ପୁରୀ: ମହାପ୍ରଭୁଙ୍କ ରଥ ନିର୍ମାଣ ନେଇ ଫାଶୀ କାଠ ଦାନ କରିଥିବା ବ୍ୟକ୍ତିଙ୍କୁ ସମ୍ବର୍ଦ୍ଧନା । ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଗଜପତି ମହାରାଜା ସମ୍ବର୍ଦ୍ଧିତ କରିଛନ୍ତି । ୨୦୨୩-୨୪ ବର୍ଷ ରଥ ନିର୍ମାଣ ପାଇଁ ପ୍ରାୟ ୮୦ ଜଣଙ୍କୁ ସମ୍ମାନିତ କରାଯାଇଛି। ଅନୁଗୁଳ, ଖୋର୍ଦ୍ଧା, ଗଞ୍ଜାମ, ନୟାଗଡ଼ ଆଦି ଅଞ୍ଚଳରୁ ଫାଶୀ କାଠ ଦାନ କରିଥିଲେ କିଛି ବ୍ୟକ୍ତି । ମହାପ୍ରଭୁଙ୍କ ଲାଗି ଖଣ୍ଡୁଆ, ଫଟୋଚିତ୍ର, ଶୁଖିଲା ଭୋଗ ଓ ମାନପତ୍ର ଦିଆଯାଇ ସମସ୍ତଙ୍କୁ ସମ୍ବର୍ଦ୍ଧନା କରାଯାଇଛି। ଆଗାମୀ ରଥଯାତ୍ରା ପାଇଁ ଫାଶୀ କାଠ ଦାନ କରିବାକୁ ଥିବା ବ୍ୟକ୍ତି ମାନଙ୍କର ତାଲିକା ପ୍ରସ୍ତୁତ କରାଯାଇଛି। ଇଛୁକ ବ୍ୟକ୍ତି ମାନେ ମହାପ୍ରଭୁଙ୍କ ରଥନିର୍ମାଣ ପାଇଁ ଫାଶୀ କାଠ ଦାନ କରିପାରିବେ ବୋଲି କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।ସେଇଭଳି ରଥକାଠ ଅଭାବ ପୁରଣ ପାଇଁ ୧୦୬ ଟି ବନ ପ୍ରକଳ୍ପ ସୃଷ୍ଟି କରାଯାଇଛି ।ବିଗତ ଅନେକ ବର୍ଷ ହେବ ବିଭିନ୍ନ ସମୟରେ ମହାପ୍ରଭୁଙ୍କ ରଥ ନିର୍ମାଣ ପାଇଁ ଫାଶୀ କାଠ ଅଭାବ ଦେଖିବାକୁ ମିଳୁଥିବା ବେଳେ ବିଭିନ୍ନ ସମୟରେ ଦାତାମାନେ ନିଜ ବାରି, ବଗିଚା ବା ଜମିରେ ଲାଗି ଥିବା ଫାଶୀ କାଠକୁ ଦାନ କରି ମହାପ୍ରଭୁଙ୍କ ସେବା କରିବାର ସୌଭାଗ୍ୟ ପାଉଛନ୍ତି । ଏଥିପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସମସ୍ତଙ୍କୁ କୃତଜ୍ଞତା ପ୍ରଦାନ କରାଯାଇଛି।
