ଭୁବନେଶ୍ୱର ଭିଏସଏସ ନଗର ସ୍ଥିତ ପ୍ରଭୁଜୀ ଇଂଲିଶ ମିଡିୟମ୍ ସ୍କୁଲର ୪୧ତମ ବାର୍ଷିକୋତ୍ସବ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ବାଣିଜ୍ୟ, ପରିବହନ ଓ ଖଣି ମନ୍ତ୍ରୀ ବିଭୁତି ଭୂଷଣ ଜେନା, ବିଶିଷ୍ଟ ଲେଖିକା ତଥା ସୋଆ ପ୍ରାଚୀନ ମୁଖ୍ୟ ପ୍ରଫେସର ଗାୟତ୍ରୀବାଳା ପଣ୍ଡା, ବିଶିଷ୍ଟ ନୃତ୍ୟଗୁରୁ ପଦ୍ମଶ୍ରୀ ଗୁରୁ ଦୁର୍ଗାଚରଣ ରଣବୀର, କୋଷାଧ୍ୟକ୍ଷ ସୌଭାକର ଦାସ ଫତେସିଂ, ପ୍ରଧାନ ଶିକ୍ଷକ ଅଲେଖ ଚରଣ ନାୟକ ପ୍ରମୁଖ ଯୋଗ ଦେଇଥିଲେ।
ପ୍ରତ୍ୟେକ ବିଦ୍ୟାଳୟ ଏକ ମନ୍ଦିର । ବିଶିଷ୍ଟ ଲେଖିକା ତଥା ସୋଆ ପ୍ରାଚୀନ ମୁଖ୍ୟ ପ୍ରଫେସର ଗାୟତ୍ରୀବାଳା ପଣ୍ଡା ଅଭିଭାଷଣ ରଖିଥିଲେ। ବିଦ୍ୟାଳୟକୁ ନମସ୍କାର କରି ଅଭିଭାଷଣ ଆରମ୍ଭ କରିଥିଲେ। କହିଥିଲେ, ପ୍ରତ୍ୟେକ ବିଦ୍ୟାଳୟ ଏକ ମନ୍ଦିର। ଆଜିର କୋମଳମତି ଶିଶୁ ଆସନ୍ତା କାଲିର ଭବିଷ୍ୟତ। ଦେଶ ଗଠନରେ ଶିଶୁମାନଙ୍କର ଭୂମିକା ଗୁରୁତ୍ୱପୂର୍ଣ୍ଣ। ଅଭିଭାବକମାନେ ପାଠ ପଢା ପାଇଁ ପିଲାମାନଙ୍କ ଉପରେ ଅତ୍ୟଧିକ ଚାପ ପ୍ରୟୋଗ ନକରିବା ଉଚିତ। ପିଲାମାନେ ଯାହା କରିବାକୁ ଚାହୁଁଛନ୍ତି ସେମାନଙ୍କୁ କରିବାକୁ ସୁଯୋଗ ଦେବାର ଆବଶ୍ୟକତା ରହିଛି। ପିଲାଙ୍କ ଠାରୁ ଆମେ ଅନେକ କିଛି ଶିଖିବାର ଅଛି। ପିଲାମାନେ ଭଲ ମଣିଷ ହେବା ଆବଶ୍ୟକ ବୋଲି କହିଛନ୍ତି ବିଶିଷ୍ଟ ଲେଖିକା ତଥା ସୋଆ ପ୍ରାଚୀନ ମୁଖ୍ୟ ପ୍ରଫେସର ଗାୟତ୍ରୀବାଳା ପଣ୍ଡା। କହିଥିଲେ, କେବଳ ପଢ଼ିଲେ ହେବନି ସେହି ଜ୍ଞାନକୁ କାର୍ଯ୍ୟକାରୀ କରିବା ଉଚିତ। ପ୍ରତିଟି ପିଲାଙ୍କ ଜୀବନ ଶୃଙ୍ଖଳିତ ହେବା ଆବଶ୍ୟକ। ଶୃଙ୍ଖଳା ସଂସ୍କାରରୁ ଆସେ। ତେଣୁ ପ୍ରତି ପିଲାଙ୍କୁ ଭଲ ସଂସ୍କାର ପ୍ରଦାନ ସହ ପିଲାଙ୍କ ପାଇଁ ଶୈଖିକ ବାତାବରଣର ଆବଶ୍ୟକତା ରହିଛି । ଶିଶୁର ଅନ୍ତର୍ନିହିତ ଗୁଣର ପରିପ୍ରକାଶ ହେଲେ ପିଲାଟି ଶ୍ରେଷ୍ଠତ୍ବ ହାସଲ କରିପାରିବ ବୋଲି ପରିବହନ ଓ ଖଣି ମନ୍ତ୍ରୀ ବିଭୁତି ଭୂଷଣ ଜେନା କହିଥିଲେ। ଅତିଥିମାନଙ୍କ ଦ୍ଵାରା କୃତୀ ଛାତ୍ରଛାତ୍ରୀଙ୍କୁ ପୁରସ୍କାର ପ୍ରଦାନ କରାଯାଇଥିଲା। କୁନି କୁନି ପିଲାମାନଙ୍କ ଦ୍ବାରା ନୃତ୍ୟ ପରିବେଷଣ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା।
