ଚେନାବ ସେତୁ ଏବଂ ବନ୍ଦେ ଭାରତ ଭେଟି ଦେଖି ଚିହିଁକି ଉଠିଲା ପାକିସ୍ତାନ, କହିଲା ଏମିତି ..

ନନ୍ଦିଘୋଷ ବ୍ୟୁରୋ: ପହଲଗାମ ଆତଙ୍କବାଦୀ ଆକ୍ରମଣ ପରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତକାଲି ପ୍ରଥମ ଥର ପାଇଁ ଜମ୍ମୁ କାଶ୍ମୀର ଗସ୍ତ କରିଥିଲେ। ଏହି ସମୟରେ ସେ ବିଶ୍ୱର ସବୁଠାରୁ ଉଚ୍ଚ ରେଳ ପୋଲ ‘ଚେନାବ ସେତୁ’ ଉଦଘାଟନ କରି ଦେଶକୁ ଉତ୍ସର୍ଗ କରିଥିଲେ। ଏହି ଅବସରରେ ପ୍ରଧାନମନ୍ତ୍ରୀ ମୋଦୀ ହାତରେ ତ୍ରିରଙ୍ଗା ଧରି ଚେନାବ ସେତୁ ଉପରେ ଚାଲି ପାକିସ୍ତାନକୁ ଚକିତ କରିଥିଲେ। ପ୍ରଧାନମନ୍ତ୍ରୀ ମୋଦୀ ପାକିସ୍ତାନକୁ କଡା ସମାଲୋଚନା କରି କହିଥିଲେ ଯେ ଏହା ପହଲଗାମରେ ମାନବିକତା ଏବଂ କାଶ୍ମୀରିୟତ (କାଶ୍ମୀରର ସାଂସ୍କୃତିକ ପରିଚୟ) ଉପରେ ନିନ୍ଦନୀୟ ଆକ୍ରମଣର ଜବାବ । ପ୍ରଧାନମନ୍ତ୍ରୀଙ୍କ ଏହି କଠୋର ବୟାନ ପରେ ବିଚଳିତ ହୋଇପଡିଛି ପାକିସ୍ତାନରେ ।

ଏହି ସମୟରେ ପ୍ରଧାନମନ୍ତ୍ରୀ ମୋଦି କହିଥିଲେ ଯେ ପାକିସ୍ତାନ ଗରିବଙ୍କ ରୋଟୀ ଏବଂ ରୋଜଗାରର ମଧ୍ୟ ଶତ୍ରୁ। ସେ ଚେତାବନୀ ଦେଇ କହିଛନ୍ତି ଯେ ଯିଏ କାଶ୍ମୀରର ବିକାଶକୁ ରୋକିବାକୁ ଚେଷ୍ଟା କରିବ, ତାକୁ ପ୍ରଥମେ ନରେନ୍ଦ୍ର ମୋଦୀର ସାମ୍ନା କରିବାକୁ ପଡିବ ।” ପ୍ରଧାନମନ୍ତ୍ରୀ ମୋଦିଙ୍କ ଏହି ବୟାନ ଉପରେ ପ୍ରତିକ୍ରିୟା ଦେଇ ପାକିସ୍ତାନର ବୈଦେଶିକ ମନ୍ତ୍ରଣାଳୟ କହିଛି, “ପାକିସ୍ତାନ ଜମ୍ମୁ-କାଶ୍ମୀର ସମ୍ପର୍କରେ ଭାରତର ପ୍ରଧାନମନ୍ତ୍ରୀଙ୍କ ଦ୍ୱାରା ଦିଆଯାଇଥିବା ମିଥ୍ୟା ଏବଂ ଭ୍ରମିତ ବୟାନକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରୁଛି।”

ପହଲଗାମ ଆକ୍ରମଣ ଉପରେ ପାକିସ୍ତାନ କଣ କହିଲା ?

ପାକିସ୍ତାନ ବୈଦେଶିକ ମନ୍ତ୍ରଣାଳୟ ଆହୁରି କହିଛି, “ଏପରି ବୟାନ ପ୍ରକୃତ ପ୍ରସଙ୍ଗଗୁଡ଼ିକରୁ ବିଶ୍ୱର ଧ୍ୟାନ ହଟାଇବା ପାଇଁ ଏକ ପ୍ରୟାସ, ବିଶେଷକରି ସେହି ଅଞ୍ଚଳରେ ଯେଉଁଠାରେ ଲୋକଙ୍କ ସହିତ ନିରନ୍ତର ଦୁର୍ବ୍ୟବହାର କରାଯାଉଛି। ଆମେ ଦୁଃଖିତ ଯେ ଭାରତୀୟ ପ୍ରଧାନମନ୍ତ୍ରୀ ପହଲଗାମ ଆକ୍ରମଣ ପାଇଁ ପୁଣି ଥରେ କୌଣସି ପ୍ରମାଣ ବିନା ପାକିସ୍ତାନକୁ ଦାୟୀ କରିଛନ୍ତି।”

ପାକିସ୍ତାନ ପୁଣି ଥରେ ଜମ୍ମୁ-କାଶ୍ମୀର ପ୍ରସଙ୍ଗ ଉଠାଇଲା

ପାକିସ୍ତାନ ପୁନର୍ବାର ଜମ୍ମୁ କାଶ୍ମୀର ସମ୍ପର୍କରେ ଧମକ ଦେଇ କହିଛି, “ଜମ୍ମୁ କାଶ୍ମୀର ଏକ ଆନ୍ତର୍ଜାତୀୟ ସ୍ତରରେ ବିବାଦିତ ଅଞ୍ଚଳ, ଯାହାର ଚୂଡ଼ାନ୍ତ ନିଷ୍ପତ୍ତି ଜାତିସଂଘର ନିଷ୍ପତ୍ତି ଏବଂ କାଶ୍ମୀରୀ ଲୋକଙ୍କ ଇଚ୍ଛା ଅନୁଯାୟୀ ହେବା ଉଚିତ। କୌଣସି ଦାବି କିମ୍ବା ବିବୃତ୍ତି ଏହି ସତ୍ୟକୁ ବଦଳାଇ ପାରିବ ନାହିଁ। ଭାରତ ଅଧିକୃତ କାଶ୍ମୀର (IOJK)ରେ ବିକାଶର କଥା ମିଥ୍ୟା ଭଳି ମନେହୁଏ  । ବହୁ ସଂଖ୍ୟକ ସୈନ୍ୟ ମୁତୟନ କରାଯାଇ ଲୋକଙ୍କ ସ୍ୱାଧୀନତା ଛଡ଼ାଇ ନିଆଯାଏ, ବିନା କାରଣରେ ଗିରଫଦାରୀ କରାଯାଏ, ଯାହା ଆନ୍ତର୍ଜାତୀୟ ଆଇନର ଉଲ୍ଲଂଘନ।”

ପାକିସ୍ତାନ ବିଶ୍ୱର ବିଭିନ୍ନ ଦେଶ, ଜାତିସଂଘ ଏବଂ ମାନବାଧିକାର ସଂଗଠନଗୁଡ଼ିକୁ ସେଠାରେ ହେଉଥିବା ଅତ୍ୟାଚାର ପାଇଁ ଭାରତକୁ ଦାୟୀ କରିବାକୁ ଏବଂ କାଶ୍ମୀରବାସୀଙ୍କୁ ଆତ୍ମନିର୍ଣ୍ଣୟର ଅଧିକାର ଅର୍ଥାତ୍ ନିଜ ଭବିଷ୍ୟତ ନିଜେ ନିଷ୍ପତ୍ତି ନେବାର ଅଧିକାର ପାଇବା ନିଶ୍ଚିତ କରିବାକୁ ନିବେଦନ କରିଛି। ପାକିସ୍ତାନ ଆହୁରି କହିଛି, “ଆମେ ସର୍ବଦା କାଶ୍ମୀରବାସୀଙ୍କ ଅଧିକାର ଏବଂ ସମ୍ମାନ ପାଇଁ ସେମାନଙ୍କ ଲଢ଼େଇରେ ସେମାନଙ୍କ ସହିତ ଛିଡ଼ା ହେବୁ।”