ନନ୍ଦିଘୋଷ ବ୍ୟୁରୋ : ନୂଆପଡ଼ା ଉପନିର୍ବାଚନ ଫଳାଫଳ ଘୋଷଣା ପରେ ଦଳୀୟ କର୍ମୀ ଓ ନେତାଙ୍କୁ ଧନ୍ୟବାଦ ଜଣାଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ। ନୂଆପଡ଼ା ଉପନିର୍ବାଚନରେ ଯେଉଁ ନେତା, କର୍ମୀ ଓ ସମର୍ଥକ ବିଜେଡି ସପକ୍ଷରେ ଏକାଠି ହୋଇଥିଲେ, ସେମାନଙ୍କୁ କୃତଜ୍ଞତା ଜଣାଇଛନ୍ତି ନବୀନ। ସେମାନଙ୍କ ପ୍ରତିବଦ୍ଧତା ଓ ଉତ୍ସାହ ଦଳର ପ୍ରକୃତ ଶକ୍ତି ବୋଲି ଟ୍ବିଟ୍ କରି କହିଛନ୍ତି ନବୀନ। ଏହି ଅବସରରେ ବିଜେପିର ବିଜୟୀ ପ୍ରାର୍ଥୀ ଜୟ ଢୋଲକିଆଙ୍କୁ ତାଙ୍କ ବିଜୟ ପାଇଁ ଅଭିନନ୍ଦନ ଜଣାଇଛନ୍ତି। ନୂଆପଡ଼ାରେ ସାମଗ୍ରିକ ବିକାଶ ଆଣି ଜୟ ଢୋଲକିଆ ଜନାଦେଶକୁ ଉଚିତ ସମ୍ମାନ ଦେବେ ବୋଲି ନବୀନ ଆଶା କରିଛନ୍ତି। ନିର୍ବାଚନ ଆସେ ଓ ଯାଏ। କିନ୍ତୁ ଆମମାନଙ୍କର ଜନତାଙ୍କ ପ୍ରତି ସମ୍ମାନ ଓ ବିଶ୍ବାସ ସେମିତି ରହିବ। ମୁକ୍ତ ଓ ଅବାଧ ନିର୍ବାଚନ ହେଉଛି ଲୋକଙ୍କ ଗଣତାନ୍ତ୍ରିକ ଅଧିକାର । ଏହାର ଦାୟିତ୍ବ ଓ କର୍ତ୍ତବ୍ୟକୁ ବଜାୟ ରଖିବା ଆମର କାମ ବୋଲି କହିଛନ୍ତି ନବୀନ । ବିଜେଡି ବହୁ ବାଧାବିଘ୍ନ ଦେଇ ଆଗକୁ ଗତିକରିଛି । ତଥାପି ଦଳ ଲୋକଙ୍କ ସେବା କରିବାରେ କେବେ ବି ହେଳା କରିନାହିିଁ । ଆଗକୁ ମଧ୍ଯ ଲୋକଙ୍କ ସେବାରେ ଦଳ ବ୍ରତୀ ରହିବ । ବିଜୁ ବାବୁଙ୍କ ଆଦର୍ଶରେ ଗଢା ବିଜେଡି ଆଗକୁ ମଦ୍ଯ ଓଡ଼ିଶାର ସ୍ବାର୍ଥ ଲାଗି ଲଢେଇ ଜାରି ରଖିବ ବୋଲି କହିଛନ୍ତି ନବୀନ ।
