ନିମାପଡ଼ା: ପୁରୀ ଜିଲ୍ଲା ରାମଚଣ୍ଡୀ ବେଳାମାର୍ଗରେ ଅବସ୍ଥିତ ରାମଚଣ୍ଡୀ ଥାନାରେ ଜଣେ ମହିଳା କନଷ୍ଟେବଳଙ୍କୁ ଥାନା ଅଧିକାରୀ କରିଛନ୍ତି ଦୁଷ୍କର୍ମ ଉଦ୍ୟମ। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ହଇଚଇ ସୃଷ୍ଟି ହୋଇଛି। ସୂଚନା ମୁତାବକ ରାମଚଣ୍ଡୀ ଥାନା ଅଧିକାରୀ ସୁରେଶ ଚନ୍ଦ୍ର ପୃଷ୍ଟି ଥାନାର ମହିଳା କନଷ୍ଟେବଳଙ୍କୁ ଗତ ବୁଧବାର ବିଳମ୍ବିତ ରାତ୍ରିରେ ତାଙ୍କ ରୁମର ପଛପଟ କବାଟ ଖୋଲିବାକୁ ବାଧ୍ୟ କରିଥିଲେ। ମାତ୍ର କନଷ୍ଟେବଳ ଜଣକ ଭୟଭୀତ ହୋଇ କବାଟ ଖୋଲି ନଥିଲେ । ପଛ ଦ୍ଵାର ଖୋଲିବାକୁ ବାରମ୍ବାର ବାଧ୍ୟ କରିବାରୁ ସେ ଥାନାରେ ଡ୍ୟୁଟିରେ ଥିବା ସାଥି ବିଦ୍ୟାଧର ଟୁଡୁଙ୍କୁ ଜଣାଇଥିଲେ।
ମହିଳା କନଷ୍ଟେବଳ ଜଣଙ୍କ ରାତି ସାରା କାନ୍ଦି କାନ୍ଦି ଭୟଭୀତ ଅବସ୍ଥାରେ ରହିଥିଲେ। ଗୁରୁବାର ସକାଳୁ ଏ ନେଇ ମହିଳା କନଷ୍ଟେବଳ ପୁରୀ ଏସପି, ନିମାପଡା ଏସଡିପିଓଙ୍କ ସମେତ ପୁରୀ ଜିଲ୍ଲା ହାବିଲଦାର ସିପାହୀ କନେଷ୍ଟବଳ ମହାସଂଘର ସଭାପତି ସନ୍ତୋଷ ମହାନ୍ତିଙ୍କୁ ଲିଖିତ ଭାବେ ଅବଗତ କରିଥିବା ସୂଚନା ମିଳିଛି । ଏନେଇ ଦୀର୍ଘ ସମୟ ଅତିବାହିତ ହେବା ସତ୍ତ୍ୱେ ଉଚ ଅଧିକାରୀ ମାନେ କୌଣସି ଦୃଢ ପଦକ୍ଷେପ ଏ ପର୍ଯ୍ୟନ୍ତ ନନେଇ ମାମଲାକୁ ରଫା ଦଫା କରିଦେବାକୁ ଚାପ ପକାଉଥିବା କୁହାଯାଉଛି। ଗତକାଲି ବିଳମ୍ବିତ ରାତିରେ ନିମାପଡା sdpo ଓ କିଛି ମହିଳା ପୋଲିସ ରାମଚଣ୍ଡୀ ଥାନାକୁ ଆସି ମହିଳା କନଷ୍ଟେବଳଙ୍କୁ ଉଠାଇ ନେବା ଘଟଣା ଚର୍ଚ୍ଚାର ବିଷୟ ହୋଇଛି।
