ବ୍ରହ୍ମପୁର : ଇନ୍ଦ୍ରଚନ୍ଦ୍ର ମାନୁ ନାହାନ୍ତି ସରକାରୀ ବାବୁ । ବଂଶଗତ ଭାବେ ଗୋଟିଏ ସ୍ଥାନରେ ଚାକିରୀ କରୁଥିବାରୁ ରହୁନି ଭୟ । ଗଞ୍ଜାମରେ ଲାଗୁ ହେଉନି ବଦଳି ନିୟମ । ଉପରିସ୍ଥ ଅଧିକାରୀଙ୍କ ପୃଷ୍ଠପୋଷକତାରେ ଦେଖାଉଛନ୍ତି ହାକିମଗିରି । ଗୋଟିଏ ସ୍ଥାନରେ ୩ ବର୍ଷରୁ ଅଧିକ ସମୟ ରହିଥିବା ସରକାରୀ କର୍ମଚାରୀଙ୍କୁ ବଦଳି କରିବାକୁ ନିୟମ ରହିଛି । ହେଲେ ଗଞ୍ଜାମ ଜିଲ୍ଲାରେ ଏହି ନିୟମ ଲାଗୁ ହେଉନି । କିଛି କର୍ମଚାରୀ ୧୦ରୁ ଅଧିକ ବର୍ଷ ଗୋଟିଏ କାର୍ଯ୍ୟାଳୟରେ ଗୋଟିଏ ଚୌକିରେ ବସିଛନ୍ତି । କାମ କରିବା ତ ଦୂରର କଥା ଲୋକଙ୍କ ଭଲ ବ୍ଯବହାର ମିଳୁ ନଥିବା ଅଭିଯୋଗ ହୋଇଛି । ଏହି କାରଣରୁ ଜିଲ୍ଲାର ଅଭିଯୋଗ ଶୁଣାଣି ପ୍ରକୋଷ୍ଠରେ ଦିନକୁ ଦିନ ଅଭିଯୋଗ ସଂଖ୍ୟା ବଢିବାରେ ଲାଗିଛି । ବିଭିନ୍ନ ବିଭାଗରେ କିରାଣି ଓ କର୍ମଚାରୀ ବର୍ଷବର୍ଷ ଧରି ଗାଦି ମାଡି ବସିଥିବାରୁ ଫାଇଦା ଉଠାଇ ଶୋଷଣ କରୁଥିବା ଅଭିଯୋଗ ହୋଇଛି ।
ଦୁର୍ନୀତି ବିରୋଧ ଧରେ ସଚେତନତା ପାଇଁ ଜିଲ୍ଲାରେ ବ୍ୟାପକ କାର୍ଯ୍ୟକ୍ରମ କରାଯାଉଛି । ଅନେକ ସମୟରେ ଦୁର୍ନୀତିଖୋର ଅଧିକାରୀ ଏବଂ କର୍ମଚାରୀ ଦୁର୍ନୀତି ନିବାରଣ ଅଧିକାରୀଙ୍କ ହାବୁଡ଼ରେ ପଡୁଥିନବା ବେଳେ ଏବେ ବି ଅନେକ ଦୁର୍ନୀତି ନିବାରଣ ବିଭାଗ ନଜରରେ ଅଛନ୍ତି । ଜିଲ୍ଲାର ବ୍ଳକ ଠାରୁ ଆରମ୍ଭ କରି ତହସିଲ, ପରିବହନ, ଯୋଗାଣ, ମତ୍ସ୍ୟ ଓ ପଶୁ ସମ୍ପଦ, ବନ, କୃଷି ଓ ଉଦ୍ୟାନ ପରି ସବୁ ବୁଭାଗରେ ବର୍ଷ ବର୍ଷ ଧରି କର୍ମଚାରୀଙ୍କ ହେଉନି ବଦଳି । ଏପଟେ ସରକାର ଦୁର୍ନୀତିମୁକ୍ତ ଓଡ଼ିଶା ଗଠନ କରିବାକୁ ସ୍ୱପ୍ନ ଦେଖୁଥିବବା ବେଳେ ଆଇନ ଫାଙ୍କରେ ଦୁର୍ନୀତିରେ ଲିପ୍ତ ରହୁଛନ୍ତି କର୍ମଚାରୀ ।କ୍ୟାଡର ରୁଲ ଅନୁଯାୟୀ ବଦଳି ନୀତି କାର୍ଯ୍ୟକାରୀ କରାଯିବାକୁ ବିଭିନ୍ନ ମହଲରେ ଦାବି ହୋଇଛି ।
