ଭୁବନେଶ୍ବର : ବିଧାନସଭାରେ ସମ୍ବିଧାନ ଅବମାନନା ତାତି। ସମ୍ବିଧାନ ପୁସ୍ତକ ଧରି ଶାସକ ଦଳ ଉପରେ ବର୍ଷିଲା ବିଜେଡି। ମୁଖବନ୍ଧରେ ଧର୍ମ ନିରପେକ୍ଷ ଓ ସମାଜବାଦ ଶବ୍ଦକୁ ସାମିଲ ଦାବି। ସମ୍ବିଧାନ ଦିବସରେ ଶାସକ ବିଜେପି କରିଛି ସମ୍ବିଧାନର ଅବମାନନା। ବିଧାନସଭାରେ ଥିବା ସମ୍ବିଧାନ ମୁଖବନ୍ଧରେ ଧର୍ମନିରପେକ୍ଷ ଓ ସମାଜବାଦ ଶବ୍ଦ ନରହିବା ନେଇ ପ୍ରଶ୍ନକାଳରୁ ଶୂନ୍ୟକାଳ ଯାଏ ଲାଗି ରହିଥିଲା ହଂଗାମା। ଜୋରଦାର ପ୍ରତିବାଦ କରିଥିଲା ବିଜେଡ଼ି।ଯାହାକୁ ନେଇ ହୁଲସ୍ତୁଲ ହୋଇଥଲା ଗୃହ। ବରିଷ୍ଠ ବିଜେଡ଼ି ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ ଏହାକୁ ନେଇ ତୀବ୍ର ବିରୋଧ କରିଥିଲେ। ଶୀତ ଅଧିବେଶନର ପ୍ରଥମ ଦିନ, ହେଲେ ଧର୍ମ ନିରପେକ୍ଷ ଓ ସମାଜବାଦ ଭଳି ଦୁଇ ଶବ୍ଦ ନାହିଁ ବୋଲି କହିଥିଲେ। ସମ୍ବିଧାନ ଦିବସରେ ସମ୍ବିଧାନକୁ ରାଜ୍ୟ ସରକାର ହତାଦର କରିଛନ୍ତି ବୋଲି କହିଛି ବିଜେଡ଼ି। କାରଣ ସୁପ୍ରିମକୋର୍ଟ ବି ନିଷ୍ପତ୍ତି ଶୁଣାଇଛନ୍ତି ଯେ, ସମ୍ବିଧାନରୁ ଏହି ଦୁଇ ଶବ୍ଦ ବାଦ ପଡ଼ିବନି। ତୁରନ୍ତ ବିଜେପି ଏହାକୁ ପ୍ରତ୍ୟାହାର କରୁl ବିଧାନସଭାରେ ସମ୍ବିଧାନକୁ ଏପରି ଅବମାନନା କେବେ ଗ୍ରହଣ କରାଯିବ ନାହିଁ ବୋଲି ରୋକଠୋକ ଶୁଣାଇଛି ବିଜେଡ଼ି ।
ସମ୍ବିଧାନ ଦିବସରେ ଧର୍ମନିରପେକ୍ଷ ଓ ସମାଜବାଦ ଶବ୍ଦକୁ ବାଦ ଦିଆଯିବା ନେଇ ଡବଲ ଇଂଜିନ ସରକାରକୁ କଡ଼ା ସମାଲୋଚନା କରିଛି କଂଗ୍ରେସ।ଦଳ ଅଭିଯୋଗ କରିଛି, ଏ ଷଡଯନ୍ତ୍ର କେନ୍ଦ୍ର ସରକାର କରିଥିଲେ। ଯେଉଁଥି ପାଇଁ ବିଜେପି ଆଜି ବି ଧର୍ମନିରପେକ୍ଷ କଥା କହିପାରୁନି। ଏ ସରକାର ଧର୍ମନିରପେକ୍ଷ, ସମାଜବାଦକୁ ମାନୁନାହାନ୍ତି। ଏହାକୁ ସଂଶୋଧନ କରନ୍ତୁ ସରକାର। ସେମାନେ ଏହାକୁ ମାନିବାକୁ ବାଧ୍ୟ ବୋଲି କହିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ। ସେପଟେ ବିଜେପି ନିଜର ଦୋଷ ଲୁଚାଇବା ଯାଇ ବିତଣ୍ଡା ଯୁକ୍ତି ବାଢିଛି। ପବିତ୍ର ସମ୍ବିଧାନ ଦିବସରେ ଅପ୍ରସଙ୍ଗକୁ ପ୍ରସଙ୍ଗ କରିବାକୁ ବିଜେଡି ଓ କଂଗ୍ରେସ ଉଦ୍ୟମ କରୁଛନ୍ତି ବୋଲି ବିଜେପି ପାଲଟା ଅଭିଯୋଗ କରିଛି। ଯାହାର ଜବାବ ଦେଇଛି ବିଜେଡ଼ି । ଧର୍ମନିରପେକ୍ଷ ଓ ସମାଜବାଦ, ଏ ଦୁଇ ଶବ୍ଦ ଭାରତୀୟ ସମ୍ବିଧାନର ମୂଳମନ୍ତ୍ର। ହେଲେ ଓଡ଼ିଶା ବିଧାନସଭାରେ ଥିବା ସମ୍ବିଧାନ ବହିରେ ଏ ଦୁଇ ଶବ୍ଦ ନାହିଁ। ୧୯୭୬ରେ ଏ ଦୁଇ ଶବ୍ଦ ଯୋଡ଼ା ଯାଇଥିଲା ପୂର୍ବରୁ ସୁପ୍ରିମକୋର୍ଟ ମଧ୍ୟ ନିର୍ଦ୍ଦେଶ ଦେଇ ଏ ୨ ଶବ୍ଦ ବାଦ ଦିଆଯାଇପାରିବ ନାହିଁ ବୋଲି ରାୟ ଦେଇଛନ୍ତି।
