ନନ୍ଦିଘୋଷ ବ୍ୟୁରୋ : ରାଜସ୍ଥାନରେ ବର୍ଷା ତାଣ୍ଡବ। ହଜାର ହଜାର ଲୋକ ଜଳବନ୍ଦୀ। ବର୍ଷାରେ ୨ ମହିଳାଙ୍କ ମୃତ୍ୟୁ ଘଟିଥିବା ସୂଚନା ମିଳିଛି। ରେସ୍କ୍ୟୁ ଅପରେସନରେ ସାମିଲ ହୋଇଛି ସେନା। ପ୍ରବଳ ବର୍ଷା ଯୋଗୁ ଅନେକ ଜିଲ୍ଲା ପ୍ରଭାବିତ ହେବା ସହ ଗମନାଗମନ ବ୍ୟବସ୍ଥା ବିପର୍ଯ୍ୟସ୍ତ ହୋଇଛି। ବିପଜ୍ଜନକ ଅବସ୍ଥାରେ ଥିବା ଲୋକଙ୍କୁ ଉଦ୍ଧାର କରାଯାଇଛି। କୋଟା, ସବାଇ ମାଧୋପୁର, ଟୋଙ୍କ, ବୁଣ୍ଡି ଜିଲ୍ଲା ସମେତ ୮ ଜିଲ୍ଲାରେ ବର୍ଷା ତାଣ୍ଡବ ରଚିଛି। ଗତ ୨୪ ଘଣ୍ଟା ଭିତରେ ୫୦୨ ମିଲିମିଟର ବର୍ଷା ହେବା ଯୋଗୁ ନାହିଁ ନଥିବା ପରିସ୍ଥିତି ସୃଷ୍ଟି ହୋଇଛି। ଆର୍ମି ସମେତ ଏନଡିଆରଏଫ, ଏସଡିଆରଏଫ ବି ମୁତୟନ ହୋଇଛନ୍ତି. ଏହା ସହ ଏମଆଇ-୧୭ ହେଲିକପ୍ଟର ବି ଉଦ୍ଧାର କାର୍ଯ୍ଯରେ ନିୟୋଜିତ ହୋଇଛି। ସବାଇ ମାଧୋପୁରରେ ୩୦ରୁ ଅଧିକ ଗ୍ରାମ ଜଳମଗ୍ନ ହୋଇଛି। ରେଳ ଚଳାଚଳ ପ୍ରଭାବିତ ହୋଇଥିବାବେଳେ ଜିଲ୍ଲା ପ୍ରଶାସନମାନଙ୍କ ପକ୍ଷରୁ ଉଦ୍ଧାର କାର୍ଯ୍ୟ କରାଯାଉଛି। ରିଲିଫ ଓ ଉଦ୍ଧାର କାର୍ଯ୍ୟର ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ ଭଜନ ଲାଲ ଶର୍ମା। ବନ୍ଯା ପ୍ରଭାବିତ ଅଞ୍ଚଳ ବି ଗସ୍ତ କରି ସ୍ଥିତି ସମୀକ୍ଷା କରିଛନ୍ତି ଲୋକସଭା ବାଚସ୍ପତି ତଥା କୋଟା-ବୁଣ୍ଡି ସାଂସଦ ଓମ ବିରଲା।
