ନନ୍ଦିଘୋଷ ବ୍ୟୁରୋ: ଆଜି ଚନ୍ଦ୍ରଗ୍ରହଣ । ଚନ୍ଦ୍ରଗହଣ ଥିବାରୁ ଆଜି ଶ୍ରୀମନ୍ଦିରରେ ଅନେକ ସ୍ୱତନ୍ତ୍ର ନୀତି କାନ୍ତି ଅନୁଷ୍ଠିତ ହେବ। ଆଜି ଇନ୍ଦ୍ର ଗୋବିନ୍ଦ ବନ୍ଦାପନା ନୀତି ସହ ଇନ୍ଦ୍ରହାତୀ ପ୍ରସ୍ତାବ ତଥା ଭାଗବତ ଜନ୍ମ ନୀତି ପାଳିତ ହେବ। ଆଜି ରାହୁ ଗ୍ରସ୍ତ ଚନ୍ଦ୍ର ଗ୍ରହଣ ପଡୁଥିବାରୁ ମଧ୍ୟରାତ୍ରରୁ ଶ୍ରୀମନ୍ଦିର ଦ୍ୱାର ଫିଟା ନୀତି ସମାପନ ପରେ ମଙ୍ଗଳ ଆଳତି ସମ୍ପୂର୍ଣ୍ଣ ହୋଇଥିଲା। ପରେ ତଡ଼ପ ଲାଗି, ଅବକାଶ ପୂଜା ସମ୍ପୂର୍ଣ୍ଣ ହେବା ସହ ରୋଷହୋମ, ବେଶ ନୀତି ସମ୍ପୂର୍ଣ୍ଣ କରାଯାଇଥିଲା। ଏହା ପରେ ସୂର୍ଯ୍ୟ ପୂଜା, ଦ୍ଵାରପାଳ ପୂଜା କରାଯାଇ ଗୋପାଳବଲ୍ଲଭ ପୂଜା ସମ୍ପୂର୍ଣ୍ଣ ହୋଇଥିଲା। ସକାଳ ଧୂପ ନୀତି ଅନିଷ୍ଠିତ ହେଉଥିବା ବେଳେ, ସକାଳ ଧୂପ ନୀତି ପରେ ଭୋଗମଣ୍ଡପ ନୀତି ଶେଷ କରାଯିବ। ଏହା ପରେ ମଧ୍ୟାହ୍ନ ଧୂପ ନୀତି କରାଯାଇ ଶ୍ରୀମନ୍ଦିରରେ ସନ୍ଧ୍ୟା ଆଳତି ନୀତି ସହ ଇନ୍ଦ୍ର ଗୋବିନ୍ଦ ବନ୍ଦାପନା ନୀତି ଦିନ ସାଢ଼େ ୧୨ ସୁଦ୍ଧା ଶେଷ କରାଯିବାକୁ ଲକ୍ଷ୍ୟ ରଖାଯାଇଛି। ଏହା ପରେ ଶ୍ରୀମନ୍ଦିରରେ ଦେବ ନୀତି ବନ୍ଦ କରାଯିବ। ଗ୍ରହଣ ସ୍ପର୍ଶ ପରେ ଶ୍ରୀମନ୍ଦିରରେ ଦେବ ନୀତି ଆରମ୍ଭ କରାଯିବା ସହ ପ୍ରଥମେ ଗ୍ରହଣ ମହାସ୍ନାନ ଓ ପରେ ଗ୍ରହଣ ଭୋଗ କରାଯିବାର ପରମ୍ପରା ରହିଅଛି।
