟମେଣ୍ଟ ପ୍ଲାଣ୍ଟ କାର୍ଯ୍ୟ ସାମାନ୍ୟ ବାକି ରହିଛି । ଏହା ସରିବା ପରେ କମିଟିକୁ ହସ୍ତାନ୍ତର କରିବାର ବ୍ୟବସ୍ଥା କରାଯିବ ବୋଲି କହିଛନ୍ତି ଆରଏମସି ଅଧିକାରୀ ।ଯଥାଶୀଘ୍ର ପଦକ୍ଷେପ ନିଆ ନଗଲେ କୋଟି କୋଟି ଟଙ୍କାର ନିର୍ମିତ ଏହି ପ୍ରକଳ୍ପ ଭୂତକୋଠିରେ ପରିଣତ ହେବ ବୋଲି ମତ୍ସ୍ୟଜୀବୀ ଅଭିଯୋଗ କରିଛନ୍ତି ।
