କଂଗ୍ରେସକୁ ଓମାର ଅବଦୁଲ୍ଲାଙ୍କ ଗୋଟିଏ ଦିନର ଅଲ୍ଟିମେଟମ !

ନନ୍ଦିଘୋଷ ବ୍ୟୁରୋ: ଓମାର ଅବଦୁଲ୍ଲା ଜାମ୍ମୁ କାଶ୍ମୀରର ମୁଖ୍ୟମନ୍ତ୍ରୀ ପଦ ଗ୍ରହଣ କରିବାକୁ ପ୍ରସ୍ତୁତ । ଗତକାଲି ସେ କହିଛନ୍ତି ଯେ ଜାମ୍ମୁ କାଶ୍ମୀରରେ ୪ଟି ସ୍ବାଧୀନ ବିଧାୟକ ଦଳକୁ ସମର୍ଥନ କରିବାପରେ ଏନସିର ଆସନ ୪୬ରେ ପହଞ୍ଚିଛି। ବର୍ତ୍ତମାନ କେବଳ ସରକାର ଗଠନ ଦାବିରେ କଂଗ୍ରେସର ସମର୍ଥନକୁ ଅପେକ୍ଷା କରିଛନ୍ତି। ଓମାର ଅବଦୁଲ୍ଲା ଏନସି ବିଧାନସଭା ଦଳର ନେତା ଭାବରେ ନିର୍ବାଚିତ ହେବାପରେ ସମସ୍ତଙ୍କୁ ଧନ୍ୟବାଦ ଜଣାଇ କହିଛନ୍ତି ଯେ, “ଆପଣ ଦ୍ବାରା ନିଆଯାଇଥିବା ନିଷ୍ପତ୍ତି ବିଷୟରେ ମୁଁ ଅବଗତ । ମୋ ଉପରେ ବିଶ୍ବାସ ରଖିଥିବାରୁ ସମସ୍ତ ବିଧାୟକମାନଙ୍କୁ ମୁଁ ହୃଦୟରୁ ଧନ୍ୟବାଦ ଦେଉଛି।” ମୋତେ ସରକାର ଗଠନ ଦାବିରେ ଭାଗ ନେବାର ଏକ ସୁଯୋଗ ଦେଇଥିବାରୁ ଧନ୍ୟବାଦ ।

ଜାମ୍ମୁ କାଶ୍ମୀରରେ ସରକାର ଗଠନ ସମ୍ପର୍କରେ ଅବଦୁଲ୍ଲା କହିଛନ୍ତି ଯେ ବର୍ତ୍ତମାନ ସେ କଂଗ୍ରେସର ସମର୍ଥନକୁ ଅପେକ୍ଷା କରିଛନ୍ତି। ସେ କହିଛନ୍ତି, “ଆମେ କଂଗ୍ରେସ ସହିତ ସେମାନଙ୍କର ସମର୍ଥନ ପାଇଁ ଆଲୋଚନା କରୁଛୁ। ସମର୍ଥନ ପାଇବା ପରେ ଆମେ ଯଥାଶୀଘ୍ର ରାଜ୍ୟପାଳଙ୍କ ନିକଟକୁ ଯିବୁ। ତେବେ ଚିଠିର ଜବାବ ଦେବାକୁ  କଂଗ୍ରେସକୁ ଗୋଟିଏ ଦିନର ସମୟ ଦେଇଛୁ।” ରାଜ୍ୟ ଗଠନ ପାଇଁ ପ୍ରସ୍ତାବ ସମ୍ପର୍କରେ ଅବଦୁଲ୍ଲା କହିଛନ୍ତି ଜମ୍ମୁ-କଶ୍ମୀରରେ ନ୍ୟାଶନାଲ କନ୍‌ଫରେନ୍ସ ଏବଂ କଂଗ୍ରେସର ମେଣ୍ଟ ସରକାର ଶପଥ ନେବା ପରେ ପ୍ରଥମ କ୍ୟାବିନେଟ୍‌ରେ ଅନୁଚ୍ଛେଦ ୩୭୦ ଉପରେ ସଂକଳ୍ପନାମା ପାରିତ କରାଯିବ। କେନ୍ଦ୍ରଶାସିତ ଅଞ୍ଚଳକୁ ରାଜ୍ୟ ମାନ୍ୟତା ଫେରାଇବା ପାଇଁ କେନ୍ଦ୍ର ଉପରେ ଚାପ ସୃଷ୍ଟି କରାଯିବ ।

ସେ ଏହି ପ୍ରସ୍ତାବ ପାରିତ କରିବା ପାଇଁ ପ୍ରଧାନମନ୍ତ୍ରୀ, ଗୃହମନ୍ତ୍ରୀ ଏବଂ ଅନ୍ୟ ମନ୍ତ୍ରୀଙ୍କ ସହ ଆଲୋଚନା କରିବେ। ଏଥି ସହିତ ଅବଦୁଲ୍ଲା ମଧ୍ୟ ଲୋକଙ୍କ କଲ୍ୟାଣ ପାଇଁ ସରକାରଙ୍କ ତରଫରୁ ଲେଫ୍ଟନାଣ୍ଟ ଗଭର୍ଣ୍ଣର (ଏଲଜି) ଙ୍କ ସହ ସମନ୍ୱୟର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି ଯେ ଆମେ ଏଲଜି ଏବଂ ସରକାରଙ୍କ ମଧ୍ୟରେ କୌଣସି ବଡ଼ ବିବାଦ ଚାହୁଁନାହୁଁ। ଏହା ପରିବର୍ତ୍ତେ, ଆମର ଲକ୍ଷ୍ୟ ହେଉଛି ଶାନ୍ତିପୂର୍ଣ୍ଣ ସହଯୋଗ ଏବଂ ଏକ ରାଜ୍ୟ ଭାବରେ ଆମର ଯୋଗ୍ୟ ସ୍ଥିତି ହାସଲ ନକରିବା ପର୍ଯ୍ୟନ୍ତ ଲୋକଙ୍କ ପାଇଁ କାର୍ଯ୍ୟ କରିବା  ।  ଆମେ ଆଶା କରୁଛୁ ଯଥାଶୀଘ୍ର ରାଜ୍ୟ ପ୍ରତିଷ୍ଠା ହେବ। ଜାମ୍ମୁ କାଶ୍ମୀରର ଲୋକଙ୍କୁ ସେବା କରିବା ପାଇଁ ଆମେ ଏକ ସହଯୋଗୀ ତଥା ଅନୁକୂଳ ପରିବେଶ ସୃଷ୍ଟି କରିବାକୁ ଚାହୁଁଛୁ  ।  ସେ ନିଶ୍ଚିତ କରିଛନ୍ତି ଯେ ଭବିଷ୍ୟତ ସରକାର ସମସ୍ତ ବ୍ୟକ୍ତିବିଶେଷଙ୍କ ପାଇଁ କାର୍ଯ୍ୟ କରିବେ ।

୨୦୧୯ ଅଗଷ୍ଟ ୫ରେ ଜମ୍ମୁ-କଶ୍ମୀରକୁ ସ୍ବତନ୍ତ୍ର ରାଜ୍ୟ ମାନ୍ୟତା ପ୍ରଦାନକାରୀ ସମ୍ବିଧାନର ଅନୁଚ୍ଛେଦ ୩୭୦କୁ କେନ୍ଦ୍ର ସରକାର ହଟାଇ ଦେଇଥିଲେ। ଏଥିସହ ଜମ୍ମୁ-କଶ୍ମୀର ଓ ଲଦାଖ ଦୁଇଟି କେନ୍ଦ୍ରଶାସିତ ଅଞ୍ଚଳ ସୃଷ୍ଟି କରିଥିଲେ। ସୁପ୍ରିମକୋର୍ଟଙ୍କ ନିର୍ଦ୍ଦେଶାନୁସାରେ ଜମ୍ମୁ-କଶ୍ମୀରରେ ୨୦୧୪ ପରେ ପ୍ରଥମ ଥର ବିଧାନସଭା ନିର୍ବାଚନ ଅନୁଷ୍ଠିତ ହୋଇଛି।