ମାର୍ଚ୍ଚ ଶେଷକୁ ଫେରିବେ ସୁନିତା ୱିଲିୟମସ ଏବଂ ବଚ୍ ଓ୍ବିଲମୋର, ନାସା ଦେଲା ସୂଚନା

ନୂଆଦିଲ୍ଲୀ: ମହାକାଶରେ ଫସିଥିବା ସୁନୀତା ଓ୍ବିଲିୟମ୍ସ ଏବଂ ବଚ୍ ଓ୍ବିଲମୋର କେବେ ଫେରିବେ ତାକୁ ନେଇ ଚର୍ଚ୍ଚା ଲାଗି ରହିଛି । ଉଭୟଙ୍କ ଫେରିବା ଆଶା ଆଶଙ୍କା ଭିତରରେ ଥିବା ବେଳେ ନାସା ଦେଇଛି ଏକ ଭଲ ଖବର । ଦୀର୍ଘ ୮ ମାସ ପରେ ମହାକାଶରେ ଫସିଥିବା ଦୁଇ ମହାକାଶଚାରୀ ସୁନୀତା ଏବଂ ବଚ୍ ଚଳିତମାସ ଶେଷ ଭାଗରେ ପୃଥିବୀକୁ ଫେରିବେ । ଏନେଇ ନାସା ପକ୍ଷରୁ ସ୍ପଷ୍ଟ କରାଯାଇଛି ।

ନାସା ପକ୍ଷରୁ କୁହାଯାଇଛି, ଚଳିତମାସ ୧୨ ତାରିଖରେ ଉଭୟଙ୍କୁ ଅନ୍ତର୍ଜାତୀୟ ମହାକାଶ ଷ୍ଟେସନରେ ରିପ୍ଲେସ କରିବେ ଅନ୍ଯ ମହାକାଶଚାରୀ। ଏହାର କିଛି ଦିନ ପରେ ଦୁହେଁ ପୃଥିବୀ ଫେରିବା ସମ୍ଭାବନା ରହିଛି । ସୁନୀତା ଓ ୱିଲମୋରଙ୍କୁ ଯେଉଁମାନେ ରିପ୍ଲେସ କରିବେ ସେମାନେ ହେଲେ କମାଣ୍ଡର ଆନେ ମ୍ୟାକ୍ଲେନ, ପାଇଲଟ ନିକୋଲ ଆୟର୍ସ, ମିସନ ସ୍ପେସାଲିଷ୍ଟ ତାକୁୟା ଓନିସି ଏବଂ ରସକସମସ କସମୋନଟ କିରିଲ ପେସକୋଭ ।

ମହାକାଶରେ ଫସିଥିବା ସୁନୀତା ଓ ୱିଲମୋରଙ୍କୁ ଭେଟିବା ପରେ ସମ୍ଭାବ୍ୟ ଅସୁସ୍ଥତାରୁ ବର୍ତ୍ତିବା ଲାଗି ଏହି ୪ ମହାକାଶଯାତ୍ରୀ ଦୁଇ ସପ୍ତାହ ଧରି ଆଇସୋଲେସନରେ ରହିବେ । ଆସନ୍ତା ୧୨ରେ ସ୍ପେସ ଏକ୍ସ ଫାଲକନ-୯ ରକେଟର ଡ୍ରାଗନ ସ୍ପେସକ୍ରାଫ୍ଟରେ ସେମାନେ ମହାକାଶକୁ ଯିବେ । ନାସାର କେନେଡି ସ୍ପେସ ସେଣ୍ଟରରୁ ଏହାକୁ ଉତକ୍ଷେପଣ କରାଯିବ । ତେବେ ପାଣିପାଗ ଉପରେ ୨ ମହାକାଶଚାରୀଙ୍କ ଫେରିବା ନିର୍ଭର କରେ ବୋଲି କହିଛି ନାସା । ଗତବର୍ଷ ଜୁନ ୫ରେ ବୋଇଂ ଷ୍ଟାରଲାଇନରରେ ସୁନୀତା ଓ ୱିଲମୋର ମହାକାଶ ଯାଇଥିଲେ। ମାତ୍ର ଯାନ୍ତ୍ରିକ ତ୍ରୁଟି କାରଣରୁ ସେମାନେ ଫେରିପାରିନାହାନ୍ତି ।