ବ୍ୟାଙ୍କ ଖାତାରୁ ଟଙ୍କା ହଡ଼ପ ଘଟଣା: ବିଜେପି ନେତାଙ୍କୁ ଘେରିଲେ ଆଦିବାସୀ, ଅଟୋରେ ଚମ୍ପଟ ମାରିଲେ ନେତା

ଜୟପୁର: ବ୍ୟାଙ୍କ ଖାତାରୁ ଟଙ୍କା ହଡ଼ପକୁ ନେଇ ରାଜରାସ୍ତାରେ ଅପଦସ୍ତ ହେଲେ ବିଜେପି ନେତା । ଗରିବ ହିଧିତାଧିକାରୀଙ୍କ ବ୍ୟାଙ୍କ ଖାତାରୁ ଟଙ୍କା ହଡପ ନେଇ ବିଜେପି ନେତା ତଥା କୋରାପୁଟ ଜିଲ୍ଲା ସାଧାରଣ ସମ୍ପାଦକ ଚନ୍ଦ୍ରଶେଖର ରଥଙ୍କୁ ଘେରିଲେ ଆଦିବାସୀ । ପରିସ୍ଥିତି ଏମିତି ହେଲା ଯେ ବିଚ୍ ରାସ୍ତାରେ ଚନ୍ଦ୍ରଶେଖର ରଥଙ୍କୁ ଆଦିବାସୀ ହିତାଧିକାରୀ ସେମାନଙ୍କ ହଡପ ଟଙ୍କା ଫେରାଇବାକୁ ଜିଦ୍ ଧରିଥିଲେ । ନେତା ଜଣକ ଯେଉଁ ଆଡେ ଯାଇଥିଲେ ତାଙ୍କ ପଛରେ ଗୋଡାଇ ଥିଲେ ହିତାଧିକାରୀ । ଶେଷରେ ବାଧ୍ଯ ହୋଇ ଏକ ଅଟୋରେ ବସି ଘଟଣା ସ୍ଥଳରୁ ଚମ୍ପଟ ମାରିଥିଲେ ଚନ୍ଦ୍ରଶେଖର । ଏପଟେ ହଡ଼ପ ଟଙ୍କା ଫେରାଇବାକୁ ଜ଼ିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି ଲୋକେ ।

ଅଭିଯୋଗ ଅନୁସାରେ, ବୈପାରୀଗୁଡା ବ୍ଲକର ବିଭିନ୍ନ ପଞ୍ଚାୟତରେ ବିଜେପି ନେତା ଚନ୍ଦ୍ରଶେଖର ରଥ ଲେବର କାର୍ଡ କରାଇ ଦେବାକୁ କହି ୫ ଶହରୁ ଅଧିକ ଗରିବ ଲୋକଙ୍କ ନାମରେ ବ୍ୟାଙ୍କ ଖାତା ଖୋଲି ବିଭିନ୍ନ ଯୋଜନାର ଅର୍ଥ ବାଟମାରଣ କରିଥିବା ଅଭିଯୋଗ ହୋଇଥିଲା । ଏ ନେଇ ହିତାଧିକାରୀ ପୂର୍ବରୁ ଜିଲ୍ଲାପାଳଙ୍କ ଦ୍ଵାରସ୍ଥ ହୋଇଥିଲେ । ଘଟଣାକୁ ନେଇ ଚନ୍ଦ୍ରଶେଖର ରଥଙ୍କ ନାମରେ ବୈପାରୀଗୁଡା ଥାନାରେ ଲିଖିତ ଅଭିଯୋଗ ମଧ୍ୟ ହୋଇଥିଲା । ମମଲାରେ ହାଇକୋର୍ଟରୁ ଆଗୁଆ ଜାମିନ ପାଇଛନ୍ତି ଚନ୍ଦ୍ରଶେଖର ରଥ । ଏବେ କୋର୍ଟରେ ମାମଲା ଚାଲିଛି । କୋର୍ଟଙ୍କ ନିଷ୍ପତ୍ତି ଆସିବ ପରେ ସେହି ଅନୁସାରେ ଅର୍ଥ ଫେରସ୍ତ କରିବି ବୋଲି ଚନ୍ଦ୍ରଶେଖର ।

ମାମଲାକୁ ନେଇ ହିତାଧିକାରୀ ଜିଲ୍ଲାପାଳଙ୍କୁ ଭେଟି ଲିଖିତ ଅଭିଯୋଗ ଦେଇଛନ୍ତି । ଜିଲ୍ଲାପାଳ ଅର୍ଥ ଫେରସ୍ତ କରିବାକୁ ଉଦ୍ୟମ କରିବେ ଆଶ୍ଵାସନା ଦେଇଛନ୍ତି ।