ହେକ୍ଟର ହେକ୍ଟର ଜମିରେ ଆଖୁ ଚାଷ କରି ଚାଷୀ ହତାଷ

ଧର୍ମଗଡ : କଳାହାଣ୍ଡି ଜିଲ୍ଲାର ତେଲ ନଦୀ ଅବବାହିକାରେ ଅବସ୍ଥିତ କଙ୍କେରି, କନା ଗାଁ, ଲୁହା ଗାଁରେ ପ୍ରଚୁର ପରିମାଣରେ ଆଖୁ ଚାଷ କରାଯାଏ । ସେହିପରି ଗୋଲାମୁଣ୍ଡା ବ୍ଲକର ଶୋଷିଆ, ହଳଦୀ ଅଞ୍ଚଳ ସାଙ୍ଗକୁ ଜୁନାଗଡ଼ ବ୍ଲକର ଆଟି ଗାଁ ତଲମଳା ଆଦି ଅଞ୍ଚଳ ହେଉଛି ଆଖୁ ଚାଷ ବହୁଳ  l ଏହି ଅଞ୍ଚଳରେ ଚଳିତ ବର୍ଷ ପ୍ରାୟ ହଜାରେ ହେକ୍ଟର ଚାଷ ଜମିରେ ଆଖୁ ଚାଷ ହୋଇଛି l ହେଲେ ଆଖୁର ବିକ୍ରି ବଟା ନିମନ୍ତେ ସୁବିଧା ସୁଯୋଗ ନଥିବାରୁ ଅଭାବୀ ବିକ୍ରିର ଶିକାର ହେଉଛନ୍ତି ଚାଷୀ ।

ଚଳିତ ବର୍ଷ ଆଖୁ ଅମଳ ଆରମ୍ଭ ହେଲାଣି । ହେଲେ ଆଖୁ ବିକ୍ରି ପାଇଁ ସୁବିଧା ନ ଥିବା ଯୋଗୁଁ ଆଖୁକୁ ଘଣାରେ ପେଡି ଗୁଡ ତିଆରି କରି ବିକୁଛନ୍ତି ଚାଷୀ । ତାହା ପୁଣି ଛତିଶଗଡର କିଛି ଦଲାଲ ଶାଗ ମାଛ ଦରରେ କିଣିନେଉଥିବାରୁ ଚାଷୀ ପରିଶ୍ରମ ଅନୁସାରେ ପାଉଣା ପାଉନଥିବା ଅଭିଯୋଗ କରିଛନ୍ତି । ଚାଷୀଙ୍କୁ ଉତ୍ପାଦିତ ଫସଲର ବିକ୍ରିବଟା କରିବା ପାଇଁ ସରକାରୀ ସ୍ତରରେ ସୁବିଧା ସୁଯୋଗ ଯୋଗାଇଦେବାର ଆବଶ୍ଯକତା ରହିଛି ।