ସହିଦ ରଘୁ ଦିବାକର ସଂସ୍କୃତି ଭବନ ଉପରକୁ ଦୁର୍ବୃତ୍ତଙ୍କ ଗୁଳିମାଡ଼, କାରଣ ଅସ୍ପଷ୍ଟ
ନୟାଗଡ଼: ନୟାଗଡ଼ ଟାଙ୍ଗୀ ସହିଦ ରଘୁ ଦିବାକର ସଂସ୍କୃତି ଭବନରେ ଗୁଳିକାଣ୍ଡ । ଗତକାଲି ବିଳମ୍ବିତ ରାତ୍ରିରେ ଗୁଳିକାଣ୍ଡ ଘଟିଥିବା ବେଳେ ଏଥିରେ କେହି ମୃତାହତ ହୋଇନଥିବା ସୂଚନା ରହିଛି । ୨ ରାଉଣ୍ଡ ଗୁଳି ଚାଳନା କରି ଫେରାର ହୋଇଯାଇଥିଲେ ଦୁର୍ବୃତ୍ତ । ସୂଚନା ଅନୁସାରେ ପ୍ରତିଦିନ ଭଳି କିଛି ଯ଼ୁବକ ସଂସ୍କୃତି ଭବନ ପରିସରରେ ଶୋଇଥିଲେ ।
ରାତି ପ୍ରାୟ ୨ଟା ପାଖାପାଖିରେ କିଛି ଦୁର୍ବୃତ୍ତ ମଟରସାଇକଲରେ ଆସି ଗ୍ରୀଲ୍ ଭାଙ୍ଗିବାକୁ ଉଦ୍ୟମ କରିଥିଲେ । ତେବେ ଏହି ସମୟରେ କିଛି ଜଣ ଉଠି ବାହାରକୁ ଦେଖିବାକୁ ଆସିଥିବା ବେଳେ ଦୁର୍ବୃତ୍ତ ଗୁଳିମାଡ କରି ଫେରାର ହୋଇଯାଇଥିଲେ ।
ଅନ୍ୟପଟେ ଖବର ପାଇ ଚାନ୍ଦପୁର ପୋଲିସ ଘଟଣା ସ୍ଥଳରେ ପହଞ୍ଚି ଛାନଭିନ୍ ଆରମ୍ଭ କରିଛି । ଘଟଣାସ୍ଥଳରୁ ଦୁଇଟି ଖୋକା ଜବତ କରିଛି ପୋଲିସ । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି ।
