ଏ ଖେଳାଳି ନେବେ ଶ୍ରୀୟସ ଆୟରଙ୍କ ସ୍ଥାନ
ନନ୍ଦିଘୋଷ ବ୍ୟୁରୋ: ଅଷ୍ଟ୍ରେଲିଆ ଗସ୍ତର ତୃତୀୟ ଦିନିକିଆ ବେଳେ ଭାରତକୁ ଲାଗିଛି ବଡ଼ ଝଟକା । ଶେଷ ମ୍ୟାଚ୍ ଜିତି ଭାରତ ନିଜ ଇଜ୍ଜତ ବଞ୍ଚାଇଛି ସତ ହେଲେ ଷ୍ଟାର ବ୍ୟାଟର ଶ୍ରୀୟସ ଆୟର ଆହତ ହୋଇଛନ୍ତି । ଏକ କ୍ୟାଚ୍ ଧରିବା ବେଳେ ତାଙ୍କ ସ୍ପିଲିଂରେ ଆଘାତ ଲାଗିବାରୁ ତାଙ୍କୁ ସିଡନର ଏକ ହସ୍ପିଟାଲରେ ଭର୍ତ୍ତି କରାଯାଇଛି । ରିପୋର୍ଟ ଅନୁସାରେ, ଏବେ ସେ କିଛିଦିନ ହସ୍ପିଟାଲରେ ରହିବେ । ଆଉ ଫିଲ୍ଡକୁ ଓହ୍ଲାଇବାକୁ କିଛିଦିନ ଲାଗିବ । ଆଗକୁ ଟିମ୍ ଇଣ୍ଡିଆ ଦକ୍ଷିଣ ଆଫ୍ରିକା ବିପକ୍ଷରେ ଦିନିକିଆ ସିରିଜ ଖେଳିବାକୁ ଥିବା ବେଳେ ଆୟରଙ୍କ ଆଘାତ ଭାରତ ପାଇଁ ଚିନ୍ତା ବଢ଼ାଇଛି । ଏମିତି ସ୍ଥିତିରେ ଆୟରଙ୍କ ସ୍ଥାନ କିଏ ନେବ ତାକୁ ନେଇ ଚୟନକର୍ତ୍ତା ଚିନ୍ତାରେ ପଡ଼ିଛନ୍ତି ।
କିଏ ନେବ ଆୟରଙ୍କ ସ୍ଥାନ ?
ଆୟର ଟିମ୍ ଇଣ୍ଡିଆରେ ୪ ନମ୍ବରେ ବ୍ୟାଟିଂ କରନ୍ତି ଓ ତାଙ୍କ ପ୍ରଦର୍ଶନ ଦମଦାର ରହିଛି । ଏକାଧିକ ଥର ଭାରତୀୟ ଟିମକୁ କ୍ରାଇସେସରୁ ବାହାର କରିବା ସହ ବିଜୟ ଦେଇଛନ୍ତି । ଏବେ ଆଘାତ କାରଣରୁ ଏକପ୍ରକାର ସେ ଭାରତୀୟ ଟିମରୁ ବାହାର ହୋଇସାରିଛନ୍ତି । ଏମିତି ସ୍ଥିତିରେ ଚୟନକର୍ତ୍ତାଙ୍କ ନଜର ରଜତ ପାଟିଦାରଙ୍କ ଉପରେ ରହିଛି । ୩୨ ବର୍ଷିୟ ରଜତ ଘରୋଇ କ୍ରିକେଟରେ ଲାଗାତାର ଭଲ ପ୍ରଦର୍ଶନ ଜାରି ରଖିଛନ୍ତି । ଯାହା ତାଙ୍କୁ ଏହି ସ୍ଥାନ ପାଇଁ ପ୍ରଥମ ପସନ୍ଦ ବନାଇଛି ।
୨୦୨୫ ଆଇପିଏଲରେ ନିଜ ପ୍ରଦର୍ଶନ ଓ ନେତୃତ୍ବ ବଳରେ ଆରସିବିକୁ ପ୍ରଥମ ଥର ଚାମ୍ପିୟନ କରାଇଛନ୍ତି । ଏହାପରେ ଘରୋଇ କ୍ରିକେଟରେ ସେ ଭଲ ପ୍ରଦର୍ଶନ କରି ଚାଲିଛନ୍ତି । ଗତ ୪ଟି ଫାଷ୍ଟ କ୍ଲାସ୍ ମ୍ୟାଚରେ ୨ଟି ଶତକ ଓ ଗୋଟିଏ ଦ୍ବିଶତକ ମାରିଛନ୍ତି । ଏହାସହ ଦୁଇଟି ଅର୍ଦ୍ଧଶତକ ବି ତାଙ୍କ ବ୍ୟାଟରୁ ବାହାରିଛି । ନିଜ ଅଧିନାୟକତ୍ବ ବଳରେ ସେ ସେଣ୍ଟ୍ରାଲ ଜୋନ ଟିମକୁ ୧୧ ବର୍ଷ ପରେ ଦିଲୀପ ଟ୍ରଫି ଜିତାଇଛନ୍ତି ।
ରଜତ ଟିମ୍ ଇଣ୍ଡିଆ ପାଇଁ ବର୍ତ୍ତମାନ ସୁଦ୍ଧା ୩ଟି ଟେଷ୍ଟ ଓ ଗୋଟିଏ ଦିନିକିଆ ଖେଳିଛନ୍ତି । ଟେଷ୍ଟରେ ସେ ୬ଟି ଇଂନିସରେ ମାତ୍ର ୬୩ ରନ୍ କରିଛନ୍ତି । ସେହିପରି ୨୦୨୩ରେ ଦକ୍ଷିଣ ଆଫ୍ରିକା ବପକ୍ଷରେ ଟିମ୍ ଇଣ୍ଡିଆ ପାଇଁ ଗୋଟିଏ ଦିନିକିଆ ଖେଳିଛନ୍ତି । ଯେଉଁଥିରେ ସେ ୨୨ ରନ୍ କରିଥିଲେ । ଏମିତି ସ୍ଥିତିରେ ଯଦି ରଜତ ପାଟିଦାରଙ୍କୁ ଟିମ୍ ଇଣ୍ଡିଆରେ ସ୍ଥାନ ମିଳେ ତେବେ ଏହା ତାଙ୍କ କ୍ୟାରିୟର ପାଇଁ ଏକ ମୌକା ହେବାକୁ ଯାଉଛି ।
