ଦିଲ୍ଲୀ ବ୍ଲାଷ୍ଟ: ସୁରକ୍ଷା ଏଜେନ୍ସି ରାଡାରରେ ଏସବୁ ଦେଶରେ ଏମବିବିଏସ କରିଥିବା ଡକ୍ଟର
ନନ୍ଦିଘୋଷ ବ୍ୟୁରୋ: ଦିଲ୍ଲୀ ବ୍ଲାଷ୍ଟ ପରେ ସାରା ଦେଶ ହାଇ ଆଲର୍ଟରେ ରହିଛଇ । ଆକ୍ରମଣ ପଛର ପୂରା ସତ ବାହାର କରିବାକୁ ସୁରକ୍ଷା ଏଜେନ୍ସିମାନେ ଦିନରାତି କାମ କରିବା ସହ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛନ୍ତି । ହ୍ବାଇଟ୍ କଲର ମଡ୍ୟୁଲ ଦ୍ବାରା ଦିଲ୍ଲୀ ବ୍ଲାଷ୍ଟ କରାଯାଇଥିବା ବେଳେ ପୋଲିସ ଏବେ ଦିଲ୍ଲୀରେ ଥିବା ସମସ୍ତ ଘରୋଇ ହସ୍ପିଟାଲକୁ ନୋଟିସ୍ ଜାରି କରିଛି । ଏବେ ସୁରକ୍ଷା ଏଜେନ୍ସିଙ୍କ ନଜର ବିଦେଶରୁ ଏମବିବିବଏସ ପଢ଼ି ଆସିଥିବା ଡକ୍ଟର ରହିଛନ୍ତି । ବିଶେଷ କରି ନିର୍ଦ୍ଦିଷ୍ଟ କିଛି ଦେଶରେ ଏମବିବିଏସ କରିଥିବା ଡକ୍ଟରଙ୍କ ଉପରେ ନଜର ରହିଛି ।
ଏସବୁ ଦେଶରୁ ପଢ଼ି ଥିବା ଡକ୍ଟର ଟାର୍ଗେଟରେ
ମିଳିଥିବା ସୂଚନା ଅନୁସାରେ, ବିଦେଶରେ ପାଠ ପଢ଼ି ଘରୋଇ ହସ୍ପିଟାଲରେ ପ୍ରାକ୍ଟିସ କରୁଥିବା ଡକ୍ଟରଙ୍କ ସୂଚନା ପୋଲିସ ମାଗିଛି । ଏଥିରେ ପାକିସ୍ତାନ, ବାଂଲାଦେଶ, ୟୁଏଇ ଓ ଚୀନ ଭଳି ଦେଶରେ ଏମବିବିଏସ ପଢ଼ି ଥିବା ଡକ୍ଟରଙ୍କୁ ରାଡରରେ ରଖାଯାଇଛି । ବ୍ଲାଷ୍ଟର ଲିଙ୍କ ପାକିସ୍ତାନ ଓ ତୁର୍କି ସହ ଥିବା ବି ଯାଞ୍ଚ ଏଜେନ୍ସି ଜାଣିବାକୁ ପାଇଛନ୍ତି । ଏମିତି ସ୍ଥିତିରେ ଆଗକୁ ଦେଶରେ ଏମିତି ଷଡଯନ୍ତ୍ର କରାଯିବାର ଆଶଙ୍କା ଦେଖାଦେଇଛି । ଏହି କାରଣରୁ ସୁରକ୍ଷା ଏଜେନ୍ସି ଆଲର୍ଟରେ ରହିବା ସହ ହ୍ବାଇଟ୍ କଲର ମଡ୍ୟୁଲର ପୂରା ନେଟଓ୍ବର୍କକୁ ଧରିବାକୁ ଲାଗି ପଡ଼ିଛି ।
ସୂଚନାଯୋଗ୍ୟ, ୧୦ ନଭେମ୍ବରରେ ଦିଲ୍ଲୀର ଐତିହାସିକ ଲାଲକିଲ୍ଲା ପାଖରେ ଆତ୍ମଘାତି ବିସ୍ଫୋରଣ ହୋଇଥିଲା । ଯେଉଁଥିରେ ୧୫ ଜଣଙ୍କ ମୃତ୍ୟୁ ଘଟିଥିବା ବେଳେ ୨୦ରୁ ଅଧିକ ଲୋକ ଆହତ ହୋଇଥିଲେ । ବିସ୍ଫୋରଣ ଏତେ ଭୟଙ୍କର ଥିଲା ଯେ ଉକ୍ତ କାର ସମେତ ଅନ୍ୟ ୬ଟି ଗାଡି, ଦୁଇଟି ଇ-ରିକ୍ସା ଓ ଗୋଟିଏ ଆଟୋ ରିକ୍କା ଜଳି ପାଉଁଶ ହୋଇଯାଇଥିଲା । ଏହାସହ ଆଖପାଖର କୋଠା ଓ ଦୋକାନ ଘରର ପ୍ରଭୂତ କ୍ଷତି ଘଟିଥିଲା ।
