ରାମ ନବମୀ ମହୋତ୍ସବ ପାଇଁ ଉତ୍ସବ ମୁଖର ଦ୍ବିତୀୟ ଅଯୋଧ୍ୟା ଫତେଗଡ଼ ରାମ ମନ୍ଦିର

ନୟାଗଡ଼: ପାହାଡ଼ର ଶିଖରରେ ମନଲୋଭା ସୌନ୍ଦର୍ଯ୍ୟ । ଶାନ୍ତ ପରିବେଶ ମଧ୍ୟରେ ଦୁଇଟି ପାହାଡ଼କୁ କାଟି ୧୬ ଶହ ଫୁଟ ପାହାଡ଼ ଉପରେ ୩୬ ଏକର ଜାଗାରେ ନିର୍ମାଣ ହୋଇଛି ଭବ୍ୟ ରାମ ମନ୍ଦିର । ଯାହାର କାରୁ କାର୍ଯ୍ୟ ଦେଖିଲେ ଆଖି ଝଲସି ଉଠିବ । ଏହି ଭବ୍ୟ ରାମ ମନ୍ଦିରକୁ ଦେଖିବା ପାଇଁ ଦୂର ଦୂରାନ୍ତରୁ ଆସୁଛନ୍ତି ହଜାର ହଜାର ଭକ୍ତ ଏବଂ ଶ୍ରଦ୍ଧାଳୁ । ଆଉ ରାମ ନବମୀ ପାଇଁ ଏବେ ଚାଲିଛି ମହୋତ୍ସବ । ଯାହାକୁ ଦେଖିବାକୁ ଲାଗୁଛି ହଜାର ହଜାର ଶ୍ରଦ୍ଧାଳୁଙ୍କ ଭିଡ଼ ।

ଶ୍ରୀରାମ ନବମୀ ମହୋତ୍ସବକୁ ନେଇ ଚଳଚଞ୍ଚଳ ହୋଇପଡ଼ିଛି ନୟାଗଡ଼ ଜିଲ୍ଲାର ପ୍ରସିଦ୍ଧ ଫତେଗଡ଼ ରାମ ମନ୍ଦିର । ପୂରା ସଜେଇ ହୋଇଛି ଫତେଗଡ଼ ଗାଁ । ଆଉ ଭଳିକି ଭଳି ଫୁଲରେ ସଜେଇ ହୋଇଛି ମନ୍ଦିର । ରାମ ଲାଲାଙ୍କ ଦର୍ଶନ ପାଇଁ ଦିନ ରାତି ଜମୁଛି ଶ୍ରଦ୍ଧାଳୁଙ୍କ ଭିଡ଼ । ଭଗବାନ ବିଷ୍ଣୁଙ୍କ ସପ୍ତମ ଅବତାରକୁ ଭଗବାନ ରାମଙ୍କ ଜନ୍ମ ଦିବସ ଭାବରେ ପାଳନ କରାଇଥାଏ । ଏହି ଶୁଭ ମୂହୁର୍ତ୍ତକୁ ଶ୍ରଦ୍ଧାଳୁମାନେ ରାମନବମୀ ରୂପେ ପାଳନ କରିଥାନ୍ତି । ସେଥିପାଇଁ ରାମ ନବମୀ ଉତ୍ସବ ଧର୍ମ, ଶକ୍ତିର ମହିମା, ଭଲ ଓ ଖରାପ ମଧ୍ୟରେ ସଂଘର୍ଷକୁ ଦର୍ଶାଇଥାଏ । ହିନ୍ଦୁଙ୍କ ପାଇଁ ଏହି ପର୍ବର ମହତ୍ତ୍ୱ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଚୈତ୍ର ମାସ ଶୁକ୍ଳପକ୍ଷର ନବମୀ ତିଥିରୁ ରାମନବମୀ ପାଳିତ ହୋଇଥାଏ । ଏନେଇ ଦ୍ୱିତୀୟ ଅଯୋଧ୍ୟା କୁହାଯାଉଥିବା ଫତେଗଡ ରାମ ମନ୍ଦିରରେ ଶ୍ରୀରାମ ନବମୀ ପାଇଁ ମାର୍ଚ୍ଚ ୨୯ ତାରିଖରୁ ଉତ୍ସବ ପାଳିତ ହେଉଛି । ଏପ୍ରିଲ ୬ ତାରିଖରେ ଉତ୍ସବର ପୂର୍ଣ୍ଣାହୂତି ହେବ ।

ହିନ୍ଦୁ ଧର୍ମଶାସ୍ତ୍ର ଅନୁଯାୟୀ ଚୈତ୍ର ନବମୀରେ ଶ୍ରୀରାମଙ୍କ ଜନ୍ମ ଦିବସ ଅବସରରେ ପବିତ୍ର ରାମ ନବମୀ ଉତ୍ସବ ପାଳିତ ହୋଇଥାଏ । ଏହି ଅବସରରେ ନୟାଗଡ଼ର ପ୍ରସିଦ୍ଧ ଫତେଗଡ ରାମ ମନ୍ଦିରରେ ରାମ ନାମ ଧ୍ଵନୀରେ କମ୍ପୁଛି ପରିବେଶ । ପବିତ୍ର ରାମ ନବମୀ ଉପଲକ୍ଷେ ମନ୍ଦିରରେ ଭଜନ କୀର୍ତ୍ତନ, ଅଖଣ୍ଡ ପାଠ ଆଦି ଅନୁଷ୍ଠିତ ହେଉଛି । ରାମ ଚରିତ ମାନସ ପାଠ ଶୁଣିବାକୁ ବହୁ ସଂଖ୍ୟାରେ ଶ୍ରଦ୍ଧାଳୁଙ୍କ ଭିଡ଼ ଜମୁଛି । ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ୩ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଛନ୍ତି । ଏହାସହ ଶ୍ରଦ୍ଧାଳୁଙ୍କ ଶୃଙ୍ଖଳିତ ଦର୍ଶନ ପାଇଁ ୨ ଶହରୁ ଅଧିକ ମନ୍ଦିର କମିଟି ସଦସ୍ୟ ଦାୟିତ୍ଵରେ ରହିଛନ୍ତି ।