ସ୍ପେସରୁ ଫରିବା ପରେ ଏହି ସବୁ ଗମ୍ଭୀର ରୋଗର ଶିକାର ହୋଇଥାନ୍ତି ମହାକାଶଚାରୀ

ସ୍ପେସରେ କ’ଣ ସବୁ ଘଟିଥାଏ ତାହା ଜାଣିବା ପାଇଁ ସାଧାରଣ ଲୋକଙ୍କ ମଧ୍ୟରେ ବେଶ୍ ଉତ୍ସୁକତା ପ୍ରକାଶ ପାଇଥାଏ । ସେହି କାରଣରୁ ଆମେ ଯେତେବେଳେ ମହାକାଶର ଫଟୋ ଓ ମହାକାଶଚାରୀଙ୍କ ଫଟୋ ଦେଖିଥାଏ, ସେହି ସମୟରେ ଆମ ମନରେ ଅନେକ ପ୍ରଶ୍ନ ଉଠିଥାଏ । ତେବେ ଏହି ଫଟୋ ଦେଖିବାକୁ ଯେତିକି ଭଲ ହୋଇଥାଏ, ବାସ୍ତବ ଜୀବନରେ ମହାକାଶରେ ରହିବା କ’ଣ ଏତେ ସହଜ ହୋଇଥାଏ? ମହାକାଶରୁ ଫେରିବା ପରେ ମହାକାଶଚାରୀଙ୍କୁ ଅଧିକାଂଶ ସମୟରେ ଚକ୍କର ଆସିଥାଏ ବୋଲି କିଛି ମିଡ଼ିଆରେ ରିପୋର୍ଟ ପ୍ରକାଶ ପାଇଥାଏ । ମେଡିକାଲ ସାଇନ୍ସ ଭାଷାରେ ଏହାକୁ ଅର୍ଥୋଷ୍ଟେଟିକ ହାଇପୋଟେନସନ କୁହାଯାଇଥାଏ । ସ୍ପେସ ତୁଳନାରେ ଧରିତ୍ରୀର ଗ୍ରାଭିଟେସନାଲ ଫୋର୍ସ ବହୁତ ଅଧିକ ହୋଇଥିବା କାରଣରୁ ଏପରି ହୋଇଥାଏ । କିଛି ମହାକାଶଚାରୀଙ୍କ ଠାରେ ସ୍ପେସରେ ରୋଗର ଲକ୍ଷଣ ଦେଖିବାକୁ ମିଳିଥାଏ । ସେମାନଙ୍କ ଠାରେ ମୁଣ୍ଡବ୍ୟଥା, ବାନ୍ତି ଆଦି ସମସ୍ୟା ହୋଇଥାଏ ।

ଆମ କାନ ଭିତରେ ଭେଷ୍ଟିବୁଲର ଅର୍ଗାନ ନାମକ ଏକ ଛୋଟ ଅଙ୍ଗ ରହିଛି, ଯାହାକି ଆମ ଶରୀରକୁ ସନ୍ତୁଳିତ ରଖିବାରେ ମହତ୍ତ୍ବପୂର୍ଣ୍ଣ ଭୂମିକା ଗ୍ରହଣ କରିଥାଏ । ଏହି ଅଙ୍ଗ ଶରୀର ଦ୍ବାରା ଅନୁଭବ କରାଯାଉଥିବା ଗ୍ରାଭିଟେସନନାଲ ବଳକୁ କରେଣ୍ଟରେ ପରିବର୍ତ୍ତନ କରି ବ୍ରେନକୁ ମେସେଜ ପଠାଇଥାଏ । ପୃଥିବୀରେ ରହିବା ସମୟରେ ମସ୍ତିଷ୍କ ସର୍ବଦା ଭେଷ୍ଟିବୁଲର ଅଙ୍ଗ ଦ୍ବାରା ଗ୍ରାଭିଟେସନନାଲ ବଳର ସୂଚନା ପ୍ରାପ୍ତ କରିଥାଏ ଓ ଶରୀରକୁ ସନ୍ତୁଳିତ ରଖିବାରେ ଏହାର ଉପଯୋଗ କରିଥାଏ । ମହାକାଶରେ କମ ଗ୍ରାଭିଟେସନାଲ ବଳ ରହିଥିବାରୁ ଭେଷ୍ଟିବୁଲର ଅଙ୍ଗରୁ ପ୍ରାପ୍ତ ତଥ୍ୟ ବଦଳି ଯାଇଥାଏ । ଏହା ମସ୍ତିଷ୍କକୁ ଭ୍ରମିତ କରିଥାଏ ବୋଲି କୁହାଯାଏ, ଫଳରେ ସ୍ପେସରେ ରୋଗ ହୋଇଥାଏ । ମାତ୍ର ଏହି ସ୍ଥିତି ଦୀର୍ଘ ସମୟ ଧରି ଜାରି ରହିନଥାଏ । ମହାକାଶଚାରୀଙ୍କ ଠାରେ ସ୍ପେସ ଏନିମିଆ, ମାଂସପେଶୀ ଓ ହାଡ଼ ଦୁର୍ବଳ, ହାର୍ଟ ପ୍ରତି ବିପଦ, ବ୍ରେନ ଉପରେ ପ୍ରଭାବ, ରେଡିଏସନର ଆଶଙ୍କା, ସାଇକୋଲୋଜିକାଲ ଇଫେକ୍ଟସ, ପ୍ରାଚନ ବିଶେଷ ଭାବେ ପ୍ରଭାବିତ ହେବା ଆଦି ସମସ୍ୟା ଦେଖିବାକୁ ମିଳିଥାଏ ।