ନିମାପଡ଼ା : ପୁରୀ ଜିଲ୍ଲା ନିମାପଡ଼ା ସ୍ଥିତ ଓମ୍ଫେଡ ଏବଂ ପୁରୀ ମିଲ୍କ ୟୁନିଅନ ସୋସାଇଟ ଲିମିଟେଡ ଅଫିସ ମୁଖ୍ୟ ଫାଟକ ସାମ୍ନାରେ କର୍ମଚାରୀଙ୍କ କାର୍ଯ୍ୟବନ୍ଦ ଆନ୍ଦୋଳନ। ସୂଚନା ଅନୁଯାୟୀ ପୁମୁଲ ପ୍ଲାଣ୍ଟରେ ଦୈନିକ କାମ କରୁଥିବା ୮୨ରୁ ଉର୍ଦ୍ଧ୍ବ କର୍ମଚାରୀଙ୍କୁ ଆଜକୁ ପ୍ରାୟ ୭ମାସରୁ ଉର୍ଦ୍ଧ୍ବ ହେବ ବେତନ ମିଳୁନଥିବା ଅଭିଯୋଗରେ ଆଜି ମୁଖ୍ୟ ଫାଟକ ସାମନାରେ ସମସ୍ତ କର୍ମଚାରୀ ଆନ୍ଦୋଳନ କରିବା ସହିତ ବିକ୍ଷୋଭ ପ୍ରଦର୍ଶନ କରିଥିଲେ।୬ମାସ ତଳେ ନିମାପଡ଼ା ବିଧାୟିକା ତଥା ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ପ୍ଲାଣ୍ଟ ପରିଦର୍ଶନ କରିବା ସହିତ ସେଠାରେ ଥିବା କର୍ମଚାରୀଙ୍କ ସହ ଆଲୋଚନା କରି ଖୁବ୍ ଶୀଘ୍ର ସମସ୍ତ ସମସ୍ୟାର ସମାଧାନ କରିବେ ବୋଲି ପ୍ରତିଶୃତି ଦେଇଥିଲେ।ମାତ୍ର ୭ମାସ ବିତିଯାଇଥିଲେ ମଧ୍ୟ ଏଠାରେ କାମ କରୁଥିବା କର୍ମଚାରୀ ମାନଙ୍କ ଅବସ୍ଥା ଏ ପର୍ଯ୍ୟନ୍ତ ସୁଧୁରି ନାହିଁ। ଯାହା ଦ୍ଵାରା ଆଜି ମୁଖ୍ୟ ଫାଟକ ସାମନାରେ ସମସ୍ତ କର୍ମଚାରୀ ଆନ୍ଦୋଳନ କରୁଥିବା ଦେଖିବାକୁ ମିଳିଛି। ଆନ୍ଦୋଳନରେ ବସିରହିଥିବା କର୍ମଚାରୀଙ୍କୁ ବୁଝାସୁଝା କରିବାକୁ ଆସିଥିବା ଓମ୍ଫେଡର ଦୁଇଜଣ ଉପରିସ୍ଥ କର୍ମଚାରୀ ଓ ପୁମୁଲ୍ ଜିଲ୍ଲା ଜେନେରାଲ ମ୍ୟାନେଜରଙ୍କୁ କର୍ମଚାରୀ ମାନେ ଘେରିବା ସହିତ ଦୀର୍ଘ ସମୟ ଅଟକ ରଖିଥିବା ଜଣାପଡିଛି।
