ଶ୍ରୀ ବଳଦେବଜୀଉଙ୍କ ମନ୍ଦିରରେ ବ୍ୟବହୃତ ଘିଅର ମାନ ନେଇ ପ୍ରଶ୍ନ ଉଠାଇଲେ ସେବାୟତ

ନନ୍ଦିଘୋଷ ବ୍ୟୁରୋ: ତୁଳସୀ କ୍ଷେତ୍ରର ଆରାଧ୍ୟ ଦେବତା ପ୍ରଭୁ ଶ୍ରୀ ବଳଦେବଜୀଉଙ୍କ ମନ୍ଦିରରେ ବ୍ୟବହୃତ ଘିଅର ମାନ ନେଇ ପ୍ରଶ୍ନ ଉଠାଇଛନ୍ତି ସେବାୟତ ନୃସିଂହ ପ୍ରସାଦ ପତ୍ରି। ଗୁରୁବାର ଦିନ ଦ୍ଵିପ୍ରହର ଧୂପ ପାଇଁ ପ୍ରସ୍ତୁତ ପ୍ରସାଦରେ ବ୍ୟବହାର ହୋଇଥିବା ଘିଅରୁ ଦୁର୍ଗନ୍ଧ ବାହାରିଥିବା ନେଇ ଦେବୋତ୍ତର କାର୍ଯ୍ୟାଳୟରେ ସେ ଅଭିଯୋଗ କରିଥିଲେ l କେବଳ ସେତିକି ନୁହେଁ ଓମଫେଡ ଘିଅ ଟିଣରେ ମାନୁଫାକଚରିଂ ଓ ଏକ୍ସପାଏରୀ ଡେଟ ମଧ୍ୟ ଲେଖା ନଥିବା ଜଣାପଡ଼ିଥିଲା l ଏ ନେଇ ଅଭିଯୋଗ କରାଯିବା ପରେ ତୁରନ୍ତ ମହଜୁଦ ଥିବା ଘିଅ ଫେରାଇ ନେଇଥିଲେ ମନ୍ଦିର କର୍ତ୍ତୃପକ୍ଷ l ପରେ ଦେବୋତ୍ତର କାର୍ୟାଳୟ ପକ୍ଷରୁ ନୂଆ ଘିଅ ଯୋଗାଇ ଦିଆଯାଇଥିଲା l ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରାଯାଇଛି l