ନନ୍ଦିଘୋଷ ବ୍ୟୁରୋ: ଜେଲେନସ୍କିକୁ ଉଚିତ ଜବାବ ଦେବେ ପୁଟିନ। ରୁଷର କାଜାନ ସହରରେ ୟୁକ୍ରେନର ଆକ୍ରମଣ ଘଟଣା ପରେ ପ୍ରଥମ ପ୍ରତିକ୍ରିୟାରେ ରୁଷ ରାଷ୍ଟ୍ରପତି ବ୍ଲାଦିମିର ପୁଟିନ କହିଛନ୍ତି ଯେ, କାଜାନ ଉପରେ ଡ୍ରୋନ୍ ଆକ୍ରମଣର ପରିଣାମ ୟୁକ୍ରେନକୁ ଭୋଗିବାକୁ ପଡିବ। ରୁଷର କାଜାନରେ ଏକ ଆପାର୍ଟମେଣ୍ଟକୁ ଟାର୍ଗେଟ କରି ହମଲା କରିଥିଲା ୟୁକ୍ରେନ। ଡ୍ରୋନ୍ ଆକ୍ରମଣରେ ଆପାର୍ଟମେଣ୍ଟ ବ୍ୟାପକ କ୍ଷତିଗ୍ରସ୍ତ ହୋଇଛି। ପ୍ରାୟ ହଜାରେ କିଲୋମିଟର ଦୂରକୁ ଟାର୍ଗେଟ କରି ଏହି ମାଡ଼ କରିଥିଲା ୟୁକ୍ରେନ। ତେବେ ଏଥିଲାଗି ୟୁକ୍ରେନକୁ ଭୟଙ୍କର ପରିସ୍ଥିତିର ସାମ୍ନା କରିବାକୁ ପଡିବ। କାଜାନ ଆକ୍ରମଣ ତୁଳନାରେ ଅଧିକରୁ ଅଧିକ କ୍ଷତି ସହିବାକୁ ପଡିବ ବୋଲି କହିଛନ୍ତି ପୁଟିନ।

ରୁଷ୍‌ର କାଜାନ୍‌ ସହର ଉପରେ ଭୟାବହ ଆକ୍ରମଣ କରିଥିଲା ୟୁକ୍ରେନ। ପ୍ରଚଣ୍ଡ ବିସ୍ଫୋରଣ ହେବା ସହ ଭୀଷଣ ଅଗ୍ନିକାଣ୍ଡ ଯୋଗୁଁ ବ୍ୟାପକ କ୍ଷତି ଘଟିଥିଲା। କାଜାନ ସହରରେ ୩ଟି କୋଠା ଉପରେ ଆକ୍ରମଣ କରିଥିଲା ୟୁକ୍ରେନ। ବିଶାଳ କୋଠାଗୁଡ଼ିକର ବିସ୍ଫୋରଣର ଦୃଶ୍ୟ ଆମେରିକାର ନ୍ୟୁୟର୍କରେ ବିଶ୍ବ ବାଣିଜ୍ୟ କେନ୍ଦ୍ର ଉପରେ ହୋଇଥିବା ଆକ୍ରମଣ ୯/୧୧ର ସଦୃଶ ଥିଲା।