ଜାପାନରେ ଶକ୍ତିଶାଳୀ ଭୂମିକମ୍ପ ଝଟକା ; ରିକ୍ଟର ସ୍କେଲରେ ତୀବ୍ରତା ୫.୪

ନନ୍ଦିଘୋଷ ବ୍ୟୁରୋ: ଜାପାନରେ ପୁଣି ଥରେ ଭୂମିକମ୍ପର ଏକ ଶକ୍ତିଶାଳୀ ଝଟକା ଅନୁଭୂତ ହୋଇଛି । ଆଜି ଟାଟସୁଗୋରେ ଏହି ଭୂମିକମ୍ପ ହୋଇଥିଲା । ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୫.୪ ମାପ କରାଯାଇଛି। ଭୟରେ ଲୋକମାନେ ଘରୁ ବାହାରି ଆସିଥିବାର ଦେଖିବାକୁ ମିଳିଛି । ଭୂମିକମ୍ପର କେନ୍ଦ୍ରସ୍ଥଳ ଭୂମିର ୧୦ କିଲୋମିଟର ଗଭୀରରେ ଥିଲା। ନିକଟରେ ଆମାମି କାଗୋସିମାରେ ୫.୫ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା।

ଏସୀୟ ଦେଶ ଜାପାନ ପ୍ରଶାନ୍ତ ମହାସାଗରରେ ଅବସ୍ଥିତ। ଏହା ଭୂମିକମ୍ପ ଦ୍ୱାରା ସର୍ବାଧିକ ପ୍ରଭାବିତ ସ୍ଥାନ ତାଲିକାରେ ଆସେ। ଏହା ପ୍ରଶାନ୍ତ ମହାସାଗରୀୟ ଅଗ୍ନି ବଳୟରେ ଅବସ୍ଥିତ। ଏହା ସେହି ସ୍ଥାନ ଯେଉଁଠାରେ ତିନୋଟି ଟେକ୍ଟୋନିକ୍ ପ୍ଲେଟ୍, ପ୍ରଶାନ୍ତ ମହାସାଗରୀୟ, ଫିଲିପାଇନ୍ସ ଏବଂ ୟୁରେସିଆନ୍ ପ୍ଲେଟ୍ ମିଶିଥାନ୍ତି। ଏହି କାରଣରୁ, ପ୍ରତିଦିନ ଜାପାନର ବିଭିନ୍ନ ସ୍ଥାନରେ ଭୂମିକମ୍ପ ଅନୁଭୂତ ହୁଏ। ପ୍ରତିବର୍ଷ ଜାପାନର ଟୋକାରା ଅଞ୍ଚଳରେ ୧୦୦ରୁ ଅଧିକ ଭୂମିକମ୍ପ ହୁଏ। ଟୋକାରାରେ ମୋଟ ୧୨ଟି ଦ୍ୱୀପ ଅଛି, ଯେଉଁଠାରେ ମୋଟ ୭୦୦ ଲୋକ ବାସ କରନ୍ତି।

ଗୋଟିଏ ଦିନରେ ୧୮୩ ଥର ଥରିଲା ପୃଥିବୀ

ଏକ ରିପୋର୍ଟ ଅନୁଯାୟୀ, ଜାପାନର ଟୋକାରା ଦ୍ୱୀପପୁଞ୍ଜରେ ଗତକିଛି ଦିନ ମଧ୍ୟରେ ବାରମ୍ବାର ଭୂମିକମ୍ପର ସମ୍ମୁଖୀନ ହୋଇଛି। ଆପଣ ଶୁଣିଲେ ଆଶ୍ଚର୍ଯ୍ୟ ହେବେ ୨୩ ଜୁନ୍ ୨୦୨୫ରେ ଗୋଟିଏ ଦିନରେ ୧୮୩ଟି ଭୂମିକମ୍ପ ରେକର୍ଡ କରାଯାଇଥିଲା। ଏହା ପରେ ପରିସ୍ଥିତି ମଧ୍ୟ କମ୍ ଚିନ୍ତାଜନକ ହୋଇନାହିଁ। ୨୬ ଜୁନ୍ ରେ ୧୫ଟି, ୨୭ ଜୁନ୍ ରେ ୧୬ଟି, ୨୮ ଜୁନ୍ ରେ ୩୪ଟି ଏବଂ ୨୯ ଜୁନ୍ ରେ ୯୮ଟି ଭୂମିକମ୍ପ ଅନୁଭୂତ ହୋଇଥିଲା।

ଜାପାନରେ ଏତେ ଭୂମିକମ୍ପ କାହିଁକି ହୁଏ?

ଏହା ପ୍ରଥମ ଥର ନୁହେଁ ଯେ ଟୋକାରା ଦ୍ୱୀପପୁଞ୍ଜ ଏପରି ଭୂମିକମ୍ପର ହେଉଛି। ସେପ୍ଟେମ୍ବର ୨୦୨୪ରେ ୩୪୬ଟି ଭୂମିକମ୍ପ ଘଟିଥିବା ବେଳେ, ୨୦୨୧ରେ ୩୦୮ଟି ଭୂମିକମ୍ପ ଅନୁଭୂତ ହୋଇଥିଲା। ଏହା ସ୍ପଷ୍ଟ କରେ ଯେ ଏହି ଅଞ୍ଚଳ ଭୌଗୋଳିକ ଦୃଷ୍ଟିରୁ ଅତ୍ୟନ୍ତ ସକ୍ରିୟ ଏବଂ ସମ୍ବେଦନଶୀଳ।